Bamanyishi ba Bukalenge badi balonda

Ndongamu wa ku televizion wakamusaka bua kutumbisha Nzambi

MUPOSTOLO PAULO wakamba ne: “Bamue badi benza bua lubabu ne difuilakana, kadi bakuabo badi balongesha bualu bua Kristo ne muoyo mulenga.” (Filipoi 1:15, MMM) Imue misangu, nansha bantu badi bakeba kunyanga lumu lua tshisamba tshia Yehowa mbafikishe bantu badi ne mitshima misue malu makane ku dikokibua ku bulelela kabayi bamanye to.

Mu ngondo wa dikumi ne umue wa tshidimu tshia 1998, bakaleja ndongamu kampanda ku televizion wa ditunga dia France, uleja nzubu ya Betele, biro bia Bantemu ba Yehowa bidi mu tshimenga tshia Louviers. Nansha muvua bantu bakula malu mashilashilangane bua ndongamu eu, tshidibi wakapatula bipeta bilenga mu mishindu ivua kayiyi mielela meji.

Munkatshi mua bantu bavua batangile ndongamu au muvua Anna-Paula, uvua musombele mutantshi wa kilometre 60 ne Betele. Anna-Paula (dibaka diende divua difue ne uvua ne bana babidi) uvua ukeba mudimu. Nunku mu dinda diakalonda, wakela nshinga ku Betele bua kuebeja ni uvua mua kupeta mudimu kuine aku. Wakamba ne: “Ngakamona ne: uvua muaba mulenga ne mudimu uvuabu benzamu uvua wa mushinga wa bungi.” Kadi wakakema bikole pakumvuaye ne: bantu bonso bavua benza mudimu ku Betele aku mbena mudimu bavua bafila dîba diabu ku budisuile! Panyima pa dimumvuija mu tshikoso midimu idi Bantemu ba Yehowa benza, wakitaba bua Ntemu aye kumutangila kumbelu.

Pakaya Léna (muambi wa lumu luimpe wa ku dîba ne ku dîba wa mu tshisumbu tshia muaba uvua Anna-Paula musombele) kumutangila, bakayukila bikole ne Anna-Paula, ne yeye kuitaba mukanda wa Dimanya didi difikisha ku muoyo wa kashidi.a Pakalua Léna kumutangila musangu wakalonda, wakasangana ne: Anna-Paula ukavua mubale mukanda au mujima ne uvua ne nkonko ya bungi ya kuela. Wakitaba bua kulonga Bible ne disanka. Anna-Paula wakamba ne: “Buanyi meme, dilonga dia Bible divua mushindu wa meme kumanya Dîyi dia Nzambi. Tshivuaku muanji kulenga Bible katshia.”

Mu ngondo wa kumpala wa tshidimu tshia 1999, Anna-Paula wakaya kuendakana ku Betele, ne lumingu luakalonda wakabuela mu bisangilu bua musangu wa kumpala. Matuku makese pashishe, wakatuadija kulonga Bible ne bana bende ne kuyisha balunda bende. Udi wamba ne: “Tshivua mua kudilamina nkayanyi malu amvua ndonga to. Mvua musue bua kuambila bantu malu malelela adi mu Bible ne bua kubasamba.” Mumane kujikija amue malu avuaye nawu, Anna-Paula wakabangisha kubuela mu bisangilu pa tshibidilu. Wakadiunda ne lukasa mu nyuma ne kutambulaye mu dia 5 a ngondo muitanu wa tshidimu tshia 2002.

Tshia kumanya kabidi ntshia se: bua tshilejilu tshimpe tshia Anna-Paula ne lukunukunu luende mu mudimu wa buambi, mamuende wakabanga kulonga Bible ne matuku makese kunyima e kutambulaye pende. Anna-Paula udi wamba ne: “Tshiena ne mêyi andi mua kumvuija nawu disanka dindi nadi to. Ndi ngela Yehowa tuasakidila matuku onso bua mudiye mumpeteshe mushindu wa kumumanya ne kumusadila, ne bua mabenesha onso adiye mumpeshe.”

[Mêyi adi kuinshi]

[Bimfuanyi mu dibeji 8]

Kulu: Anna-Paula

Kuinshi: Tshibuelelu tshia Nzubu ya Betele wa ku Louviers, mu France