Butoke bua kudi Nzambi budi bumbusha mîdima!
‘Yehowa neantokeshile mîdima yanyi.’—2 SAMUELE 22:29.
1. Mmushindu kayi udi butoke bumvuangana ne muoyo?
‘NZAMBI wakamba ne: Munya wikale, ne munya wakikala.’ (Genese 1:3) Mêyi a mushinga aa adi akula bua bufuki a mu Genese adi aleja ne: Yehowa ke mpokolo wa butoke budi buambuluisha bantu ne bintu bua kuikala ne muoyo pa buloba apa. Yehowa udi kabidi mpokolo wa butoke bua mu nyuma budi butuambuluisha bikole bua kutuleja njila wa kulonda mu nsombelu wetu. (Misambu 43:3) Mukalenge Davidi wakaleja diumvuangana dinene didi pankatshi pa butoke bua mu nyuma ne muoyo pakafundaye ne: ‘Kûdi wewe kudi mushimi wa mâyi a muoyo; mu [butoke] buebe, tudi tumona [butoke].’—Misambu 36:9.
2. Bilondeshile mêyi a Paulo, butoke budi butamba kuenda pamue ne tshinyi?
2 Kunyima kua bidimu bitue ku 1 000 bimane kupita katshia ku tshikondo tshia Davidi, mupostolo Paulo wakakula bua malu a bufuki. Wakafundila tshisumbu tshia bena Kristo ba mu Kolinto wamba ne: ‘Nzambi nguakamba ne: Munya neuteme mu mîdima.’ Pashishe Paulo kulua kuleja ne: butoke bua mu nyuma budi butamba kuenda pamue ne dimanya dia kudi Yehowa pakambaye kabidi bua Nzambi ne: ‘Yeye wakatema mu mitshima yetu bua kutupa dinkenka dia [dimanya] dia butumbi dia Nzambi pa mpala pa Yezu Kristo.’ (2 Kolinto 4:6) Butoke ebu budi bufika kutudi mushindu kayi?
Bible mmukanda udi ufila butoke
3. Mbutoke kayi budi Yehowa utupesha mu Bible?
3 Yehowa udi utupeshila butoke bua mu nyuma tshia kumpala mu Bible, Dîyi didiye mufundishe ku nyuma wende. Nanku patudi tulonga Bible ne tupeta dimanya dia kudi Nzambi, tudi tupesha butoke buende mpunga bua kututokeshilabu njila. Mu Bible ke mudi Yehowa utumvuija malu enzaye ne utuleja mushindu utudi mua kuenza disua diende. Malu aa adi atuleja mushinga udi nawu muoyo wetu ne atuambuluisha bua kukumbaja majinga etu a mu nyuma. (Muambi 12:1; Matayo 5:3) Yezu wakaleja ne: tudi ne bua kuditatshisha bua majinga etu a mu nyuma pakatelaye mêyi a mu Mikenji ya Mose wamba ne: ‘Bakafunda dîyi ne: Muntu kikadi biende ne muoyo bualu bua bidia nkayabi, ikale biende nawu bualu bua mêyi onso adi alopoka mukana mua Nzambi.’—Matayo 4:4; Dutelonome 8:3.
4. Mmushindu kayi udi Yezu muikale “butoke bua bena panu”?
4 Bible udi ubikila Yezu ne: mbutoke bua mu nyuma. Bushuwa, yeye nkayende wakadibikila ne: udi “butoke bua bena panu,” kuambaye ne: “Udi undonda, kakuenda mu midima, kadi neapete butoke bua muoyo.” (Yone 8:12, MMM) Mêyi aa adi atuambuluisha bua kumvua mudimu mutambe bunene udi nawu Yezu wa kufikisha bulelela bua Yehowa kudi bukua-bantu. Tuetu basue kuepuka mîdima bua kuenda mu butoke bua Nzambi, tudi ne bua kuteleja malu onso adi Yezu utuambila ne kulonda tshilejilu tshiende ne malongesha ende bimpe menemene anu mudibi bileja mu Bible.
5. Mmudimu kayi uvua nawu balongi ba Yezu panyima pa lufu luende?
5 Musangu mukuabu wakadibikila Yezu ne: mbutoke, wakambila bayidi bende matuku makese kumpala kua kufuaye ne: “Butoke butshidi munkatshi muenu anu bua katupa kakese. Endayi panutshidi ne butoke apa, bua midima kayivu kunujikila. Muntu udi wenda mu midima kena mumanye kudiye uya. Itabayi butoke panutshidi ne butoke, nenku, nenuikale bana ba butoke.” (Yone 12:35, 36, MMM) Bantu bakalua bana ba butoke bakalonga ‘tshidikijilu tshia mêyi malenga’ a mu Bible. (2 Timote 1:13, 14) Pashishe kubangabu kulongesha bantu bakuabu bavua basue malu mimpe mêyi malenga aa bua kubapatula mu mîdima ne kubabueja mu butoke bua Nzambi.
6. Mbulelela kayi bua mushinga budibu baleje mu 1 Yone 1:5 bua bidi bitangila butoke ne mîdima?
6 Mupostolo Yone wakafunda ne: “[Nzambi] udi butoke, munda muende kamuena midima.” (1 Yone 1:5, MMM) Mona dishilangana didi muaba eu pankatshi pa butoke ne mîdima. Butoke bua mu nyuma budi bufumina kudi Yehowa, kadi mîdima ya mu nyuma kayena mua kuikala kudiye nansha. Kadi mîdima eyi idi ifumina kudi nganyi?
Kudi mîdima ya mu nyuma ifumina
7. Mîdima ya mu nyuma idi pa buloba idi ifumina kudi nganyi, ne mbukole kayi budiye nabu?
7 Mupostolo Paulo wakakula bua “nzambi wa tshikondo etshi.” Uvua wakula bua Satana Diabolo pakambaye mêyi aa. Wakamba kabidi ne: nzambi eu ‘mmufofomije mêsu a meji a badi kabayi bitabuja, bua dinkenka dia lumu luimpe lua butumbi bua Kristo udi tshifuanyikiji tshia Nzambi kaditemi kudibo.’ (2 Kolinto 4:4) Bantu ba bungi badi bamba mudibu bitaba ne: Nzambi udiku; kadi bavule ba munkatshi muabu kabatu bitaba ne: Diabolo utuku to. Bua tshinyi? Bualu ki mbasue kuitaba bua se: kudi bukole kampanda bubi budi bupite bua bantu budi mua kunyanga meji abu to. Kadi anu mudi Paulo muleje, Diabolo utuku menemene, ne udi upangisha bantu bua kumona butoke bua bulelela. Bukole budi Satana nabu bua kunyanga meji a bantu budi bumuenekela mu mêyi a tshiprofete adi akula bualu buende ne: ‘Mmudingi wa ba pa buloba bonso.’ (Buakabuluibua 12:9) Malu akamanyisha muprofete Yeshaya adi mpindieu akumbanyina bantu bonso (pa kumusha anu badi basadila Yehowa), bua kuleja tshipeta tshia midimu ya Satana. Yeshaya wakamba ne: “Mona, mîdima neyibuikile buloba, ne mîdima mifike-fitutû neyibuikile bantu.”—Yeshaya 60:2.
8. Mmalu kayi adi aleja ne: bantu badi mu mîdima ya mu nyuma badi ne tshinyingunyingu?
8 Muntu yeye mu mîdima mikole kêna mua kumona tshintu to. Udi mua kupanga kudiye uya peshi kubanga kumvua tshinyingunyingu. Bia muomumue, bantu badi mu mîdima ya mu nyuma kabena bamona to, nunku badi ne tshinyingunyingu tshia mu nyuma. Badi mua kupangila mua kutapulula bulelela ne mashimi, nansha bualu buimpe ne bubi. Muprofete Yeshaya wakakula bua bantu badi mu mîdima ya nunku pakafundaye ne: ‘Mulawu wikale kudi badi babikila bualu bubi ne: Mbualu buakane, ne bualu buakane ne: Mbubi; badi babala mîdima bu [butoke], babala [butoke] bu mîdima; badi babala bintu bia bululu bu bintu bisheme ne bintu bidi bisheme bu bintu bia bululu.’ (Yeshaya 5:20) Bantu badi mu mîdima ya mu nyuma badi babenzeja malu kudi Satana Diabolo udi nzambi wa mîdima; ke bualu kayi badi kule ne mpokolo wa butoke ne wa muoyo.—Efeso 4:17-19.
Lutatu lua kupatuka mu mîdima bua kubuela mu butoke
9. Umvuija mushindu udi benji ba malu mabi basue mîdima yetu milelela eyi ne mîdima ya mu nyuma kabidi.
9 Yobo muena lulamatu wakaleja mushindu udi benji ba malu mabi basue mîdima yetu milelela eyi pakambaye ne: ‘Mêsu a muena masandi adi indila kajimb’a buenyi, yeye udi wamba ne: Kakuena dîsu dilualua kummona. Udi usokoka mpala wende ne tshilulu tshikudika.’ (Yobo 24:15) Benji ba malu mabi badi kabidi mu mîdima ya mu nyuma, ne mîdima eyi idi mua kubatekesha tshiendelele. Mupostolo Paulo wakamba ne: tshiendenda tshia masandi, buivi, lukuka, dikuatshika dia maluvu, dipendangana ne dinyengangana dia bintu mmalu adi matangalake munkatshi mua badi bakuatshike mu buteyi bua mîdima eyi. Kadi bantu bonso badi balua ku butoke bua Dîyi dia Nzambi badi mua kushintuluka. Paulo udi uleja patoke mu mukanda wende wakafundilaye bena Kolinto ne: kudi mushindu wa muntu kushintuluka. Bena Kristo ba mu Kolinto ba bungi bavua kumpala ne tshilele tshia kuenza malu a mîdima, kadi Paulo wakabambila ne: ‘Kadi nuakuvuibua, nuakajidibua, nuakabingishibua mu dîna dia Mukalenge Yezu Kristo ne mu nyuma wa Nzambi wetu.’—1 Kolinto 6:9-11.
10, 11. (a) Mmunyi muakaleja Yezu ne: uvua muangate muntu uvuaye mutabaje mêsu ne mushinga? (b) Bua tshinyi bantu bavule ki mbasue butoke?
10 Padi muntu upatuka mu mîdima mikole ubuela mu butoke, mêsu ende adi mua kuanji kukenga mutantshi bua yeye kushisha kuibidilangana ne bukenke. Mu Bete-saîda, Yezu wakatabaja mpofu mukuabu, kadi wakamuondopa ku kakese ku kakese. ‘Wakakuata mufofo ku tshianza tshiende, wakalopoka nende mu musoko; pakamutuilaye lute mu mêsu ende, wakamulenga bianza, wakamukonka ne: Udi umona tshintu anyi? Pakatangila mufofo mulu, wakamba ne: Ndi ntangila bantu; ndi mbamona benda bu mitshi. Wakamulenga bianza ku mêsu ende tshiakabidi; mufofo wakatangila talalâ, wakatabala kabidi, wakamona bintu bionso bimpe.’ (Mâko 8:23-25) Bidi bimueneka ne: Yezu wakatabaja mêsu a muntu eu ku kakese ku kakese bua se: muntu eu amone mua kuibidilangana ne bukenke bua dîba. Elabi meji bua disanka divua muntu au mua kuikala nadi pakabangaye kumona!
11 Bushuwa, disanka diakapeta muntu au mbadipite kudi disanka dia bantu badibu bambuluishe ku kakese ku kakese bua kupatuka mu mîdima ya mu nyuma ne kubuela mu butoke bua bulelela. Patudi tumona disanka didibu nadi, tudi mua kudiebeja tshidi bantu bakuabu bavule kabayi banyishila butoke. Yezu udi ufila diandamuna ne: ‘Etshi ntshilumbu tshia bantu ne: [Butoke] buakalua pa buloba, kadi bantu bakasua mîdima, kabakasua [butoke], bua bienzedi biabu biakadi bibi. Muntu yonso utu wenza malu mabi katu wasua [butoke], kêna ulua mu [butoke] bua bienzedi biende kabimanyibu.’ (Yone 3:19, 20) Bushuwa, bantu ba bungi mbasue kuenza “malu mabi” bu mudi tshiendenda, dikengeshangana, dishima, dîbila ne buivi, nunku mîdima ya mu nyuma ya Satana ke wabu muaba mukumbane wa kuenzela bionso bidibu basue.
Tudiundayi mu butoke
12. Dibuela dietu dia mu butoke ndituambuluishe mu malu kayi?
12 Katshia tuapeta dimanya dia butoke, tukadi bashintulukaku mu malu kayi? Bitu bimpe imue misangu kuanji kuimana bua kutangilaku ni tukadi bakole mu nyuma. Mbibidilu kayi bibi bitudi balekele? Mmalu kayi a mu nsombelu wetu atudi bafike ku diakaja? Mmushindu kayi utudi bashintulule bipatshila bituvua nabi bua matuku adi kumpala? Ku bukole bua Yehowa ne ku diambuluisha dia nyuma wende munsantu, tudi mua kutungunuka ne kushintulula bumuntu buetu ne ngelelu wetu wa meji, malu adi aleja ne: tudi tuanyisha butoke. (Efeso 4:23, 24) Paulo udi ubiumvuija ne: “Kale, nuvua mu midima, kadi mpindieu nudi mu butoke, badisange ne Mfumu, bualu tshimuma tshia butoke mmalu mimpe onso, buakane ne bulelela.” (Efeso 5:8, 9, MMM) Kuitaba bua butoke bua Yehowa butulombole kudi kutupetesha ditekemena ne tshitudi ne bua kuipatshila patudi ne muoyo, ne kudi kusankisha kabidi bantu bakuabu batudi nabu. Ne patudi tushintuluka mushindu’eu bidi bisankisha mutshima wa Yehowa bikole be!—Nsumuinu 27:11.
13. Mmunyi mutudi mua kuleja dianyisha dietu bua butoke bua Yehowa, ne bidi bikengela tshinyi bua tuetu kuenza nanku?
13 Tudi tuleja dianyisha dietu bua nsombelu muimpe menemene utudi nende patudi tukenka ne butoke bua Yehowa, mbuena kuamba ne: kumanyisha balela betu, balunda ne bena mutumba netu malu atudi balonge mu Bible. (Matayo 5:12-16; 24:14) Bua bantu badi babenga kuteleja, diyisha dietu ne nsombelu wetu wa tshitembu wa bena Kristo bidi bibatuisha. Paulo udi umvuija ne: “Nusunguluje tshidi tshilengelela Mfumu, kanuenji malu a patupu a midima, kadi nuadiwule patoke.” (Efeso 5:10, 11, MMM) Bidi pamu’apa mua kutukengela dikima bua kumona mua kuambuluisha bantu bakuabu bua kulekelabu mîdima bua kulonda butoke. Tshidi ne mushinga menemene ntshia se: bidi bikengela kuikala ne muoyo wa luse ne wa diditatshisha bua bakuabu ne dijinga dikole dia kubamanyisha butoke bua bulelela bua kupetabu masanka a tshiendelele.—Matayo 28:19, 20.
Dimukila butoke budi budingangana!
14. Ndidimuija kayi ditudi ne bua kuteleja bua bidi bitangila butoke?
14 Bantu badi mu mazuwa a mâyi mêba a butuku batu basanka padibu bamona butoke. Pa kale, bavua batemesha midilu pa mabue manene a ku mielelu ya mâyi mu Angleterre bua kuleja bena mazuwa a mâyi miaba ivuabu mua kupengamina dîba dia tshipepele tshikole. Bendeshi ba mazuwa bavua ne dianyisha pavua midilu eyi ibambuluisha bua kufika mu bitudilu bimpe. Kadi imue midilu ivua idingangana. Pamutu pa kufika mu tshitudilu, mazuwa a bungi avua apambuka akadikuma ku mabue a ku bibungubungu bia mâyi wowu kunyanguka, nunku bivi bakafika ku diba ne bintu bivuamu. Mu buloba ebu mudi bantu bashimangana, tudi ne bua kudimuka bua kabatupambuishi kudi butoke budi budingangana budi mua kutufikisha ku njiwu ya mu nyuma. Badi batudimuija ne: ‘Satana mene udi udiandamuna bu muanjelo wa [butoke].’ Bia muomumue, basadidi bende, pamue ne batontolodi, ‘mbena mudimu ba mashimi’ badi ‘badiandamuna bu [basadidi] ba malu makane.’ Tuetu bikale tuitaba ngenyi mibi ya bantu aba, dieyemena dietu dia Bible udi Dîyi dia Yehowa dia bulelela didi mua kuteketa, ne ditabuja dietu didi mua kuatuka.—2 Kolinto 11:13-15; 1 Timote 1:19.
15. Ntshinyi tshiatuambuluisha bua kushala mu njila wa ku muoyo?
15 Mufundi wa Misambu wakafunda ne: “Diyi diebe didi bu muendu ku makasa anyi, bu butoke budi buntokeshila njila.” (Misambu 119:105, Mukanda wa Mvidi Mukulu [Mishonyi, MMV]) Bulelela, ‘njila wa ku muoyo udi mubumbakane’ mmutokesha bimpe kudi Yehowa Nzambi wetu wa dinanga “udi musue bantu bonso basungidibue, bafike ku dimanya dia malu malelela.” (Matayo 7:14; 1 Timote 2:4) Kutumikila kua mikenji ya mu Bible nekutukube bua katumbuki mu njila mubumbakane eu bua kubuela mu njila ya mîdima. Paulo wakafunda ne: ‘Dîyi dionso dia mu Mukanda wa Nzambi didi difume kudi Nzambi bu mupuya wende, ne didi ne mudimu muimpe wa kuyisha bantu, ne wa kubabela, ne wa [kululamija malu], ne wa kubalongesha mu buakane bua Nzambi.’ (2 Timote 3:16) Tudi tukola mu nyuma padi Dîyi dia Nzambi dituyisha. Tudi mua kudibela tuetu bine ne Dîyi dia Nzambi, anyi kutubelabu kudi balami ba dinanga badi mu tshisumbu padibi bikengedibua. Bia muomumue, tudi mua kululamija malu ne kuitaba ne budipuekeshi buonso dilongesha didibu batupesha mu buakane bua tuetu kutungunuka mu njila wa ku muoyo.
Endela mu butoke ne dianyisha
16. Mmunyi mutudi mua kuleja dianyisha bua butoke bua dikema budi Yehowa mutupeshe?
16 Mmunyi mutudi mua kuleja dianyisha bua butoke bua dikema budi Yehowa mutupeshe? Yone nshapita wa 9 udi utuambila ne: pavua Yezu muondope muntu uvua muledibue mpofo, muntu au wakaleja dianyisha diende. Mushindu kayi? Wakitabuja Yezu bu Muana wa Nzambi, kumubikilaye ne: ‘mmuprofete.’ Kabidi, wakakula ne dikima upisha bantu bavua bajinga kupepeja tshishima tshivua Yezu muenze etshi. (Yone 9:17, 30-34) Mupostolo Petelo udi ubikila bela manyi badi mu tshisumbu tshia bena Kristo ne: “bantu balongolola bua kuikalabu bumpianyi bua pa buabu.” Mbua tshinyi? Bualu badi ne dianyisha, ngikadilu wa muomumue ne wa muntu uvuabu balele mufofo wakalua Yezu kuondopa. Badi baleja dianyisha diabu kudi Yehowa Mubenzedi wa bimpe padibu ‘bamanyisha ngikadilu milenga ya eu udi mubapatule mu mîdima bua kubabueja mu butoke buende bua dikema.’ (1 Petelo 2:9, NW; Kolosai 1:13) Bantu badi ne ditekemena dia kupiana muoyo pa buloba badi ne ngikadilu wa muomumue eu, ne badi bakuatshisha bana babu bela manyi mu mudimu wa dimanyisha bantu “ngikadilu milenga” ya Yehowa. Ndiakalengapu kayi bunene nunku didi Nzambi upesha bantu bapange bupuangane!
17, 18. (a) Ndibanza kayi didi nadi muntu yonso? (b) Bua kumona mua kuidikija Timote, ntshinyi tshidi muena Kristo yonso ne bua kuepuka?
17 Kuikala ne dianyisha dia muoyo mujima bua butoke bua bulelela kudi ne mushinga wa bungi. Umanye ne: kakuena muntu wa munkatshi muetu uvuabu balele mumanye bulelela. Bamue badi babulonga ku bukulumpe, bafika ne lukasa luonso ku dijingulula ne: butoke ebu mbupite mîdima. Kadi bakuabu badi ne diakalenga dinene dia kubakoleshabu kudi baledi badi batshina Nzambi. Buabu buobu, bidi mua kuikala bipepele bua kupepeja butoke ebu. Muanetu mukuabu wa bakaji Ntemu muena baledi bakavua basadila Yehowa kumpala kua yeye kuledibua udi wamba ne: biakamulomba matuku a bungi ne didienzeja bikole bua kufikaye ku dijingulula mudimu ne mushinga udi nawu malu malelela a mu Bible akamulongeshabu katshia ku buana buende. (2 Timote 3:15) Tuetu bonso, bana ne bakulumpe, yonso wa kutudi udi ne dibanza dia kuikala ne mutshima wa dianyisha divule bua bulelela budi Yehowa mutusokoluele.
18 Timote uvua nsonga uvuabu balongeshe “Mukanda wa Nzambi” kubangila anu ku buana, kadi anu didifila mu mudimu wende ke diakamuambuluisha bua kulua muena Kristo mukole mu nyuma. (2 Timote 3:15) Ke pakashishaye kukumbana bua kuikala wambuluisha mupostolo Paulo wakamubela ne: “Udikoleshe mua kumueneka ku mesu kua [Nzambi] bu muntu muanyishibue, bu muena mudimu udi kayi mua kukuatshika bundu bua mudimu wende, udi umanyisha dîyi dia bulelela menemene.” Anu bu Timote, tuetu bonso tuepukayi dienza malu adi mua kutufuisha bundu, anyi atudi mua kufuisha nawu Yehowa bundu!—2 Timote 2:15, Muanda Mulenga Lelu.
19. (a) Ntshinyi tshitudi tuetu bonso mua kuamba bu muakamba Davidi? (b) Mbualu kayi butualonga mu tshiena-bualu tshidi tshilonda?
19 Tudi ne malu a bungi adi mua kutusaka bua kutumbisha Yehowa, Nzambi wakatupesha butoke bua bulelela buende. Tudi tuamba anu muakamba Mukalenge Davidi ne: ‘Wewe Yehowa, udi muinda wanyi; Yehowa neantokeshile mîdima yanyi.’ (2 Samuele 22:29) Kadi, katuena mua kuamba ne: kuetu nkumane kujika to, bualu bidi mua kutufikisha ku dipingana kabidi mu mîdima mukavuabu batupatule. Nunku, tshiena-bualu tshidi tshilonda netshituambuluishe bua kumanya mushinga utudi tuangata nawu bulelela bua mu Bible mu nsombelu wetu.
Mmalu kayi atudi balonge?
• Mmushindu kayi udi Yehowa ufila butoke bua mu nyuma?
• Ndutatu kayi ludi mîdima ya mu nyuma idi pa buloba ikebesha?
• Nnjiwu kayi itudi ne bua kuepuka?
• Mmunyi mutudi mua kuleja dianyisha bua butoke bua bulelela?
[Tshimfuanyi mu dibeji 8]
Yehowa udi mpokolo wa butoke buena dîna ne wa butoke bua mu nyuma
[Tshimfuanyi mu dibeji 10]
Yezu udi utuambuluisha bua kupatuka mu mîdima ya mu nyuma anu bu muakuondopaye mufofo ku kakese ku kakese
[Tshimfuanyi mu dibeji 11]
Butoke bua dishima bua Satana budi bupambuishangana ne bufikisha bantu ku njiwu ya mu nyuma