“Dikuatshisha dianyi didi difuma kudi Yehowa”

Bajike kadi bikale ne disanka mu mudimu wa Yehowa

MUKAJI mukuabu muena Kristo wa mu ditunga dia Espagne wakamba ne: “Ba bungi ba kutudi tudi ne disanka nansha mutudi katuyi mu mabaka.” Bua tshinyi muanetu eu udi ne disanka? Udi wamba ne: “Katuena basue kuikala ne ntatu ya mu dibaka bua tumone mua kuenzela Yehowa Nzambi wetu mudimu ne muoyo mujima.”

Malu aa adi umvuangana ne tshidi Dîyi dia Nzambi diamba pa bidi bitangila bujike. Pavua mupostolo Paulo muakule bua malu a mabaka, wakafila mubelu eu ku bukole bua nyuma muimpe ne: ‘Ndi ngambila batshidi bajike ne bakaji ba mu lufuila ne: Bidi bimpe biashalabu bu meme mene.’ Paulo muine kavua musele to. Kadi bua tshinyi uvua ubela bantu bua kushalabu bajike? Wakaleja ne: muntu udi mu dibaka mmutapuluke mu malu adiye wenza, kadi udi kayi mu dibaka udi ‘uditatshisha bua bintu bia Mukalenge.’ (1 Kolinto 7:8, 32-34) Kuenzela Yehowa mudimu ke tshintu tshinene tshidi tshienza ne: mujike ikala ne disanka.

Kushala mujike ne kipatshila kalenga

Mêyi a Paulo adi mua kukemesha bantu badi miaba idibu bangata dibaka ne dikolesha bana ne mushinga wa bungi menemene. Kadi Yezu Kristo (uvua yeye muine mujike kadi muikale ne disanka) wakaleja kipatshila kalenga kadi bena Kristo mua kushadila bajike. Wakamba ne: ‘Batungula bakuabu badiku, bakaditungula bualu bua bukalenge bua mu diulu. Udi mumanye mua kuitabuja dîyi adi aditabuje.’​—Matayo 19:12.

Bilondeshile mêyi aa, bantu ba bungi batu bamona ne: bujike budi bubambuluisha bua kuenzela Nzambi mudimu kabayi ne ntatu ya bantu badi mu dibaka. (1 Kolinto 7:35) Bena Kristo binunu ne binunu badi ne disanka mu ditendelela Yehowa kabayi ne mukaji anyi mulume, ne badi basanka bikole padibu bambuluisha bakuabu.a

Bena Kristo ba bungi badi kabayi mu dibaka mbamanye ne: ki nganu bantu badi mu dibaka ke batu ne disanka to, ne mbamanye kabidi ne: bajike bonso kabatu anu bapangila disanka to. Bamue batu imue misangu bapeta disanka anyi ntatu, nansha bikale mu dibaka anyi bikale bajike. Bible yeye muine udi wamba patoke ne: dibaka ditu dituala ‘kanyinganyinga mu mubidi.’​—1 Kolinto 7:28.

Bajike bua bukole bua nsombelu

Bavule mbajike ki mbualu mbasue kuikala nanku kadi bua bukole bua nsombelu. Badi mua kuikala bajinga luya, bulunda ne dinanga bitu mu dibaka. Kadi bua bakuabu, mfranga anyi nsombelu mikuabu idi mua kubapangisha bua kusela anyi kusedibua mpindieu. Bamue bena Kristo (ba bungi ba kudibu mbana betu ba bakaji batudi banange bikole) mbashale bajike bualu mbadisuike bua kutumikila mubelu wa mu Bible wa kusela anyi kusedibua ‘anu mu Mukalenge.’ (1 Kolinto 7:39) Badi bakeba ne lulamatu luonso muena dibaka anu munkatshi mua batendeledi ba Yehowa bakadi badilambule ne batambule.

Misangu mikuabu, bamue ba ku bajike aba batu badiumvua nkayabu. Panyima pa muanetu kampanda wa bakaji mumane kuitaba ne: utu udiumvua pende nunku, wakamba ne: “Tudi bamanye mukenji wa Yehowa ne katuena basue kumubungamija nansha kakese. Tudi mua kuikala basue kupeta mulume anyi mukaji, kadi nansha mudi bantu ba pa buloba ebu bakeba mua ‘kutupetela muntu udi mutukumbanyine,’ tudi badisuike anu bua kushala bajike. Katuena nansha basue kusomba ne balume anyi bakaji badi kabayi batendelela Yehowa.” Bena Kristo ba nunku mbakumbanyine kalumbandi bua mudibu batumikila mibelu ya mu Bible ne balama bikadilu bilenga bua kusankisha Yehowa nansha mudibu mua kuikala bumvua bibi.

Yehowa udi ubambuluisha bikole

Yehowa udi uleja lulamatu kudi aba badi bamulamata mu mianda bu mudi ya kubenga kusela anyi kusedibua kudi bantu badi kabayi bamutendelela. Mukalenge Davidi wakajadika malu avuaye mudimuene ne: ‘Kudi muntu udi ne lulamatu wewe [Yehowa] udi umuenzela malu ne lulamatu.’ (Musambu 18:25, NW) Nzambi udi kabidi ulaya bonso badi bamutumikila ne: ‘Tshiena nkulekela nansha kakese, tshiena nkushiya tshianana.’ (Ebelu 13:5) Tuetu tuidikija Yehowa, tudi mua kuikala tuela bena Kristo ba bukole buonso badi bajike ne badi balamata Dîyi dia Nzambi kalumbandi. Tudi kabidi mua kusambila bua Yehowa abakoleshe bua bamone mua kupita ne ntatu yabu.​—Balumbuluishi 11:30-40.

Bena Kristo bajike ba bungi badi bamona ne: padibu benza mudimu wa kulongesha bantu Bible ne bukole buabu buonso, muoyo wabu udi ulua ne mushinga. Tuangate tshilejilu tshia Patricia, mukaji wa bidimu 30 ne bia mu njila udi kayi musedibue, udi muikale mpanda-njila. Udi wamba ne: “Nansha mudi kubenga kuikala mu dibaka kuikale ne ntatu ya bungi, nkungambuluishe bua kuikala mpanda-njila wa pa tshibidilu. Bu mundi nkayanyi, ndi mua kuakaja ndongamu wanyi bua kupeta dîba dia kulonga. Ndi kabidi mulonge mua kueyemena Yehowa bikole, nangananga mu bikondo bia ntatu.”

Dieyemena dia nunku ndishindamene pa tshidi Bible mulaye ne: ‘Uteke njila webe mu bianza bia Yehowa; umueyemene yeye kabidi, ne yeye neenze malu ende.’ (Musambu 37:5) Eyowa, batendeledi ba lulamatu bonso ba Yehowa (bajike ne badi mu mabaka) badi mua kupeta busambi ne bukole mu mêyi mafundisha ku nyuma wa Nzambi aa: “Dikuatshisha dianyi didi difuma kudi Yehowa.”​—Musambu 121:2.

[Mêyi adi kuinshi]

[Lungenyi lunene lua mu dibeji 9]

‘Muntu udi mujike udi uditatshisha bua bintu bia Mukalenge, bu mudiye mumanye mua kusankisha Mukalenge.’​—1 KOLINTO 7:32

[Kazubu mu dibeji 8]

MUA KUPETA DISANKA MU BUJIKE

Yezu uvua kayi musele wakamba ne: ‘Bidia bianyi bidi kuenza mudi wakuntuma musue ne kujikija mudimu wende.’​—Yone 4:34.

Bana bakaji ba Filipo bavua kabayi mu dibaka bavua benza mudimu wa ‘kuamba malu avua kaayi manji kulua.’​—Bienzedi 21:8, 9.

Bana betu ba bakaji badi kabayi mu dibaka badi bamanyisha mukenji wa Bukalenge badi munkatshi mua ‘tshisumbu tshinene tshia bakaji badi bamba lumu luimpe.’​—Musambu 68:11.