Tutumikayi ne dîba dietu biakane
1 Yehowa utu utabalela dîba. Mmusue ne: tuditabalele petu ne udi utuambuluisha nanku ku butuangaji bua bulongolodi buende. Tudi bakankamijibue bua ‘kuikala ne bivule bia kuenza mu mudimu wa Mukalenge.’ (1 Kol. 15:58, NW) Apu netuikale benji ba mudimu wa Yehowa bapiluke.
2 Tuetu buonso tudi ne mêba 168 ku lumingu. Tutuku tutumika nawu ne lungenyi anyi? Tudiku tuleja ne: tudi bamanye tshikondo tshitukadi mu tshibadilu tshia matuku tshia Yehowa anyi? Tudi tudilekelela mu ditanaji dia midimu mishadile anyi?
3 Mbia mushinga bua kuikala ne bulongame. Bena nkristo ba bungi badi benza madikolela bua kunemekela mulongolongo mufunda wa midimu ya kuenza kumpalampala. Mudimu wonso mmulonga pa kutangila mushinga wawu. Mmushindu kayi utudi mua kujadika tshidi tshia kumpalampala? Bible udi wamba se: muntu udi ne bua ‘kupeta disanka ku mudimu udiye wenze.’ (Ntoyi 3:13, MMM) Imue midimu idi ipatula mamuma mavule kupita mikuabu. Tangila bipeta biudi mua kutekemenaku. Udiku upeta difutu dilelela mu dienza dia mudimu kampanda peshi kansanga anyi? Udiku mua ‘kupeta disanka’ mu mudimu ûdi wenza anyi? Pikalabi kabiyi nanku, pamu’apa kautshiena mudimu wa kumpalampala nansha.
4 Mu mudimu wetu wa buambi: Tutu tuanyisha mushinga wa kumona bamanyishi bafika pa dîba mu bisangilu bia mudimu wa buambi, bateleja ne ntema mêyi mashidimunyi ne baya pa lukasa mu teritware. Pamutu pa kuindila, tudi tusanka bua kudifila mu buambi. Pa kumona, Paulo uvua menemene mumanye mushinga wa kuenza mudimu mu bulongame, bualu wakafunda ne: “Kadi malu onso enjibue bilengele, ne alondangane biakane.”—1 Kol. 14:40 NW.
5 Patudi mu buambi, tudi pamu’apa tujimija dîba dia mushinga pa kuikisha patupu. Kadi, padi tshikondo tshikale tshibi, kuikisha kudi mua kutusansamuja ne kutuambuluisha bua kutungunuka ne mudimu wetu. Apo, bamanyishi ba bungi badi banyisha kuamba lumu luimpe ne kabayi batumika ne dîba dia mudimu wa buambi bua kuikisha patupu pamue ne bana betu ba balume ne ba bakaji bakuabu. Bidi bikengela kuikala ne nkatshinkatshi pa bualu ebu.
6 “Nansha tusongo nyunyu . . . tudi tumanye bikondo biatu” bua kumuangala; kankenene, ‘kadi kadilongoluela bidia biaku mu tshitshia tshia luya’ bua kuakama tshikondo tshia mashika, ke mudi Bible wamba. (Yel. 8:7; Nsum. 6:6-8) Etshi ke mubelu muimpe wa mushindu wa kutumika ne dîba biakane. Tudi petu ne bua ‘kumanya bimpe bikondo bietu bijadika.’ Tudi ne bua kutabalela dîba, kabiyi ne dîsu dikole dinekesha. Tudi tukengela kumanya tshitudi ne bua kuenza, ne dîba ditudi ne bua kutshienza. Tudi ne bua kupia tshibidilu tshia kulongolola midimu yetu pa kutabalela bipumbishi bia mu mpukapuka. Bidi bijinga kabidi kuikala banyisha bua kuimanyika imue midimu bua kudifila mu mikuabu ya mushinga bu mudi dilongolola dia bisangilu, buambi ne midimu mikuabu ya teokrasi.
7 Tudi basue kufuana Tatuetu wa mu diulu, Yehowa Nzambi, udi utulongesha ne: “tshintu tshionso tshidi ne tshikondo tshiatshi.” (Muambi 3:1) Pa kutumika biakane ne dîba dietu, netuikale mua ‘kukumbaja menemene mudimu wetu wa Nzambi.’—2 Tim. 4:5.