Bamanyishi ba Bukalenge badi balonda

Dikeba Nzambi mulelela didi difuta

MU SIEKELE wa dikumi K.B.B., ntendelelu wa dishima uvua mutangalake mu bukalenge bua Yuda bua bisa bibidi. Kadi munkatshi mua ditendelela mpingu edi, kuvua muntu uvua ne mutshima muakane ku mêsu kua Nzambi. Diende uvua Yehoshafata. Muprofete Yehu wakamba bua bualu buende ne: “Malu mimpe makuabo adi munda muebe bualu bua wewe . . . [“wakalongolola,” NW] mutshima webe bua kukeba Yehowa.” (2 Kulondolola 19:3) Bia muomumue lelu’eu, mu “bikondo [ebi] bikole mua kupita nabi,” bantu miliyo mivule ‘mbalongolole mitshima yabu’ bua kukeba Yehowa, Nzambi mulelela. (2 Timote 3:1-5, NW) Muanda eu mmujadika kudi tshivua tshienzeke mu ditunga dia Togo, mu Afrike wa ku Ouest.

Casimir uvua ulonga mu tshilongelu tshia bena Katolike ne uvua muangate komonyo wende wa kumpala ne bidimu tshitema. Kadi pakakumbajaye bidimu 14, Casimir wakalekela diya mu misa. Muanda eu wakamufikisha ku dikala ne buôwa, bualu uvua wela meji ne: dipumbisha Misa divua mua kumufikisha ku diya mu inferno wa kadilu anyi nansha mu mpurgatoriyo.

Mu kalasa Casimir wakadisanga ne kasumbu ka bansonga bavua bapetangana musangu umue ku lumingu bua kulonga Bible. Wakatuadija kabidi kudibadila Bible. Umue musangu Casimir wakabala mu mukanda wa Buakabuluibua bualu bua nyama wa luonji ukuatshisha buôwa uvua upatuka mu mbuu. (Buakabuluibua 13:1, 2) Pakebejaye mulombodi wa kasumbu ka dilonga dia Bible bualu ebu, wakamuambila ne: nyama au uvua mulelela ne se: neapatukile bushuwa mu mbuu. Diumvuija edi diakalubakaja Casimir bualu bavua basombele pabuipi ne ku Muelelu wa mbuu wa Atlantike. Uvua mutuishibue ne: neikale munkatshi mua bantu ba kumpala benzelabu bibi kudi nyama eu wa luonji.

Casimir wakabanga kulama makuta bua kumonaye mua kunyemena mu tshipela, ku Nord bua kuepuka nyama eu wa luonji. Wakambila mulongi nende kampanda mapangadika avuaye muangate. Bu muvuaye Ntemu wa Yehowa, mulongi nende eu wakamujadikila ne: nyama muena dîna kavua ne bua kupatukila mu mbuu to. Panyima pa matuku makese, bakabikila Casimir mu bisangilu ku Nzubu wa Bukalenge. Bisangilu biakamusankisha ne wakatuadija kubuelamu pa tshibidilu. Wakitaba kabidi dilonga dia Bible.

Pakaya Casimir kumpala mu dilonga diende, dîku diakatuadija kumuluisha. Dîku diende divua dilonda ntendelelu wa kabukulu ne divua didia minyinyi ya nyama mifiekela ya milambu ivua ishala. Pavua Casimir ubenga mu bukalanga bua kudia minyinyi eyi, bavua bamukanyina ne bamuambila bua kumbuka kumbelu. Casimir uvua ushala mupuwe, ne kabakakumbaja tshivuabu bakana bua kuenza nansha. Kadi, munkatshi mua ngondo isatu, bavua badia anu minyinyi eyi mu dîku. Casimir uvua ne lutatu lua kupeta biakudia bikumbane, kadi wakatantamena lutatu elu ne nsombelu mikuabu mikole.

Casimir wakatungunuka ne kudiunda mu nyuma too ne pakafikaye ku didilambula ne batismo. Pashishe, bakamuteka musadidi wa mudimu ne wakabuela mu Kalasa ka Dilongesha Mudimu ka musangu muinayi mu Togo. Mpindieu, udi wenza mudimu wa budisuile ku Betele.

Eyowa, mmunyipu mudi mêyi aa a Mukalenge Davidi mikale malelela mu nsombelu ya bungi: ‘Biwakeba [Yehowa], neumupete.’​—1 Kulondolola 28:9.

[Bimfuanyi mu dibeji 8]

Casimir (ku dia balume) udi wenza mudimu wa budisuile ku Betele