Bena Kristo badi kabayi babuelakana mu malu a panu mu matuku a ku nshikidilu
‘Bobu kabena ba pa buloba, bu mundi meme tshiyi wa pa buloba.’—YONE 17:16.
1, 2. Ntshinyi tshiakamba Yezu bua malanda a bayidi bende ne ba pa buloba, ne nnkonko kayi idi mêyi ende ajudija?
BUTUKU bua muladilu wa lufu lua Yezu muntu mupuangane, wakenza disambila dile mu matshi a bayidi bende. Mu disambila adi, wakamba bualu kampanda budi bumvuija nsombelu wa bena Kristo balelela bonso. Wakamba bua bayidi bende ne: ‘Ngakubapa dîyi diebe, ba pa buloba badi nabu lukuna, bualu bua bobu kabena ba pa buloba, bu mundi meme tshiyi wa pa buloba. Tshiena nkulomba ne: ubumushe pa buloba; ndi nkulomba ne: ubasungile kudi mubi. Bobu kabena ba pa buloba, bu mundi meme tshiyi wa pa buloba.’—Yone 17:14-16.
2 Misangu ibidi mijima Yezu wakamba ne: bayidi bende kabavua ne bua kuikala ba pa buloba to. Kabidi, ditapuluka ne ba pa buloba edi divua ne bua kujudija ndululu, mbuena kuamba ne: ba pa buloba bavua ne bua kubakina. Kadi bena Kristo kabena ne bua kuteketa mu mikolo to; Yehowa neabatabalele. (Nsumuinu 18:10; Matayo 24:9, 13) Bilondeshile mêyi a Yezu, tudi mua kudiebeja ne: ‘Bua tshinyi bena Kristo balelela kabena ba pa buloba? Kubenga kuikala ba pa buloba kudi kumvuija tshinyi? Bikala ba pa buloba bakine bena Kristo, mmushindu kayi udi bena Kristo buobu bangata ba pa buloba? Mmunyi mudibu nangananga bangata makalenge a pa buloba?’ Mandamuna a nkonko eyi a mu Mukanda wa Nzambi adi ne mushinga bualu adi atutangila tuetu bonso.
“Tudi ba Nzambi”
3. (a) Ntshinyi tshidi tshitutapulula ne ba pa buloba? (b) Mmalu kayi adi aleja ne: bena panu badi “ku bukokeshi bua mubi”?
3 Malanda mashême atudi badie ne Yehowa adi mikale bumue bualu butudi katuyi tuikadila ba pa buloba. Mupostolo Yone wakafunda ne: ‘Tudi bamanye ne: tuetu tudi ba Nzambi, ne ba pa buloba bonso badi [ku bukokeshi bua mubi].’ (1 Yone 5:19) Mêyi a Yone adi atangila bena panu aa mmalelela. Mvita, dibunda dia bilumbu, tshikisu, dikengeshangana, dishima ne tshiendenda bidi bitape bu meshi lelu bidi bijadika ne: Satana ke udi ukokesha panu, ki Nzambi to. (Yone 12:31; 2 Kolinto 4:4; Efeso 6:12) Padi muntu ulua Ntemu wa Yehowa, kakuenza anyi kuanyisha kabidi malu mabi aa to, ne etshi ke tshidi tshienza bua kikadi wa pa buloba.—Lomo 12:2; 13:12-14; 1 Kolinto 6:9-11; 1 Yone 3:10-12.
4. Mmu malu kayi mutudi tuleja ne: tudi bantu ba Yehowa?
4 Yone wakamba ne: bena Kristo mbashilangane ne bena panu bualu bobu ‘badi ba Nzambi.’ Aba bonso badi badilambula kudi Yehowa bushuwa mbantu bende. Mupostolo Paulo wakamba ne: “Bua bituikala ne muoyo, tudi ne muoyo bua [Yehowa]; bituafua, tufuafua bua [Yehowa]; nunku, bituikala ne muoyo, anyi bituafua, tudi ba [Yehowa].” (Lomo 14:8; Musambu 116:15) Bu mutudi bantu ba Yehowa, tudi bamulamate amu yeye nkayende. (Ekesode 20:4-6) Bushuwa, muena Kristo mulelela kêna ne bua kulambula muoyo wende mu malu a panu to. Ne nansha mudiye unemeka bimanyinu bia ditunga, kêna ubitendelela ni mmu bienzedi anyi mu lungenyi luende nansha. Bulelela, kêna utendelela benji ba manaya bende lumu anyi bantu bakuabu badibu batumbisha bikole lelu. Bulelela, udi unemeka budikadidi budi nabu bakuabu bua kuenza bu mudibu basue, kadi yeye udi utendelela anu Mufuki. (Matayo 4:10; Buakabuluibua 19:10) Bualu ebu kabidi budi bumutapulula ne bena panu.
‘Bukalenge buanyi kabuena bua pa buloba ebu’
5, 6. Mmunyi mudi dikokela Bukalenge bua Nzambi ditutapulula ne bena panu?
5 Bena Kristo mbayidi ba Kristo Yezu ne badi ku bukokeshi bua Bukalenge bua Nzambi, ne muanda eu udi kabidi ubavuija kabayi ba pa buloba. Pavuabu bamulumbuluisha kudi Pontio Pilato, Yezu wakamba ne: ‘Bukalenge buanyi kabuena bua pa buloba ebu; bu bukalenge buanyi buikale bua pa buloba ebu, bantu banyi bakadi kuluangana, tshifidibu mu bianza bia bena Yuda; kadi katataka bukalenge buanyi kabuena bua kunoku.’ (Yone 18:36) Bukalenge ebu ke buikala ne bua kutumbishisha dîna dia Yehowa, kubingishisha bumfumu buende ne kuenzeja disua diende pa buloba bu mudidi dienzeka mu diulu. (Matayo 6:9, 10) Mu mudimu wa Yezu, wakayisha lumu luimpe lua Bukalenge, ne wakamba ne: bayidi bende bavua ne bua kumanyisha lumu elu too ne ku nshikidilu wa tshikondo etshi. (Matayo 4:23; 24:14) Mu 1914, mêyi a tshiprofete a mu Buakabuluibua 11:15 a ne: ‘Bukalenge bua pa buloba buakulua bukalenge bua Mukalenge wetu, ne bua Kristo wende, ne yeye neakokeshe too ne tshiendelele’ akakumbana. Mu katupa kîpi emu, Bukalenge bua mu diulu abu nebuikale ku bukokeshi bumuepele buakokesha bantu. (Danyele 2:44) Mu tshikondo kampanda, nansha bamfumu ba panu nebikale ne bua kuitaba bukokeshi bua Bukalenge ebu.—Musambu 2:6-12.
6 Bu mudibu bavuluke malu onso aa, lelu bena Kristo balelela badi bakokela Bukalenge bua Nzambi, ne badi balonda mubelu wa Yezu wa kutungunuka ne ‘kukeba diambedi bukalenge ne buakane bua Nzambi.’ (Matayo 6:33) Ebi kabiena bileja ne: badi batungila matunga mudibu basombele to, kadi bidi bibavuija batapuluke ne bena panu bua bidi bitangila malu a mu nyuma. Anu bu mu bidimu lukama bia kumpala, mudimu munene wa bena Kristo lelu ngua ‘kuyisha bua bukalenge bua Nzambi.’ (Bienzedi 28:23) Mbulamatadi wa bantu nansha umue kêna ne bukenji bua kukandika mudimu eu udi Nzambi mubapeshe to.
7. Bua tshinyi bena Kristo balelela kabena babuelakana mu malu a bena panu, ne mmunyi mudibu baleje bualu ebu?
7 Bu mudi Bantemu ba Yehowa bikale bantu ba Yehowa ne bayidi ba Yezu, eku bikale bakokela Bukalenge bua Nzambi, ke bualu kayi kabatu babuelakane mu mvita ya matunga adibu ne ya matunga makuabu idi mienzeke mu lukama lua bidimu lua 20 ne lua 21 to. Ki mbalamate ku luseke nansha lumue mu mvita, ki mbambuile muntu nansha umue tshingoma, ne ki mbende batangalaja lumu nansha lumue bua kuenza kampanye ka malu a panu to. Bua kuleja ne: badi ne ditabuja dia pa buadi nansha kuoku kuikale buluishi budi bumueneka kabuyi kutua tshiadi, mbalonde mêyi avuabu bambile bamfumu bena Nazi ba mu ditunga dia Allemagne mu 1934 ne: “Katutu tubuelakana mu malu a tshididi nansha, kadi tudi badifile ne muoyo mujima kudi bukalenge bua Nzambi bulombola kudi Kristo Mukalenge udiye muteke. Katuakuenzela muntu nansha umue bibi. Tudi basue kusomba mu ditalala ne kuenzela bantu bonso malu mimpe patudi ne mushindu.”
Milopo ne batumibue ba Kristo
8, 9. Mmu mushindu kayi mudi Bantemu ba Yehowa lelu bikale milopo ne batumibue, ne mmunyi mudi muanda eu ulenga malanda abu ne matunga?
8 Paulo wakadibikila yeye ne bena Kristo nende bela manyi ne: ‘milopo bua bualu bua Kristo, bu mudi Nzambi munusengelele ne dîyi dietu.’ (2 Kolinto 5:20; Efeso 6:20) Katshia mu 1914, mbiakanyine menemene bua kubikila bena Kristo bela manyi a nyuma ne: milopo ya Bukalenge bua Nzambi anyi “bana” ba Bukalenge ebu. (Matayo 13:38; Filipoi 3:20; Buakabuluibua 5:9, 10) Kabidi, Yehowa mmupatule mu bisamba bionso “musumba munene” wa “mikoko mikuabo” peshi bena Kristo badi ne ditekemena dia kupeta muoyo pa buloba, bua kukuatshishabu bana [ba Nzambi] bela manyi aba mu mudimu wabu wa milopo. (Buakabuluibua 7:9, MMM; Yone 10:16) Tudi mua kubikila “mikoko mikuabo” eyi ne: “batumibue” ba Bukalenge bua Nzambi.
9 Mulopo ne bena diende kabatu babuelakana mu malu a mu ditunga didibu benzela mudimu to. Bia muomumue, bena Kristo kabatu babuelakana mu malu a tshididi a mu matunga a panu nansha. Kabatu balamata anyi baluisha bantu ba ditunga kampanda, ba dikoba, tshisa anyi ba tshisumbu kansanga tshia malu a mpetu to. (Bienzedi 10:34, 35) Kadi batu ‘benzela bantu bonso bimpe.’ (Galatia 6:10) Bu mudi Bantemu ba Yehowa kabayi babuelakana mu malu a panu, bidi biumvuija ne: muntu nansha umue kêna mua kubenga mukenji wabu wamba bulelela mudibu bena mu tshisumbu kampanda tshia baluishi ba bena dikoba, ditunga anyi tshisa kansanga to.
Mbamanyike bua dinanga diabu
10. Dinanga didi ne mushinga kayi bua muena Kristo?
10 Pa kumbusha malu atudi batele aa, bena Kristo kabena babuelakana mu malu a panu bua malanda adibu badie ne bena Kristo nabu bakuabu. Yezu wakambila bayidi bende ne: ‘Bua bualu ebu bantu bonso nebamanye ne: nudi bayidi banyi, binuasuangana.’ (Yone 13:35) Dinanga dia buena-muntu ke bualu bunene budi buambuluisha bua kulua muena Kristo. (1 Yone 3:14) Malanda adi nawu muena Kristo ne bena Kristo nende mmakole anu bu mudiye nawu ne Yehowa ne Yezu Kristo. Ki mmunange anu bena Kristo nende badi mu tshisumbu tshiabu to. Mmunange kabidi ‘bana [babu] ba mu Kristo badi pa buloba ebu.’—1 Petelo 5:9.
11. Mmunyi mudi dinanga didi nadi Bantemu ba Yehowa dilengeje ngikadilu wabu?
11 Lelu Bantemu ba Yehowa badi baleja dinanga diabu dia buena-muntu padibu bakumbaja mêyi a mu Yeshaya 2:4 a ne: ‘Bobu nebafule nkasu ya kudima nayi ku miele yabu ya mvita, nebafule miele ya kukosa nayi matamba mafubidile a mitshi ku mafuma abu; tshisamba tshikuabu katshiena tshibisha muele wa mvita bua kuluisha nawu tshisamba tshikuabu, ne kabena bayila lungenyi lua kuluangana nalu mvita kabidi.’ Bena Kristo badi mu ditalala ne Nzambi ne bantu nabu bualu mbalongesha kudi Yehowa. (Yeshaya 54:13) Bu mudibu banange Nzambi ne bana babu, kabiakuikala bimpe bua buobu kuangata bingoma bua kuluisha bena Kristo nabu anyi banga bantu ba mu matunga makuabu to. Ditalala diabu ne buobumue mmalu a mushinga a mu ntendelelu wabu, ntshijadiki tshia se: badi ne nyuma wa Nzambi bulelela. (Musambu 133:1; Mika 2:12; Matayo 22:37-39; Kolosai 3:14) Badi ‘bakeba ditalala, badilonda,’ bamanye bimpe ne: ‘mêsu a Yehowa adi kudi bakane.’—Musambu 34:14, 15.
Mushindu udi bena Kristo bangata bena panu
12. Mmushindu kayi udi Yehowa wangata bena panu udi Bantemu ba Yehowa bidikija, ne mmunyi mudibu mua kumuidikija?
12 Yehowa mmumane kupisha bukua-panu ebu, kadi kêna muanji kulumbuluisha bantu bonso badi panu pa buloba to. Neabalumbuluishe ku diambuluisha dia Yezu mu tshikondo tshidiye Yeye mulongolole. (Musambu 67:3, 4; Matayo 25:31-46; 2 Petelo 3:10) Kadi kumpala kua tshikondo atshi kukumbana, udi uleja bantu dinanga dikole. Wakafila too ne Muanende umuepele mulela bua muntu yonso ikale ne mushindu wa kupeta muoyo wa tshiendelele. (Yone 3:16) Bu mutudi bena Kristo, tudi tuidikija dinanga dia Nzambi patudi tuambila bantu bakuabu malu adi Nzambi mulongolole bua kufila lupandu, nansha mudi bantu bapetula mudimu wetu misangu ya bungi.
13. Mmunyi mutudi ne bua kuangata bamfumu ba mbulamatadi?
13 Mmunyi mutudi ne bua kumona bamfumu ba pa buloba? Paulo wakandamuna lukonko elu pakafundaye ne: ‘Muntu yonso [akokele] bakokeshi badi ku mutu kuende. Bua kakuena bukokeshi budi [kabuyiku bua] Nzambi; ne makokeshi adiku [adi mu miaba yawu mishilangane bua] Nzambi.’ (Lomo 13:1, 2) Bantu badi ne mianzu ‘mishilangane’ ya mamfumu (manene anyi makese kudi makuabu, kadi mikale anu mashadile kudi Yehowa) bualu Wa-Bukole-Buonso mmulekele bua anji kuikalaku. Muena Kristo udi ukokela mbulamatadi bualu eu ke mushindu udiye utumikila Yehowa. Kadi tshia kuenza ntshinyi padiku dikokangana pankatshi pa malu adi Nzambi ulomba ne adi mbulamatadi ya bantu ilomba?
Mikenji ya Nzambi ne ya Kaisa
14, 15. (a) Mmunyi muakafika Danyele ku diepuka dikokangana mu tshilumbu tshia butumike? (b) Nduseke kayi luakalamata bena Ebelu basatu pavuaku kakuyi mushindu wa kuepuka dikokangana mu tshilumbu tshia butumike?
14 Danyele ne balunda bende basatu badi bafila tshilejilu tshimpe tshia mushindu wa kukokela mbulamatadi ya bantu ne bukokeshi bua Nzambi. Pavua bansonga banayi bena Ebelu mu bupika mu Babulona, bavua batumikila mikenji ya ditunga adi ne bakabasungula pa lukasa bua kulongabu malu a pa buawu. Pakamona Danyele ne: malu avuabu babalongesha au avua pamu’apa mua kubafikisha ku ditupa ku Mikenji ya Yehowa, wakayikila bualu ebu ne mulami uvuabu bateke. Nunku bakenza muonso mua kuenza bua kunemeka tuondo tua muoyo tua bena Ebelu banayi aba. (Danyele 1:8-17) Bantemu ba Yehowa batu balonda tshilejilu tshia Danyele padibu bumvuija bamfumu ba mbulamatadi ngikadilu wabu ne mbabi yonso bua kuepuka bilumbu bia patupu.
15 Kadi musangu wakalonda, kakuvua mushindu wa kuepuka dikokangana mu tshilumbu tshia butumike to. Mukalenge wa Babulona wakasa lupingu lunene mu mpata wa Dula ne kuambilaye banene ba mbulamatadi ne bakokeshi bonso ba mu provense bua kudisangishabu bua kubanjija lupingu alu. Dîba adi, bakavua bateke balunda basatu ba Danyele bakokeshi ba mu provense wa Babulona, nunku bavua pabu ne bua kulonda dîyi adi. Bavua balongolole ne: dîba kampanda bonso bavua badisangishe muaba au bavua ne bua kutua mpala panshi kumpala kua lupingu alu. Kadi bena Ebelu bavua bamanye bimpe ne: bualu abu buvua bubengangana ne mikenji ya Nzambi. (Dutelonome 5:8-10) Nunku pakatua bantu bakuabu bonso mpala panshi, bobu bakashala bimane kulu. Bu muakabengabu kutumikila dîyi dia mukalenge, bakabafundila lufu lukuate buôwa, kadi mioyo yabu yakapanduka mu tshishima; bakitaba bua kufua pamutu pa kubenga kutumikila Yehowa.—Danyele 2:49–3:29.
16, 17. Ntshinyi tshiakandamuna bapostolo pakabatuminabu dîyi bua kubenga kuyisha, ne mbua tshinyi?
16 Mu bidimu lukama bia kumpala, bakabikila bapostolo ba Yezu Kristo kumpala kua balombodi bena Yuda mu Yelushalema ne kubakandikabu bua kuyisha mu dîna dia Yezu. Ntshinyi tshiakenzabu? Yezu uvua mubapeshe mudimu wa kuvuija bantu bayidi mu bisamba bionso, ne mu Yudaya. Uvua mubambile kabidi bua kuikalabu bantemu bende mu Yelushalema ne miaba mikuabu yonso ya pa buloba bujima. (Matayo 28:19, 20; Bienzedi 1:8) Bapostolo bavua bamanye bimpe ne: malu avua Yezu mubambile bua kuenza avua aleja tshivua Nzambi musue bua buobu kuenza. (Yone 5:30; 8:28) Ke bualu kayi bakamba ne: ‘Butudi nabu mbua kutumikila mêyi a Nzambi kumpala kua mêyi a bantu.’—Bienzedi 4:19, 20; 5:29.
17 Mu dienza malu aa bapostolo kabavua balua bantomboji to. (Nsumuinu 24:21) Tshidibi, pavua bamfumu babakandika bua kuenza disua dia Nzambi, bavua bamba anu ne: ‘Tudi ne bua kutumikila Nzambi pamutu pa bantu.’ Yezu wakamba ne: tudi ne bua ‘kupa Kaisa bintu bia Kaisa, kupa Nzambi bintu bia Nzambi.’ (Mâko 12:17) Tuetu babenge kutumikila tshidi Nzambi mutuambile bua kuenza bualu muntu kampanda udi utukandika, tudi tupesha bantu bintu bia Nzambi. Tudi tufuta tshintu tshionso tshitudi ne bua kupesha Kaisa, tuitaba bumfumu butambe bunene bua Yehowa. Yehowa udi Mfumu Mutambe Bunene, Mufuki, Mpokolo mene wa bukokeshi.—Buakabuluibua 4:11.
Netushale bashindame
18, 19. Nngikadilu kayi wa tshitembu udi bana betu ba bungi baleje, ne mmunyi mutudi mua kulonda tshilejilu tshiabu?
18 Mpindieu, mbulamatadi ya bungi ya bantu idi itaba ne: Bantemu ba Yehowa kabatu babuelakana mu malu a panu, ne tudi ne dianyisha bua bualu ebu. Kadi mu amue matunga, Bantemu mbapete buluishi bukole. Mu lukama lua bidimu lua 20 lujima too ne lelu, bamue bana betu ba balume ne ba bakaji mbaluangane ne bukole buonso (mu nyuma) ‘mvita mimpe ya ditabuja.’—1 Timote 6:12.
19 Mmunyi mutudi mua kushala ne lulamatu bashindame bu bana betu aba? Tshia kumpala, katuena ne bua kupua muoyo ne: dimue dituku nebatuluishe anu kutuluisha. Katuena ne bua kubungama anyi mene kukema padibu batuluisha to. Paulo wakadimuija Timote ne: “Bonso badi basue kulamata [Nzambi] mu didisanga pamue ne Yezu Kristo nebakengeshibue.” (2 Timote 3:12; 1 Petelo 4:12) Mu buloba mudi Satana ulombola makalenge, mmunyi mutudi mua kupanga kupeta buluishi? (Buakabuluibua 12:17) Patudi anu ne lulamatu, nekuikale amu bamue bantu badi ‘bakema ne batupenda.’—1 Petelo 4:4.
20. Mmêyi kayi malelela adi akolesha adibu batuvuluije?
20 Tshibidi, tudi batuishibue ne: Yehowa ne banjelu bende nebatukuatshishe. Anu muakamba Elisha kale, ‘badi netu badi bapita badi nabu bungi.’ (2 Bakelenge 6:16; Musambu 34:7) Bilondeshile disua diende, bidi mua kuenzeka bua Yehowa kulekela baluishi batungunuka ne kutukengesha munkatshi mua tshikondo kampanda. Nansha nanku, neatupeshe anu kutupesha bukole bua tuetu kumona mua kutantamena malu aa. (Yeshaya 41:9, 10) Bamue mbajimije mioyo yabu, kadi abi kabiena bitutekesha mu mikolo to. Yezu wakamba ne: ‘Kanutshinyi badi bashipa mubidi, kadi kabena bamanye mua kushipa muoyo; kadi nutshine udi mumanye mua kujimija muoyo ne mubidi kabidi mu Ngena.’ (Matayo 10:16-23, 28) Tudi anu “benyi ne bena luendu” panu. Tudi tufila dîba dietu panu bua ‘kulamata muoyo udi muoyo wa bushuwa,’ muoyo wa tshiendelele mu bukua-panu bupiabupia bua Nzambi. (1 Petelo 2:11; 1 Timote 6:19) Kakuena muntu udi mua kutupangisha difutu edi bituashala ne lulamatu kudi Nzambi.
21. Ntshinyi tshitudi anu ne bua kuikala bavuluke?
21 Nunku tushalayi bavuluke malanda a mushinga mukole atudi badie ne Yehowa Nzambi. Tuikalayi misangu yonso tuanyisha diakalenga ditudi nadi dia kuikala bayidi ba Kristo ne bakokedi ba Bukalenge. Tunangayi bana betu ne muoyo mujima ne tuikale misangu yonso ne disanka bua dinanga didibu batuleja. Tutumikilayi nangananga mêyi a mufundi wa Misambu a se: “Windile Yehowa, wikale ne bukole, ne mutshima webe wikale ne dikima, e, windile biebe Yehowa.” (Musambu 27:14; Yeshaya 54:17) Tuetu benze nenku, anu bu bena Kristo bungi kabuyi kubala bavua ne muoyo kumpala kuetu, netushale bashindame ne ditekemena dietu dia bushuwa, bikale bena Kristo ba lulamatu badi kabayi babuelakana mu malu a panu.
Udi mua kumvuija anyi?
• Mmunyi mudi malanda etu ne Yehowa atutapulula ne bena panu?
• Bu mutudi tukokela Bukalenge bua Nzambi, mmushindu kayi utudi katuyi tubuelakana mu malu a panu?
• Mmu malu kayi mudi dinanga ditudi nadi bua bana betu dituepula bua kubuelakana mu malu a pa buloba?
[Tshimfuanyi mu dibeji 15]
Mmunyi mudi ditumikila dietu dia Bukalenge bua Nzambi dilenga malanda etu ne bena panu?
[Tshimfuanyi mu dibeji 16]
Hutu ne Tutsi benza mudimu pamue ne disanka
[Tshimfuanyi mu dibeji 17]
Bana betu bena Kristo: muena Yuda ne Arabe
[Tshimfuanyi mu dibeji 17]
Bana betu bena Kristo: muena mu Serbie, muena mu Bosnie ne muena mu Croatie, bikale mu ditalala
[Tshimfuanyi mu dibeji 18]
Tshia kuenza ntshinyi padi bakokeshi batuambila bua kushipa mikenji ya Nzambi?