Malu a mu nsombelu

Ndi ne disanka ne dianyisha nansha mundi ne kanyinganyinga kakole ka mundi mufuishe

MALONDA KUDI NANCY E. PORTER

Tuvua ku dilolo mu dia 5 Kabalashipu 1947, luya luvua lukole dituku adi mu bidiila bia Bahamas bidi ku Sud-Est kua États-Unis. Muntu mukuabu uvua wenza mudimu wa ditangila malu a bantu bavua babuela mu ditunga wakalua kututangila meme ne bayanyi George kayi nansha mututumina mukenji. Wakatupesha mukanda uvua wamba ne: kabavua basue bua tuetu kusomba kabidi mu bidiila ebi to, nanku tuvua ne bua “kumbuka diakamue muaba au!”

MEME ne George tuvua ba-misionere ba Bantemu ba Yehowa ba kumpala bakafika mu Nassau, tshimenga tshinene tshia mu Bahamas. Bakatutumamu patuakajikija kalasa ka muanda-mukulu ka Gilada (Tshilongelu tshia ba-misionere) tshidi ku Nord kua New York. Ntshinyi tshituvua benze tshibi bua kufikabu ku dituenzela bualu bua nunku kunyima kua ngondo isatu patupu? Ne ntshinyi tshivua tshienze bua meme kufika ku dishala muaba eu bidimu bipite pa 50 bijima?

Ndi ndonga mua kuyisha

Tatu wanyi, Harry Kilner, ke uvua muenze muende muonso mua kuenza bua meme kulua tshindi etshi. Wakatupesha tshilejilu tshilenga tshia kulonda bualu wakalekela bintu bia bungi, bionso ebi anu bua kuluaye Ntemu wa Yehowa. Nansha muvua anu mubidi wende luyowayowa kayi utamba kuendela kulu, ku ndekelu wa lumingu bu luonso uvua uya kuyisha, uvua ne lukunukunu, uteka malu a Bukalenge pa muaba wa kumpala. (Matayo 6:33) Katuvua ne makuta a bungi to, kadi magazen ende a bisabata avua muaba munene uvuaye wenzela mudimu wa mu nyuma mu tshimenga tshia Lethbridge, mu provense wa Alberta mu Canada, mu bidimu bia 1930. Ntshidi muvuluke mianda ya pavua bana betu Bantemu ba Yehowa bena mudimu ba ku dîba ne ku dîba (batudi tubikila lelu ne: bampanda-njila) balua kuetu, batulondela malu.

Mu 1943, ngakabanga bumpanda-njila lua pabuipi ne tshimenga tshia Fort Macleod ne tshia Claresholm, mu Alberta. Mutantshi eu bakakandika mudimu wetu wa kuyisha mu Canada, bionso ebi anu bua malu a dishima avua baluishi betu batutangalajile mu tshikondo tshia Mvita Mibidi ya Buloba bujima. Tshietu tshitupa tshituvua ne bua kuyishila tshivua tshipapu tshia kilometre 50, kadi kabivua bitutonda to bua kuya ku makalu anyi ku makasa mu misoko mikese ne ku madimi avua mu tshitupa atshi bualu tutshitshivua bansonga ne batshikale ne makanda mimpe. Mu tshikondo atshi, ngakapeta mushindu wa kuyikila ne bamue bana betu bavua bajikije mu Gilada, ne malu akandondelabu akanjula dijinga dia kulua misionere.

Mu 1945, tuakaselangana ne Georges Porter, wa mu Saskatchewan, mu Canada. Baledi bende bavua Bantemu ba lukunukunu katshia mu 1916, ne yeye pende wakasungula bua kuenza mudimu wa ku dîba ne ku dîba. Muaba wa kumpala wakatutumabu uvua mu Tshibandabanda tshilenga tshia Lynn Valley, ku Nord kua Vancouver, mu Canada. Katuyi banji kuenza nansha matuku, buobu e kutubikila ku Gilada.

Ntu muyikile ne bantu ba bungi bavua balonge mu tulasa tua teoloji munkatshi mua bidimu bia bungi, ne ntu mufike ku dimona bimpe ne: malu abu a teoloji avua manyange ditabuja diabu dia Nzambi ne dia Bible. Kadi, malu atuakalonga tuetu mu Gilada akalengeja ngelelu wetu wa meji ne akatamba kukolesha ditabuja dietu dia Nzambi ne Dîyi diende. Bakatuma balongi betu mu ditunga dia Chine, dia Singapour, dia Inde, mu matunga a mu Afrike, a mu Amerike wa ku Sud ne miaba mikuabu kabidi. Ntshidi muvuluke disanka dituvua nadi patuakumvua ne: bavua batutume mu bidiila bia Bahamas bia luya lukole.

Tshiakatuambuluisha bua kushalamu

Luendu luetu bua kufika mu bidiila bia Bahamas luvua lua matuku makese pa kulufuanyikija ne lua miaba ivua balongi betu bakuabu baye. Kunyima kua mutantshi mukese, tukavua bafike muaba eu wa luya, tumona muvua muulu ne mâyi bikale dikala dia mubidi wa bleu, nzubu mikale ne ampule ya mekala a mishindu ne mishindu, ne makalu bungi tshianana. Bualu buakatamba kunkemesha bikole mbua se: Bantemu batanu bavua batuindile patuakafika ne mazuwa. Tuakamanya musangu umue ne: bibidilu bia muaba eu bivua bishilangane bikole ne bia kuetu. Tshilejilu, bakambila bayanyi bua kikadi umbikila mu bantu ne: munanga wanyi bualu ke mutu mulume ubikila mukajende wa ndumba.

Panyima pa matuku makese, pamu’apa bua buôwa bua mutuvua tupetangana ne bantu kakuyi lutatu, balombodi ba bitendelelu bakatushiminyina malu bamba mutuvua Bakoministe. Bua malu aa, kututuminabu dîyi dia kumbuka mu ditunga. Kadi Bantemu (bavua dîba adi muinshi mua bantu 20 mu bidiila ebi) bakatuisha diakamue biala pa mikanda binunu ne binunu balomba bua tuetu kushalamu. Ke mushindu wakalekelabu tshilumbu tshia dituipata atshi.

Badi batutuma muaba mukuabu

Bulelela bua mu Bible buakakola ne lukasa mu mitshima ya bantu bavua banange Nzambi, ke tshivuabu batumine ba-misionere bapite bungi mu Bahamas. Pashishe mu 1950, bakasamu biro bia filiale. Kunyima kua bidimu dikumi, Milton Henschel wa ku biro bidibu balombuela mudimu wetu buloba bujima mu Brooklyn, New York, wakalua kututangila mu Bahamas, kukonkaye ba-misionere bua kumanya bikalaku kuvua uvua musue kuya kunzulula mudimu wa diyisha mu tshidiila tshikuabu tshia mu Bahamas. Meme ne George tuakitaba bua kuya, ke muakatuadijabi nanku ne tuetu kufika ku dienza bidimu 11 mu tshidiila etshi tshia Long Island.

Tshidiila etshi (tshimue tshia ku bidiila bivule bidi bienza Bahamas) tshidi ne kilometre 140 mu bule ne 6 mu butshiama, ne mu tshikondo atshi, kamuvua bimenga bia bushuwa to. Mu tshimenga tshikulu tshia Clarence muvua nzubu mitue ku 50. Nsombelu uvuamu uvua mushadile bikole bualu kamuvua nzembu, mâyi a ku milonda, anyi nzubu ya bikuku anyi mene milonda ya mâyi a mu nzubu to. Nenku tuvua ne bua kuibidilangana ne malu a mu tshidiila etshi tshitubu babikila ne: tshidiila tshia kule. Mu tshidiila etshi bantu batu batamba kuakula bua bukole bua mubidi be. Tuakadibela bua kubenga kuebeja muntu ne: “Udi mubike munyi lelu?” patuvua tumuela muoyo, bualu misangu ya bungi diandamuna divua muyuki mule wa malu onso a disama diende.

Tuvua tutamba kuyisha ku tshikuku ne ku tshikuku bualu pa tshibidilu tuvua tusangana bantu bipikila mu bikuku biabu bia pambelu bia tumitanda tua bisonsa ne kapia ka nkunyi kavua kalunduka mu matshiuwa. Bantu ba bungi ba mu misoko ayi bavua bapele, kadi bavua babidime ne balobi ba mishipa ba malu malenga. Ba bungi ba kudibu bavua basue malu a Nzambi bikole, eku kabidi basue malu a kabukulu bikole. Bavua bangata malu a dikema avua enzeka bu bimanyinu bia mianda kampanda milelela.

Balombodi ba bitendelelu kabavua bamona bu kuvua bualu pavuabu badiyila nkayabu ku nzubu ya bantu kabayi bamanye, ne bapanda mikanda ituvua babashile. Mushindu’eu ke uvuabu batshinyisha bena buôwa, kadi bantu bonso kabakabatshina nansha. Tshilejilu, mamu mukuabu wa bidimu 70 wa dikima wakabenga bua kumuenzejabu malu aa ku bukole. Uvua musue kudimanyina nkayende Bible, ne ndekelu wa bionso wakalua Ntemu wa Yehowa pamue ne bakuabu ba bungi. Patuvua tupeta bantu bavua ne nzala ya Dîyi dia Nzambi, George uvua wenza kilometre 300 ne mashinyi mu amue matuku a Dia lumingu bua kuambuluisha bantu aba bua kubuelabu mu bisangilu bietu.

Mu ngondo ya ku ntuadijilu pavuaku kakuyi banga Bantemu, meme ne George bubidi buetu tuvua tuenza bisangilu bionso bua kushala bakole mu nyuma. Tuvua kabidi ne programe muimpe wa dilonga tshibejibeji tshia Tshibumba tshia Nsentedi mu Dimue dionso ku dilolo ne tuvua tubala Bible. Tuvua kabidi tubala nimero yonso ya Tshibumba tshia Nsentedi ne Réveillez-vous! diakamue patuvua tuyipeta.

Tatu wakafua patuvua mu Long Island. Tshidimu tshiakalonda, mu 1963, tuakabikidisha Mamu bua alue kusombela muaba utuvua. Nansha mukavuaye ne bidimu bia bungi, wakibidilangana ne nsombelu wa mu Long Island ne kushalaye pende muomu too ne pakafuaye mu 1971. Lelu, mu Long Island mudi tshisumbu tshia Bantemu ba Yehowa ne Nzubu wa Bukalenge mupiamupia.

Lutatu luakampesha kanyinganyinga kakole

Mu 1980, George wakamona ne: mubidi wende wakatuadija kunyanguka. Ke dîba dingakatuadija kumona malu a tunyinganyinga tua katshia bandela: kumona bayanyi munanga, muenzejanganyi nanyi wa mudimu ne mulunda wanyi upeta disama dia Alzheimer ditu dijimija lungenyi lua muntu. Bumuntu buende buonso buakashintuluka. Tshikondo tshia disama diende tshia ndekelu tshiakatamba kumutekesha tshiakenza bidimu bitue ku binayi kumpala kua lufu luende mu 1987. Tuvua tuya nende mu buambi ne mu bisangilu matuku avuaye ne ka-bukole, nansha muvuabi bindidisha bua kumona muvuaye udikankamika. Nansha mudi dinanga dikole dia bana betu bena Kristo dinsambe, ntu anu mmujinga bikole be.

Bumue bua ku malu a mushinga mukole a mu dibaka dianyi ne George buvua bua se: tuvua tuyukidilangana malu bimpe. Mpindieu udi George katshiyiku eu, ndi ne dianyisha dia bungi bua mudi Yehowa wambila basadidi bende bua ‘basambile dîba dionso,’ bua ‘bananukile mu disambila,’ ne “kulomba kuonso.” (1 Tesalonike 5:17; Lomo 12:12, MMM; Efeso 6:18) Kumanya ne: Yehowa mmusue bua tuikale bimpe kudi kunkolesha be. Ndi ngumvua anu muvua mufundi wa Misambu wakimba ne: ‘Mukalenge avudijibue disanka, udi ututuadila bujitu buetu ku dituku ku dituku.’ (Musambu 68:19) Kubenga kuditatshisha bua makelela, kuitaba ne: ndi ne malu andi tshiyi mua kuenza, ne kuikala ne dianyisha bua malu malenga andi mpeta dituku dionso anu muakatubela Yezu ke nsombelu mutambe buimpe udiku.​—Matayo 6:34.

Masanka andi mupete mu mudimu

Kuenza mudimu wetu wa bena Kristo bikole nkungambuluishe bua kubenga kutamba kuela meji ku malu akadi mapite. Ke tshidi tshimpeshe mushindu wa kulekela tunyinganyinga tudi mua kumfikisha ku dibungama dikole. Kulongesha bakuabu bulelela budi mu Bible nkumpeteshe disanka dia bungi. Nkumpeshe tshibidilu tshimpe tshia malu a mu nyuma tshidi tshingambuluisha bua kuikala ne nsombelu mulongame ne mushindame.​—Filipoi 3:16.

Dimue dituku, bakambikila ku telefone kudi muntu mukaji mukuabu umvua muyishe mukenji wa Bukalenge kukadi kupita bidimu bitue ku 47. Uvua muana wa umue wa ku bantu ba kumpala batuakalongesha Bible patuakafika mu Bahamas mu 1947. Tatuende, mamuende ne bana babu bonso ba balume ne ba bakaji bakalua Bantemu ba Yehowa, nansha bana babu balela ne bikulu babu ba bungi bakalua pabu Bantemu. Mmumue ne: bantu bapite pa 60 ba mu dîku edi m’Bantemu. Kadi yeye kavua muanji kuitaba bulelela bua mu Bible to. Kadi pakambikilaye apu, ukavua pabuipi ne kulua musadidi wa Yehowa Nzambi. Ndisanka kayipu dituvua nadi meme ne George bua kumona Bantemu bakese bavua mu Bahamas patuakafikamu bavula bapita too ne pa bantu 1 400!

Imue misangu bantu batu bangebeja ni ntu nyingalala bua mundi tshiyi mulele bana. Bushuwa, kulela kudi mua kuikala dibenesha. Kadi dinanga didibu bannange kudi bana banyi, bikulu ne bikulu ba bana banyi ba mu nyuma pamu’apa ntshintu tshidi baledi bonso badi balele bana ba mu mubidi kabayi bapeta. Bulelela, bantu badi ‘benzela bakuabu bimpe,’ ne badi ne ‘bubanji bua bienzedi bimpe’ ke badi ne disanka dia bungi. (1 Timote 6:18) Ke bualu kayi ndi ntungunuka ne kuenza mudimu wa buambi bilondeshile mudi bukole buanyi bua mubidi mpindieu.

Dimue dituku pamvua muye kua munganga wa mênu, nsongakaji mukuabu wakasemena pabuipi nanyi e kungambila ne: “Wewe kuena mummanye meme to, kadi meme ndi mukumanye; ne mvua anu musue kukuambila ne: ndi mukunange.” Yeye kundondela muvuaye mufike ku dimanya bulelela bua mu Bible ne muvuaye ne dianyisha dia bungi bua mutuvua tuetu ba-misionere balue mu Bahamas.

Musangu mukuabu pangakafuma mu dikisha, ngakasangana tshilongo tshia roze mu tshiibi tshianyi ku Betele wa mu Nassau kundi musombele mpindieu. Tshivua ne kakanda kafunda ne: “Tudi ne disanka bua muudi mupingane.” Mutshima wanyi mmûle tente ne dianyisha ne udi unsaka bua kunanga Yehowa bikole pandi mmona bantu badi bashintuluke ku diambuluisha dia Dîyi diende, bulongolodi buende ne nyuma wende. Bulelela, Yehowa udi utukuatshisha ku diambuluisha dia bana betu.

Ndi ne dianyisha dipite bungi

Nsombelu wanyi katuku muanji kuikala mupepele to, nansha malu andi nawu mpindieu ki mmapepele nansha. Kadi ndi ne malu a bungi andi ne bua kuikadila ne dianyisha: masanka andi mupete mu mudimu, dinanga dia bana betu ba bakaji ne ba balume ba bungi, mushindu udi bulongolodi bua Yehowa bungambuluisha ne dinanga dionso, bulelela bua mu Bible budi ne malu malenga, ditekemena dia kumonangana ne bananga banyi pabikabu ku lufu, ne malu andi muvuluke a mu bidimu 42 bia dibaka dianyi ne musadidi wa lulamatu wa Yehowa. Kumpala kua tuetu kuselangana, ngakalomba Nzambi bua se: dîba dionso ngambuluishe bayanyi bua ashale mu mudimu wa ku dîba ne ku dîba, uvuaye munange bikole. Yehowa wakandamuna disambila adi. Nenku ndi musue kusakidila Yehowa, ne kushala anu mumulamate.

Bahamas mmuaba utu bantu ba bungi basue kuya kuendakana, batu batula mfranga mipite bungi bua kuluamu ne kumona malu malenga a muaba eu. Bu mundi musungule bua kusadila Yehowa muaba wonso udi bulongolodi buende buntuma, mvua mupete diakalenga dia kuenza ngendu kumbukila ku ditengu dimue dia bidiila ebi too ne ku dikuabu, ngenda manyisha lumu luimpe lua Bukalenge bua Nzambi. Kadi bualu bua mushinga wa bungi mbua se: ndi mufike ku dimanya ne ku dianyisha dinanga didi nadi balunda ba malu malenga ba mu Bahamas.

Ndi ne dianyisha dia bungi kudi bantu bakamanyisha baledi banyi bulelela, bakampesha panyi dijinga dikole dia kukeba diambedi Bukalenge bua Nzambi. Lelu bansonga badi basadila Yehowa badi pabu mua kupeta mabenesha a bungi buobu babuele ku “tshibi tshinene” tshidi tshipetesha mishindu kabukabu ya kuenza mudimu wa bungi. (1 Kolinto 16:9) Wewe pebe newikale ne dianyisha dia bungi biwadifila mu ditumbisha Yehowa “Nzambi wa nzambi.”​—Dutelonome 10:17; Danyele 2:47.

[Tshimfuanyi mu dibeji 24]

Ndi nyisha mu njila wa mu Victoria, mu 1944

[Tshimfuanyi mu dibeji 24]

Meme ne George tuakabuela mu Tshilongelu tshia Gilada mu 1946

[Tshimfuanyi mu dibeji 25]

Meme ne George kumpala kua nzubu wa ba-misionere mu Nassau, mu Bahamas, mu 1955

[Tshimfuanyi mu dibeji 26]

Nzubu wa ba-misionere mu Deadman’s Cay, mutuakasadila kumbukila mu 1961 too ne mu 1972