Tukebululayi aba badi banyisha bua kulongeshibua
1 “Muntu kêna mua kulua kundi padi Tatu udi muntume kayi mumukoke.” (Yone 6:44, NW) Yehowa, udi ukontolola mitshima, neafute aba badi banyisha bua kulongeshibua ne batumikila bidibo balonga. (Yel. 17:10; Yone 6:45) Bituakebulula bena bupuekele badi bajinga kuikala mu bulongolodi bupiabupia, tudi ne lumu lua kuikala benzejianganyi ba mudimu Nende.—Mus. wa 37:11; 1 Kol. 3:9.
2 Yezu wakamba ne: bayidi bende “mbilembi bia bantu.” (Mat. 4:19) Eyowa, mudimu wa buena eu utu imue misangu mukole, kadi udi upetesha disanka divule pa kumona bipeta bimpe bidi bifuminaku. Pamutu pa kudifila mu dikeba disanka dietu nkayetu, tudi tupandisha “mishipa” ku kabutu kajadika. Mulobi muimpe udi ne bua kulonga mushindu wa kulobesha mishipa. Bia muomumue, tudi ne bua kufila bumanyishi bua Bukalenge mu mushindu udi ukoka ntema ne usonsola dijinga dia kumanya bia bungi kudi batuyukidishi betu. Bidi bilelela menemene patudi tuenza makumbula mapiamapia. Udi mua kuamba tshinyi?
3 Bikala mukuyukidishi webe muleja dijinga dia kumanya bia bungi pa biena-bualu bia mu “Tshibumba tshia Nsentedi” bidi biakula pa ntendelelu, udi mua kuamba ne:
◼ “Musangu mushala tuvua bakule pa muanda wa se: bantu ba bungi ki mbasue kuyukidilangana pa ntendelelu to. Kabiena bikukemesha anyi, bualu ba bungi badi batunyunguluke batu bamba mudibo bena nkristo? Imue misangu udi udiebeja ne: bua tshinyi muanda wa ntendelelu udi ujula diabulujangana ne milandu?” Lekela muntu andamune. Bulula mukanda wa Comment raisonner mu dibeji dia 310, wakula pa imue ngenyi mileja muinshi mua ka-tshiena-bualu ka se: “Pourquoi y a-t-il tant de religions?” (Bua tshinyi bitendelelu mbipite kuvula?)”
4 Imue misangu udi mua kuteta bua kutuadija diyukidilangana pa ntendelelu mu mushindu wa muomumue, pa kuamba ne:
◼ “Kudiku mushindu mujalame wa kumanya né tudi mu ntendelelu mulelela anyi? [Lekela muntu andamune.] Bitendelelu mbipite kuvula ne bantu badi mu dielakana ne bikale mu lukutukutu.” Udiambuluishe ne mabeji 316-18 mu mukanda wa Comment raisonner mudibu bajule lukonko elu: “Comment identifier la vraie religion?” (Mushindu wa kumanya tshitendelelu tshilelela) Ela nseke pa lukonko 5, “Ses membres s’aiment-ils vraiment les uns les autres?” (Benamu mbanangangane umue ne mukuabu anyi?) Wambila muntu ne: udi mua kulonga bia bungi ku diambuluisha dia dilonga dia Bible dienza nende pa nkayende.
5 Bikala mukuyukidishi webe mumueneka udiabakena pa kumona nsombelu idiku pa buloba bujima, udi mua kuamba nenku:
◼ “Mbimueneke, udi utondeshibua bua nsombelu mibi itudi nayi ne mutudi ne bua kukolesha bana betu. Bible udi uleja dilaya dilenga diakumbaja Nzambi mu matuku makese atshilualua.” Bala Nsumuinu 2:21, 22, umvuija ne: Yehowa mmulaye bulongolodi bua ditalala dia kashidi.
6 Pawakumbula bantu musangu mukuabu ne Ngumu ya Bukalenge, ushile buonso bavua kabayi banji kuyipeta. Bu mudibo baleje mu Mudimu wetu wa Bukalenge, tudi mua kutungunuka ne kuleja trakte eyi patshidiyi mu stoke ne kuyifila padi bantu kabayi ne mushindu wa kuangata bibejibeji.
7 Bu mudi Dîyi dia Nzambi dikale ne buenzeji bukole, tudi ne bua kuteta kutumika nadi mu mbuelelu yetu. (Eb. 4:12) Tutabalelayi nangananga bua kukankamija mutuyukidishi wetu bua kubalaye Bible. (tangila Bienzedi 17:11.) Bituenza ne disuminyina tshietu tshitupa, Yehowa neabeneshe madikolela etu.