Dibanjija dia Muaba wa Tulasa tua Société Watchtower​—Tshibilu tshienzela Yehowa

KATSHIA ku kale, bibilu bia disanka bivua pabi bimue bia ku bintu bivua ntendelelu mulelela ulomba bua kuenza. Bimue bibilu bia mu Isalele wa kale bivua bienzeka munkatshi mua matuku a bungi ne batendeledi ba Yehowa binunu ne binunu bavua babuelamu. Dibanjija dia ntempelo wa Solomo diakanenga matuku muanda-mutekete ne bakadilonda kudi Tshibilu tshia Mitanda tshia lumingu lujima. Bibilu ebi bivua bipesha bena Isalele mushindu wa kuelangana meji pa malu malenga avua Yehowa mubenzele. Bakapingana ku nzubu yabu ne ‘disanka dinene mu mitshima yabu bua malu mimpe onso [akenza, NW] Yehowa.’​—1 Bakelenge 8:66.

Tshivua tshienzeke Muaba udi Tulasa tua Société Watchtower ku Patterson mu New York ku États-Unis, kutuadija mu matuku 17 too ne 22 a ngondo wa Lumungulu 1999 tshiakavuluija bantu bavuabu babikile bibilu bia disanka bia kale bia mu matuku a Solomo. Lumingu alu luvua lukuatshila ku bianza bua dibanjija dia mutambatamba wa nzubu 28, dilongolola bua kutungunuja dilongesha dia Bible pa buloba bujima. Bakadianjila kulongolola malu bimpe bua bantu bonso 5 400 batu benza mudimu ku Betele wa ku Brooklyn, ku Wallkill ne ku Patterson kunyungulukabu mu nzubu eyi ya ku Patterson munkatshi mua lumingu alu ludi kaluyi kupua muoyo. Bavua babikile bena mudimu ba kale bapite pa 500 bavua benze mudimu tshikondo tshivuabu biibaka tulasa, baleji-mpala ba filiale 23 ya Société Watch Tower ne bakuabu bafumine mu bisumbu bia pabuipi. Bonso basanga bavua 8 100.

Dibandila bimfuanyi bidi bilongesha

Bua bantu bavuabu babikile kudiumvuabu bimpe muaba eu udi tulasa, bakalongolola bindidimbi bia pa buabi, dileja malu adi alongesha ku video ne dinyunguluka dia muntu nkayende kakuyi muntu umulombola. Ku tshibueledi tshinene, tshimfuanyi tshia tshilejilu tshia ntempelo uvua mu Yelushalema pavua Yezu pa buloba, tshiakakoka diakamue ntema ya bantu. Bimfuanyi bikuabu bivua bileja mianda ya ntuadijilu wa Gilada, Tshilongelu tshia Bible tshia Société Watchtower, mpungilu miende lumu, bisangilu bia tshisumbu, mushindu wakatuadija dilombola dia malonga a Bible a ku nzubu mu tshikondo tshietu etshi, adibu balombola mpindieu miliyo mivule ku lumingu luonso, ne mudimu muenza kudi Tshibambalu tshia Malu a mikenji bua kumona mua kutungunuka ne kuyisha; bionso ebi bua kutumikila mukenji wa Yezu.​—Matayo 28:19, 20.

Bantu bavua mu tshibilu tshia dibanjija aba bakamona ku video mu nzubu mukuabu wa bisangilu, mudi nkuasa 1 700, filme uvua ne tshiena-bualu ne: “Kabiena bua bukole​—mbua nyuma wanyi!” (Angl.) Bakamumona munkatshi mua minite 33. Filme eu wakaleja muakatuadija Muaba wa Tulasa tua Société Watchtower. Nkonko yakelabu bamue bana betu yakaleja patoke mudi Yehowa mulombole malu ne mubeneshe madikolela menza bua kujikija bimpe mudimu eu wakangata bidimu 15. Bantu binunu ne binunu bakadifila mu mudimu wa diibaka eu. Mu 1994, kuvua bantu 526 bavua benza mudimu, kusangisha ne bena budisuile ba ku dîba ne ku dîba 350, bena mudimu 113 ba matuku mabadika ne bantu 63 bavua balua dituku dionso muaba eu bua kutuishangana maboko. Bavule bakafila mapa bua kukuatshisha mudimu eu. Buonso buabu mbajingulule se: mudimu eu kauvua mua kujika bu spiritu wa Yehowa kayi muutue bianza nansha.​—Zekâya 4:6.

Bantu bavua banyunguluke mu bibambalu bakamona se: mudimu uvua wenzeka muaba eu anu bua dilongesha dia Nzambi. Tshimfuanyi tshia ku tshibuelelu tshia Tshilongelu tshia Gilada mu tshisasa (etaje) tshia kumpala tshia nzubu wa tshilongelu tshivua tshileja bumpianyi bua mushinga bua mu nyuma ne tshileja mianda ya katshia tshilongelu etshi tshiatuadija. Tshilongelu tshia Gilada tshikadi tshilongeshe balongi bapite pa 7 000 mudimu wa bu-misionere kubangila ku kalasa katshi ka kumpala mu 1943 mu lupangu luvua kumpalampala lua Iniversite kampanda mu South Lansing mu New York. Bimfuanyi bia mu tshisasa tshibidi tshia nzubu wa tshilongelu biakambuluisha bantu bua kumanya tshidi Kalasa ka bena mu Komite ya filiale ne Kalasa ka Batangidi bena-ngendu. Tulasa etu tuonso tubidi tutu tuenzekela mu nzubu eu. Katshia kalasa ka bena mu komite ya filiale katuadija mu ngondo wa Kasuabanga 1995, nkambuluishe bantu 360 ba mu matunga 106.

Pavuabu benda banyunguluka, bantu bakajingulula lukasa ne: bimfuanyi bivua too ne pa tshianana. Bakabuela diakamue mu bibambalu bishilangane, kutangilabu biro ne miaba mikuabu ya midimu, kujingululabu mu bule ne mu butshiama mudimu uvua wenzeka muaba eu. Tshiakatamba kulengelela bantu aba nnzubu wa midimu ya dikuata bande ya bisanji bia video. Nnzubu kayipu eyi bulenga anu bua kulongeshilanganamu Bible! Bimfuanyi bia bungi bidi bilongesha ne bitupa bia filme ya video biakambuluisha bantu bua kumanya mushindu utubu bakuata mêyi ku bande ne mushindu utubu bakuata filme ya video. Bakamanya tshitubu benza bua kupeta bintu bidi bikengedibua ne bilamba bia dinaya nabi drama. Bakamona se: dilengeja miaba ya dienzela drama kaditu ditudisha makuta a bungi eku kantu nansha kamue kakayi kashala. Bakadimuenena ne abu abidi mushindu utubu benza mudimu ne mijiki mu drama bua bantu badiumvue bu badi buobu bine mu dinaya didibu babandila. Kutuadija mu 1990, Société mmupatule filme dikumi ya video mu miakulu 41, mishindamene pa malu mashilangane a mu Bible, kusangisha ne filme ya video mikuabu ya badi benza mudimu ne Muakulu wa Misalu wa bena Amerike.

Bantu bavule bakanyunguluka mu bibambalu bakafika muaba wa Disukuila foto, ku Tshibambalu tshia Dizola bimfuanyi, ku Tshibambalu tshia Mamanyisha tshidi tshilongesha ne tshikuatshisha mu malu a ordinatere, ku Tshibambalu tshia Mudimu tshidi tshitangila mudimu wa bisumbu 11 242, wa batangidi bena-ngendu 572, Tshibambalu tshia Difundilangana mikanda mudibu bandamuna nkonko mitue ku 14 000 tshidimu tshionso. Bakakema bua makebulula atubu benza bua mikanda mifundilangana ne bua diditatshisha dilelela bua bantu bavua bela nkonko ayi; bionso ebi bidi bileja patoke se: badi benza mudimu mukole.

Bantu ba bungi bavua bendakana muntu’amu bakaya kumona Tshibambalu tshia Dikudimuna mikanda. Bakakatshila pakumvuabu ne: mu bidimu bitanu bishale, bakasakidila miakulu mikuabu 102 pa miakulu itu Société upatula mikanda idi yumvuija Bible. Pa buloba bujima, pa kumbusha muakulu wa Anglais, Bantemu ba Yehowa batue ku bantu 80 pa lukama badi babala mikanda ya Société mu miakulu yabu. Bua kukumbaja majinga abu, bena budisuile bapite pa 1 700 badi benza mudimu wa dikudimuna mikanda mu matunga 100. Kuvua bimfuanyi bia Tshibumba tshia Nsentedi mu miakulu ya mu matunga a mu Amerike, Europe, Asia ne mu Afrike. Bakamona Bible wa Traduction du monde nouveau mu miakulu 31 mukadibu bamupatule. Bakafika ku dimanya ne: mikanda idi Bantemu ba Yehowa bapatule idi mpindieu mu miakulu 332, ne se: broshire wa Ntshinyi tshidi Nzambi utulomba? ukadi mpindieu mupatula mu miakulu 219 ya ku mine eyi.

Pakelabu dikasa mu Tshibambalu tshia malu a Mikenji, bakabaleja bitupa bishilangane bia mudimu bivua bikengela ditabalela mu malu a mikenji pa buloba bujima. Mu filme kampanda wa video, bakamona mulumbuluidi umue wa Bantemu ba Yehowa ku kabadi ulumbulula bua dielangana mashi. Bakamanya kabidi tshitubu benza bua kakuikadi tshintu tshidi mua kuimanyika diyisha dia patoke dia lumu luimpe to. (Filipoi 1:7) Ntema yabu yakimanyina pa dipangadika diangata tshidimu etshi mu Luabanya kudi kabadi kakulu kampanda bua tshimenga tshia Oradell, mu New Jersey mu États-Unis kushintululatshi mikenji ne kubengela Bantemu ba Yehowa badi basue kuyisha patoke ku nzubu ne ku nzubu mu tshimenga etshi.

Ebi ki mbionso bivua bakumbudi bamone to. Bakamona bimfuanyi bia luibaku mu Ditanda mutubu benza bintu bia diibaka nabi nzubu, Nzubu wa miotere ya nzembu, Nzubu utubu belela manga mu mâyi bua kushipa tuîshi, ne bakendakana mu nzubu ya Ditatshila mâyi ne mu matanda makuabu a bungi menza bua kulama ne kulongolola bintu. Etshi tshivua tshikondo tshia pa buatshi.

Ndongamu wa dibanjija udi ulongesha malu a Nzambi

Ndongamu wa dibanjija eu wakatuadija mu Disatu dia 19 Lumungulu pa dîba inayi wa dilolo. Musumba wa bantu 6 929 bavua ne disanka pamue ne bena ku Betele ya mu États-Unis, bantu bavua Société mubikile ne bakuabu 372 bavua badisangishe ku filiale wa Canada kuvuabu bamuenena ndongamu eu ku ordinatere.

Bushuwa, bateleji bakasanka pa kumvua mêyi a musangelu a dibajingila nawu difika dilenga a kudi Muanetu Henschel, mulombodi wa Société Watch Tower. Pashishe Theodore Jaracz, muena mu Kasumbu Kaludiki ne mulombodi wa tshibilu etshi, wakashila William Malenfant tshikolokolo. Pavuaye uleja “Malu manene a Ndongamu wa Luibaku,” William wakela bana betu ba balume basatu nkonko, bavua benze midimu minene mu dilengeja dia mpangu, dienza dia plan ne dîbaka dia Muaba wa Tulasa tua Société Watchtower. Pavuabu batungunuke ne diela nkonko, bakumvuija ne: munkatshi mua bidimu bipitshisha mu mudimu eu wa diibaka, bana betu bapite pa 8 700 bakadifutshila njila bua kulua kuenza mudimu eu bua matuku mabadika. Ntshijadiki bulengapu kayi tshia buobumue ne kalolo bidi bifumina ku dilongesha dia Nzambi!

Pashishe bakenza muyuki mukosolola mu bitupa binayi uvua ne tshiena-bualu ne: “Dilongesha dia Nzambi pa buloba bujima.” Bakawenza kudi bena mu Kasumbu Kaludiki banayi. John Barr wakashindika ne: nshindamenu wa dilongesha dia Nzambi udi mu Bible, Dîyi dia Nzambi didi dikankamija bena Kristo bua ‘kukuama mamuma mu mudimu wonso muimpe, ne kudiundadiunda mu dimanya [dijalame, NW] dia Nzambi.’ (Kolosai 1:10) Daniel Sydlik wakaleja mudi dilongesha dia Nzambi dilongolola mu mushindu udi Nzambi wanyisha bituadijile kudi Yezu Kristo, mutu wa tshisumbu tshia bena Kristo too ne kuinshi kudi muena Kristo yonso udi pa buloba. (1 Kolinto 12:12-27) Bitupa bibidi bia ndekelu bia muyuki mukosolola eu bienza kudi Gerrit Lösch ne Carey Barber, biakaleja mudi dilongesha dia Nzambi diakaja basadidi bua kuyabu miaba yonso idi bantu basanganyibua ne kubalongesha bua kuendelabu pabu mu njila wa Nzambi.​—Yeshaya 2:1-4; 2 Kolinto 3:5.

Bua kuleja bateleji tulasa tushilangane tudi tuenzekela muaba eu, balongeshi ne bana betu bakuabu badi batangila luendu luatu bakelangana nkonko ne kuyikila ne bana betu bakuabu. Bakaleja mudimu wa kalasa ne kalasa mu dikumbaja programe wa dilongesha dia malu a Nzambi pa buloba bujima. Bakaleja ne: Tshilongelu tshia Gilada ntshimanyine pa dilonga dia mikanda yonso ya mu Bible, pa nsombelu wa matuku etu aa wa bantu ba Yehowa ne pa dilongolola dia mudimu wa bu-misionere. Kalasa ka batangidi ba filiale ndilonga dinene dia mu bule ne mu butshiama dia malu a bungi a mudimu udi utangila bena Komite ya filiale. Kalasa ka batangidi bena-ngendu ki nkalongolola anu bua kukumbaja majinga abu to, kadi mbua kubapaya kabidi ne bidibu bajinga mu nyuma bua kumonabu mua kuambuluisha nangananga bisumbu.

Bua kujikija tshibilu etshi tshilenga, Lloyd Barry muanetu wa mu Kasumbu Kaludiki wakenza muyuki wa dibanjija uvua ne tshiena-bualu ne: “Tuibakayi pamue ne Mufuki Wetu Munene.” Wakaleja ne: Mufuki wetu Yehowa udi usanka bua bionso biakafukaye ne udi utubikila bua tusanke pamue nende. (Yeshaya 65:18) Lumu luonso lua nzubu eyi idibu bibake luikale lua Yehowa Nzambi, bualu ‘wakibaka bintu bionso n’Nzambi.’ (Ebelu 3:4) Pakajikijaye kumvuija mêyi aa, ngamba-malu wakasambila ne muoyo umue, ushiya Tulasa tua Watchtower mu bianza bia Yehowa, Mufuki wetu Munene.a

Bushuwa, bantu bakabuela mu tshibilu etshi tshinene tshiakanenga lumingu lujima kabakutshipua muoyo nansha. Bua tshinyi kuenaku mua kudilongolola bua kuya kumona Muaba wa Tulasa tua Société Watchtower? Tudi bajadike ne: kukumbula ne kunyunguluka mu tulasa etu nebikukankamije bua kulonga malu mavule adi atangila Mufuki wetu wa dinanga ne kukukankamija bua kutumikila mêyi makane ende.

[Mêyi adi kuinshi]

[Bimfuanyi mu dibeji 10]

Nzubu wa bisangilu mupate ne bantu ne bakuabu bapite bungi mu nzubu wa tshidilu

[Bimfuanyi mu dibeji 10]

Dinyunguluka mu nzubu divua bualu bua disanka