Ngumu ya Bukalenge ya pa buayi bua bantu buonso

¹ Biangatshile mu dia 24 Tshisanga, tudi tufila Ngumu ya Bukalenge ya pa buayi; pa buloba bujima, idi isonsolola dijinga dia kumanya bia bungi kudi bantu badi mu dipampakana. Bumanyishi buayi kabuena anu bua malu a lelu, kadi budi kabidi ne mushinga mukole kupita kuonso eku. Bamanyishi ba mu bisumbu bionso badi batua mudimu eu nyama ku mikolo ne muoyo wabu mujima, bajinga kufila bumanyishi ebu mu bianza bia binunu bia bantu. Udiku wenza muebe muonso mu mudimu eu anyi?

² Dibuki dia Ngumu ya Bukalenge divua ditumina tshisumbu tshionso, mu bungi bua 50 pa mumanyishi ne 200 pa mpanda-njila. Ukadiku muabanye bungi kayi? Biwikale mupangile kuenza mûvua ujinga, ukadiku muele meji pa mushindu wa kutumika bipitshidile ne kumpala kua kujikaye mu stoke wa mikanda ya tshisumbu anyi? Bua tshinyi kubenga kuangata mudimu wa bumpanda-njila buambuluishi? Udiku mua kubabidila bisangilu bia buambi bilongolola munkatshi mua lumingu, tshilejilu pa kuikalaku mu ebi bilongolola ku dilolo anyi?

³ Bakulu nebatabalele ne ntema bua kuendela bantu mu teritware mujima. Bikala tshisumbu tshipangile mua kufika mu bimue bitupa bia teritware, nebalombe diambuluisha kudi bisumbu biena mutumba. Madikolela etu a muoyo umue ne diambuluishangana dia bisumbu nebikumbaje malu wonso.

⁴ Nudi nupeta bumue disanka divule mu buambi pa kumona ba bungi benze tshiabu tshitupa, bamanyishi bapiabapia pamue ne bansonga ba mu tshisumbu. Tudi batekemene se: disanka edi neditungunuke ne nedisake muntu yonso bua kukumbulaye tshiakabidi bantu bavua baleje dianyisha. Tudi bakankamijibue buonso bua kufunda malu masunguluke ku nzubu ne ku nzubu ne kuangata mamanyisha a aba badi ne dijinga dia kumanya bia bungi. Nebikumbane bua kutungunuka ne kuenza makumbula mapiamapia mu ngondo idi ilonda ne kuikala ne tshipatshila tshia kutuadija malonga a Bible.

⁵ Udi mua kuamba tshinyi paudi walukila? Neumone se: bidi ne dikuatshisha bua kuamba ne: “Udi muvuluke tshibejibeji tshimvua mukushile dituku adi; ndi mumone se: uvuaku mutshibale ne muele meji pa dibala diebe. Mukenji udimu mmusonsolole bushuwa diyukidilangana mu kartié kenu, bualu udi ujula nkonko ya mushinga mukole idi itangila bantu buonso.” Wakule pa amue malu adi ajula dielangana meji pa dibeji diibidi ne webeje nunku: “Mu kuebe kumona, ntshinyi tshitudi ne bua kuenza bua kudilongolola ku malu a matuku atshilualua?” Lekela muntu andamune. Bialejaye dijinga dia kumanya bia bungi, nukonkonone tunungu tukuabu mu mabeji 2-4 mu Ngumu ya Bukalenge, pashishe umuebeje bua dilonga dia Bible peshi, pikalaku kakuyi mushindu, umuleje bibejibeji bipatula mu matuku mashala aa.

⁶ Biwikale ufila bumanyishi mu teritware wa tshisumbu tshikuabu, sanka umanyishe dîna dia muntu yonso udi muleje dijinga dia kumanya bia bungi bua bamanyishi ba mu tshisumbu atshi bamone mua kuenza makumbula mapiamapia. Bia muomumue, biwapeshibua makumbula mapiamapia, kupangidi kuenza pa lukasa nansha.

⁷ Diabanya dia Ngumu ya Bukalenge eyi ndisonsole dijinga ne ndikankamije yonso wa kutudi bua kuenza madikolela mavule bua kuamba lumu lua Bukalenge. Tudi mua kushindika se: mudimu eu neulubuluke ne newambuluishe bantu pa buloba bujima bua kumanyabu bimpe dîna ne dilongolola dia mpatshi dia Yehowa. (Yesh. 12:4, 5) Mu mushindu utudi tudifile mu buambi tudi tupeta disanka.—Mus. wa 126:3.