Bikondo Bidi Bishintuluka

¹ Bible udi utumanyisha ne: ‘tshimuenekelu tshia malu a pa buloba tshidi tshishintuluka.’ (1 Kol. 7:​31) Mmunyipu mudibi bilelela lelu’eu! Mu bule bua tshikondo tshia muoyo wetu patupu, tudi bamone mashintuluka manene mu ngelelu wa meji ne mu ngikadilu ya bantu ba nsombelu kayi yonso. Bituasua bua mukenji wa Bukalenge kulengawu mitshima yabu, tudi ne bua kuumanyisha bilondeshile dishintuluka dia bikondo. Tudi tujinga kufila lumu luimpe mu mushindu wa kusonsola dijinga dia bantu dia kumanya bia bungi ne kulenga mitshima yabu.

² Kukadi bidimu bungi kampanda bipite, mudimu wa bumanyishi uvua mushilangane mu matunga mavule, bualu bantu ba bungi bavua ne nsombelu wa ditalala ne badiumvua bakubibue. Malu a Nzambi avua pa muaba wa mushinga mu nsombelu wabu; Bible uvua muanyishibue bikole. Misangu mivule mu buambi, tuvua ne bua kuyukidilangana pa mitabuja. Lelu’eu, nsombelu wa bantu mmusaluke. Bantu badi bapetula malu a Nzambi. Bakese ke badi bitabuja Bible, ne malongesha a didimenena mmabutule ditabuja dia bantu bavule kudi Nzambi.

³ Mutangidi kampanda muena ngendu wakamba ne: “Lelu’eu, bantu badi basumpakana ne badi ne ntatu mivule, bimueneka ne: tudi ne bua kubalongesha mua kulombolabu nsombelu wabu.” Bantu badi baditatshisha nangananga bua nsombelu wabu nkayabu, wa dîku diabu ne tunyinganyinga tuabu. Ke malu atubu bapita kuyukila padibu popamue. Tudi ne bua kuelelapu meji patudi mu mudimu wa bumanyishi.

⁴ Bukalenge bua Nzambi ke ditekemena dimuepele dilelela bua matuku atshilualua: Bantu bavule kabena ne dieyemena mu makalenge a bantu nansha. Badi bela meji ne: kabenaku mua kuikala ne diakalenga dia kusomba mu bulongolodi bulenga padibu batshikale ne muoyo nansha. Ntendelelu wa dishima ki mmufike ku dibapetesha kabingila nansha kamue ka ditekemena. Ke bua tshinyi, tshidi bantu bakengela menemene nkuteleja lumu luimpe lua Bukalenge bua Nzambi. Tukokayi ntema ku Bukalenge ebu ne tulejayi se: nebujikije ntatu yonso ya bukua-bantu.

⁵ Bible ke mpokolo umuepele udi ne mibelu ya kueyemena: Lelu’eu, bantu bavule mbalobeshibue kudi balombodi badi bashindamena pa meji a bantu ne pa nkindi ya bulongolodi ebu. Nenku bantu badi mua kujadika ne: “Muntu udi wenda kêna ne bukokeshi bua kulombola dikasa diende.” (Yel. 10:​23, NW) Bualu bulenga budibu mua kumanya mbua ‘kueyemena Yehowa ne mutshima wabu mujima ne kubenga kushindamena pa lungenyi luabu nkayabu.’ (Nsum. 3:⁠5) Bikondo bidi bishintuluka, kadi ki m’Bible nansha. Nenku, tudi ne bua kuteka matuku onso Dîyi dia Nzambi kumpala mu mudimu wetu ne kulongesha bakuabu bua kujingululabu mushinga wa buludiki bua Nzambi budidi difila. (2 Tim. 3:​16, 17) Bua nanku, tudi ne bua kuleja bantu mushinga wa Bible pa kushindamenapu mu maleja etu, pa kutumika nende bua kuandamuna ku nkonko yabu ne pa kuela kashonyi pa mushinga wa kumulonga ne kutumika ne meji adimu.

⁶ Nansha mudi bikondo bishintuluka mpindieu, bipatshila bietu mu mudimu bidi anu bimue bimue ebi. Tudi ne bua kumanyisha lumu luimpe lua Bukalenge, kukolesha dieyemena dietu mu Dîyi dia Nzambi ne kuambuluisha bakuabu bua kumanyabu mushinga wa kulonga Bible pamue netu. Bitudi tuamba bidi ne bua kuikala mu diumvuangana ne makengedibua a lelu a aba batudi tupetesha bumanyishi. Pa kuenza nunku, netulue benji ba mudimu wa lumu luimpe pamue ne bakuabu, ne netupete bakuabu bantu bavule.​—⁠1 Kol. 9:​19, 23.