Mmunyi muudi mua kuleja budipuekeshi bua bushuwa?

BUDIPUEKESHI bua bushuwa budi ne mushinga wa bungi ku mêsu kua Nzambi. Yakobo wakafunda ne: ‘Nzambi udi upidia badi badisua, kadi udi upa badi badipuekesha [“bulenga bukena butuakanyine,” NW].’ (Yakobo 4:6) Muaba eu Yakobo uvua mua kuikala mutume meji ku ngenyi mivule mileja mu Mifundu ya tshiena-Ebelu. ‘Yehowa udi mubandishibue muulu, kadi udi umona bantu bapuekele; udi mumanye badi ne dipetu patshidibu kule.’ ‘Mêsu a diambu a bantu neinamijibue, dipetu dia bantu banene nedipuekeshibue, ne Yehowa nkayende neatumbishibue.’ ‘[Nzambi] udi ubuidia babuidi, kadi udi uleja badi bapuekele luse.’​—Musambu 138:6; Yeshaya 2:11; Nsumuinu 3:34.

Mupostolo Petelo pende wakakankamija dikala ne budipuekeshi. Wakafunda ne: ‘Buonso buenu nudiluatshishe ne bupuekele, bua kukuatshishangana; bualu bua Nzambi udi upidia badi badisua, kadi udi upa badi badipuekesha [“bulenga bukena butuakanyine,” NW].’​—1 Petelo 5:5.

Tshilejilu tshia Kristo tshia budipuekeshi

Udi mua kudiebeja ne: Kuikala mudipuekeshi kudi ne buimpe anyi dikuatshisha kayi? Bua muntu udi udienzeja bua kuikala muena Kristo mulelela, diandamuna dia lukonko elu didi ne mushinga wa bungi​—kuikala mudipuekeshi nkuikala bu Kristo. Yezu wakaleja budipuekeshi buende mu ditaba muanda wa pa buawu wa kufuma mu diulu kupueka pa buloba ne kulua muntu mupuekele, mushadile kudi banjelu. (Ebelu 2:7) Nansha muvuaye Muana wa Nzambi, wakatantamena dimufuisha bundu kudi baluishi bende mu malu a Nzambi. Wakashala mutukije mu mateta, nansha muvuaye ne bukole bua kubikila bisumbu bia banjelu bua kulua kumuambuluisha.​—Matayo 26:53.

Ndekelu wa bionso, bakakudika Yezu mu bundu ku mutshi wa tshinyongopelu, kadi wakashala ne lulamatu kudi Tatuende. Nenku Paulo wakafunda bua bualu buende ne: “Nulame munda muenu mmuenenu eu wa mu lungenyi uvua kabidi munda mua Kristo Yezu, yeye, nansha muvuaye mu tshimfuanyi tshia Nzambi, kakela meji bua kuangata muaba wende, mmumue ne: bua alue muomumue ne Nzambi. Tòo, kadi wakadipongolola ne kuangataye tshimfuanyi tshia mupika ne kufikaye ku dikala mu tshifuanyikiji tshia bantu. Kupita apu, pakadimonaye mu nsombelu muikale bu muntu, wakadipuekesha ne kuluaye mutumikidi too ne ku lufu, eyowa, lufu ku mutshi wa tshinyongopelu.”​—Filipoi 2:5-8, NW.

Mmunyi mutudi mua kuleja budipuekeshi bua bushuwa? Mu nsombelu milelela, mmunyi mutudi mua kuenza malu ne budipuekeshi pamutu pa kuenza ne lutambishi?

Mutu muena budipuekeshi umvua

Tukonkononayi budipuekeshi ku mudimu, wa patupu peshi wa bena Kristo. Bua mudimu kuenzekawu bimpe, bidi bikengela batangidi, balombodi ne baludiki. Muntu kampanda udi ne bua kuangata mapangadika. Utu umvua bishi? Utu wela meji ne: “Yeye udi udimona bu nganyi bua kuikalaye ungambila tshia kuenza? Ndi muenze mudimu eu bidimu bipite biende yeye.” Bushuwa, wewe muikale ne lutambishi, neumvue tshiji bua kukokela. Ku lunga luseke, mudipuekeshi udi uluangana bua ‘kubenga kuenza muanda bua ditapuluka anyi bua kuditumbisha kua patupu; kadi ne mutshima mupuekele udi ubala bakuabu bu bantu badi bamutambe yeye.’​—Filipoi 2:3.

Utu umvua munyi padi muntu mupuekele kuudi anyi muntu mukaji ukupesha lungenyi? Biwikala mudipuekeshi, neuluitabe. Biwikala ne lutambishi, kuakuluitaba to, anyi neulubenge diakamue. Newitabe butumbi ne dilabidila bidi bifikisha ku kabutu anyi mibelu idi ikolesha bua didiunda diebe?​—Nsumuinu 27:9; 29:5.

Udi mua kutantamena ntatu anyi? Budipuekeshi nebukuambuluishe bua kutantamena nsombelu mikole ne kunanukila, anu bu muakenza Yobo. Biwikala ne lutambishi, newikale mutangile ku diteketa mu mikolo ne udi mua kupanga lutulu mu nsombelu mikole ne iudi umona bu mipepele.​—Yobo 1:22; 2:10; 27:2-5.

Mudipuekeshi utu ne dinanga ne ubuikidilangana

Bamue bantu badi ne lutatu bua kuamba ne: “Mfuileku luse. Ndi muenze tshilema. Udi mubinge.” Bua tshinyi? Lutambishi lupite! Kadi misangu ya bungi dilomba luse ne muoyo mujima didi mua kukanda matandu bipepele.

Utu mudiakaje bua kubuikidilangana padi muntu ukuenzela bibi anyi? Peshi, mu lutambishi luebe, udi ulaminangana munda, pamu’apa munkatshi mua matuku anyi ngondo ya bungi, ujila muntu uudi wela meji ne: mmukuenzele bibi? Utu mene ushala ne muoyo ujabala munda ne tshipatshila tshia kudisombuela anyi? Bantu batu bashipa bakuabu bua kudisombuela. Mu mikuabu mishindu, banga batu ne ngenzelu wa dishiminyinangana malu bua kunyangilangana lumu. Kadi, muntu mudipuekeshi utu ne dinanga ne ubuikidilangana. Bua bualu kayi? Bualu dinanga kaditu dilama bualu bubi budienzela nansha. Yehowa uvua mudiakaje bua kubuikidila bena Isalele amu bu buobu balekele lutambishi luabu. Muyidi mudipuekeshi wa Yezu mmudiakaje bua kubuikidilangana, nansha misangu ya bungi!​—Yoele 2:12-14; Matayo 18:21, 22; 1 Kolinto 13:5.

Muntu mudipuekeshi ‘udi uteka bakuabu kumpala mu bunême.’ (Lomo 12:10) Nkudimuinu mukuabu udi wamba ne: “Nupeshangane bunême kumpala kuenu nuenu bine.” (New International Version) Utu wela bakuabu kalumbandi ne wanyisha makokeshi ne mamanya abu anyi? Peshi misangu yonso utu ne bua kuangula tshilema bua kumona mua kubanyangila lumu? Bushuwa, utu mua kuela bantu bakuabu kalumbandi ne muoyo mujima anyi? Biwikala ne lutatu mu muanda eu, pamu’apa dilubakana ne lutambishi luebe ke bidi bikutatshisha.

Muena lutambishi katu ne lutulu to. Muena budipuekeshi utu ne lutulu ne muoyo-mule. Bidi munyi buebe wewe? Utu ubungama bua bualu buonso bukuenzela buudi umona kabuyi buimpe anyi? Dienza nenku didi dibengangana ne muoyo-mule. Biwikala mudipuekeshi, kuakudiangata ne mushinga mutambe kupita nansha. Vuluka tshiakenzeka pavua bayidi ba Yezu badiangata ne mushinga wa bungi​—bakaditua mu dielangana mpata mikole bua kumanya uvua ne mushinga kupita bakuabu. Bavua bapue muoyo ne: buonso buabu bavua ‘bapika ba tshianana’!​—Luka 17:10; 22:24; Mâko 10:35-37, 41.

Voltaire, mufundi wa mu France, wakumvuija budipuekeshi bu “budipope bua anyima . . . tshituyishi tshia lutambishi.” Bushuwa, budipuekeshi mbupuekele bua mutshima. Muena budipuekeshi mmudipope mu mutshima, kêna ne lutambishi nansha. Udi ne kanemu ka bungi ne bikadilu bimpe.

Nenku bua tshinyi kudienzeja bua kuikala mudipuekeshi? Bualu Nzambi udi wanyisha budipuekeshi ne budi butuambuluisha bua kupeta buludiki buende. Mu bualabale kampanda, bua budipuekeshi bua Danyele, Yehowa wakangata muprofete eu bu muntu “munangibue bikole” ne wakamutumina muanjelu ne tshikena-kumona! (Danyele 9:23; 10:11, 19) Budipuekeshi budi bukupetesha masanka a bungi. Budi bukupetesha balunda balelela badi bakunange. Kupita apu, budi bukupetesha mabenesha a Yehowa. ‘Difutu dia kudipuekesha ne dia ditshina dietu dia Yehowa didi bubanji, butumbi ne muoyo.’​—Nsumuinu 22:4.

[Tshimfuanyi mu dibeji 7]

Kulomba luse ne dîyi dia budipuekeshi kudi mua kulengeja nsombelu