Badi bafuilakena muaba “munsantu”

MU DIA 15 Kashipu 1099, Mvita ya Kumpala ya Krwazade, mienza ne dianyisha dia pape wa ku Lomo, yakakumbaja tshipatshila tshiayi tshia kunyenga Yelushalema. Dishipangana divua dikuate buôwa! Bantu bakapandukamu bavua anu ngovena ne bavua bamulame, panyima pa buobu bamane kufila makuta a bungi bua kukosa mishiku. Mu mukanda wende kampanda, mfumu wa ekleziya Antony Bridge udi umanyisha tshiakafikila ba-Mizilman ne bena Yuda bavua mu tshimenga etshi ne: “Pakapeshabu bena Krwazade budikadidi bua kuenza muvuabu bamone munda mua tshimenga, bakaditua mu diela mashi a bungi panshi. . . . Bakashipa mulume yonso, mukaji ne muana yonso uvuabu basangana mu tshimenga . . . Pavuaku kakuyi muntu mukuabu wa kushipa, batshimunyi aba bakenda mazengu mu misesu ya mu tshimenga . . . batangile ku Ekleziya wa Saint-Sépulcre bua kuela Nzambi tuasakidila.”​—The Crusades.

Katshia bena krwazade batshimuna, dikala dia Bukua-buena-Kristo mu Yelushalema ndilele dipanga kumvuangana pankatshi pa Katolike ka ku Lomo, Ortodokse wa ku Est ne bitendelelu bikuabu bia bena Kristo ba ku dîna. Mu 1850 dikokangana pankatshi pa bamfumu bashilangane ba ekleziya bua miaba minsantu ya mu Yelushalema ne bitupa bidi bimunyunguluke divua muanda munene wakafikisha ku Mvita ya ku Crimée. Ditunga dia Angleterre, dia France ne Mbulamatadi wa mu Turquie wa kale bakaluisha Russie, ne bantu 500 000 bakafua.

Mvita eyi kayakajikija makokangana mu Bukua-buena-Kristo bua difuilakena Yelushalema ne miaba yende minsantu. Bena mu Turquie wa kale, bavua bakuate ditunga musangu au, bakateta bua kufila ditalala pa kukosela bisumbu bia mitabuja mashilangane miaba minsantu. Mumanyi mupiluke Menashe Har-el udi umvuija mu mukanda wende kampanda ne: “Bakitaba lungenyi elu . . . kudi Matunga Masanga akangata Dipangadika dia Dikosolola dia mu Kasuabanga 1947. Nenku dipangadika edi didi mu mikenji ya bukua-matunga.” (This Is Jerusalem) Bu tshipeta, mbakosolole Ekleziya wa Saint-Sépulcre bamuabanyine Katolike ka ku Lomo, Ortodokse wa bena Grèce, bena Arménie, bena Sulia ne bena Ejipitu. Ndekelu wa bionso, bena mu Etiopia bakaleja bukenji buabu bua kuangata ekleziya eu pa kuteka bamue ba kudibu bua basombele mu mitanda pa musaka wende. Bantu ba bungi badi bangata Ekleziya wa Saint-Sépulcre bu muaba mutambe bunsantu wa Bukua-buena-Kristo. Mmûle ne tushete tua bishadile bia bansantu, bimfuanyi ne mpingu. Muaba mukuabu udibu babikila munsantu utu Calvaire de Gordon, udibu banemekela kudi bamue bena Mishonyi, bela meji ne: ke muaba uvuabu bashipele Yezu ne bamujiike.

Yezu wakambila muntu mukaji uvua ne ditabuja dia miaba minsantu kukadi bidimu bia bungi ne: ‘Dîba nedilue dikala bantu kabayi batendelela Tatu ku mukuna eu anyi mu Yelushalema. Batendeledi balelela nebatendelele [Tatu] mu nyuma ne mu bulelela.’ (Yone 4:21-24) Nenku, bena Kristo balelela kabena banemekela miaba minsantu nansha. Dibutula Yelushalema mubule lulamatu kudi biluilu bia bena Lomo mu 70 B.B. ndidimuija kudi Bukua-buena-Kristo. Ntendelelu wabu wa mpingu, matapuluka ne diela mashi panshi bidi bibengangana ne didiamba mudibu bena Kristo. Nanku Bukua-buena-Kristo nebubutuke amu mudi Nzambi mudianjile kumanyisha bua bitendelelu bionso bidi bienza Babulona Munene.​—Buakabuluibua 18:2-8.