Tuidikijayi tshitembelu tshietu pa kuikala batuadi ba butoke

¹ Yezu wakakula buende yeye mene se: “Ndi butoke bua bena panu.” Pa kuidikija tshilejilu tshiende, bayidi bende bavua pabu “butoke bua bena panu.” (Mat. 5:14, MMM.) Muikale “butoke bua bena panu,” Yezu uvua mua kuamba ne: buonso bavua bamulonda bavua ne bua kupeta “butoke bua muoyo.” (Yowanese 8:12 MMM.) Ebi bidi bituenza batuadi ba butoke bua mu nyuma, ne katuena mua kulekelela tshintu nansha tshimue kusokokatshi peshi kubuitshidijatshi butoke ebu nansha.

² Bulongolodi bua Yehowa budi butulongesha bua tuetu kuikala batuadi ba butoke bakumbane. Bitualonda bimpe mibelu ne bulombodi bitudi tupeta, netutokeshe bantu ba mishindu yonso pa bulelela bua Bukalenge. (1 Tim. 4:6) Kuleja ngikadilu wa batuadi ba butoke ki mbuena kuamba ne: kuakula amu bua bulelela ku musangu wonso udi dîba ditumuenekele, kadi nkutabalela kabidi bua kuikala ne ngikadilu muakane wa buena nkristo. Ewu uvua tshitembelu tshietu kavua ne kalema pa bualu. Tuetu badi bikale bayidi bende, tudi basue kuleja mu nsombelu wetu wa matuku wonso ne: buena nkristo ke budi nsombelu wetu. (Ef. 5:9; Tito 2:7, 8, 10) Tudi ne bua kukumbaja midimu milenga patoke, ke tshiasaka bakuabu bua kutumbisha Nzambi.—Mat. 5:16.

³ Bakalomba Ntemu kampanda uvua wamba lumu luimpe ku tshiibi ne ku tshiibi bualu bukena bua pa tshibidilu. Muena nzubu ne mukajende bavua basama, kadi bivua bikengedibua kuya kuela mfranga ku banke. Bakalomba diambuluisha kudi Ntemu. Yeye wakitaba ne bakamupesha dolare mipite pa 2 000. Pakalukilaye, wakebeja bena dibaka abu ne: “Mmunyi munuafiki kuikala ne dieyemena kundi pabi kanuyi bammanye?” Bakamuandamuna se: “Tudi bamanye, ne bantu buonso mbamanye se: Bantemu ba Yehowa mbantu bamuepele batudi mua kuikala ne dieyemena kudibu.” Mmushindu kayipu utudi mua kutunka pa kumona se: bulamatshi buetu ku mêyi-maludiki a mu nsombelu a mu Bible budi butupetesha butumbi kudi Nzambi!

⁴ Mulongeshi mukaji kampanda wakumvuija balongi bende bua tshinyi muana wa bakaji mukese wa bidimu bisambombo ne muikale Ntemu wa Yehowa kavua wenza dizola dia muladilu wa dituku dia bansanto buonso. Yeye wakumvuija ne: uvua utunkama bikole bua mulongi wende uvua kayi utshina kuleja dishilangana bua mitabuja ende. Wakasakidila se: padi muntu witabija bikole bualu kampanda, udi ne bua kuakula ne dikima dia kubingisha mmuenenu wende. Dilolo mene adi, mulongeshi wakakonkonona mitabuja ende ne kumonaye se: kavua ne dikima dia mushindu’eu. Dituku divua dilonda, wakamba ne: biangatshile apu, kakulomba kabidi balongi bende bua kubuelakanabu mu difesto kayi dionso; ne munda munda uvua mene mubenge amue a ku mafesto au!

⁵ Mu miaba yonso, basadidi ba Yehowa mbakankamijibue bua kukenkesha butoke buabu. Ngikadilu wa tshitembu wa bansonga mu tulasa udi ukemesha balongi nabu ne balongeshi babu. Bantemu bakulumpe bena ngikadilu mulenge badi basaka bena mutumba nabu bua kuendeshila mukenji wa bukalenge lumu luimpe. Bumanyishi bua mu mpukapuka butudi mua kuenza mu nsombelu mivule budi bukoka bena muoyo mutoke badi bajinga kumanya bia bungi pa bidi bitangila Nzambi. Kuikala bantu bajalame mu mudimu wetu ne kuwenza ne lubatshi mmushindu mukuabu wa bumanyishi. Kamuyi mpata nansha, muaba kayi wonso utudi ne nansha tuenza tshinyi, tudi mua kusonsolola dijinga dia kumanya bia bungi pa bulelela kudi bakuetu.

⁶ Batangile kudi tshitembelu tshietu tshipuangane, netutungunuke ne kudilengeja, tuetu bayidi bende. Bitualonda tshilejilu tshiende, netuikale ne dishindika dia se: butoke buetu nebukenkeshe bakuetu.—Mat. 5:15; 1 Petelo 2:21.