Luibaku Lua Nzubu Ya Bukalenge Mu États-unis

¹ Patudi tutangila mudimu muenza pa buloba, tudi bakankamija pa kumona didiunda dinene didi dienzeka mu bulongolodi bua Yehowa bua pa buloba. Tshidimu tshishale, bakenza bisumbu 246 mu États-Unis ne bisumbu 3 288 biakaledibua pa buloba bujima. Ne didiunda dia mushindu’eu, kabiena bikemesha bua kuikalaku dijinga dinene dia Nzubu ya Bukalenge.

² Bana betu bavule ba balume ne ba bakaji badi baleja lukunukunu lua pa bualu ne batua bulongolodi bua Yehowa nyama ku mikolo pa kufila ne budisuile buonso dîba diabu ne bintu biabu mu muanda udi utangila luibaku lua Nzubu ya Bukalenge. Komite yonso ya luibaku 75 ya rejon idi mu États-Unis, yonso wa kudiyi udi utangila bisumbu 140 bimukosela. Tshidimu tshionso, badi basa Nzubu ya Bukalenge mitue ku 200 ne balongolola mikuabu 200. Bujitu bua mapangadika onso aa mbuomekela komite ya rejon, ne mudimu udiyi yenza mmuanyisha bikole. Bionso bidi bienzeka mu luibaku lua Nzubu ya Bukalenge mbiendesha kudi lungenyi lua buena-nkristo lua difila ne kuleja didibenga, lungenyi lushilangane kule ne kule ne lua mu bulongolodi ebu.​—⁠2 Tim. 3:2, 4.

³ Mu lungenyi lua kuibaka mu mushindu wa muomumue, Société mmupeshe komite ya rejon tshisumbu tshia plan ya kulonda ya Nzubu ya Bukalenge bua mu États-Unis, imue ya ku plan eyi mmizola ku ordinatere. Ndongoluelu eu udi wambuluisha bua kubenga kujimija dîba patupu ne bua kubikila badisuile bakese. Didi diambuluisha kabidi mu ditumika dia meji ne Mfranga ya Société bua Nzubu ya Bukalenge. Mu bikondo bietu ebi, bakulu batu benza disungula diabu pa kushindamena pa plan eyi. Pakamanabu kupeta tshiamu tshia mudimu etshi tshipiatshipia, komite kampanda wa luibaku wa rejon wakamba ne: “Tuvua ne disanka dia bungi ne, bua kuamba bionso, tuvua basangale mutuvua bapete plan eyi. . . . Bana betu ba balume bapiluke mu malu a luibaku badi baleja ne: ditumika ne plan eyi didi dituambuluisha bua kukepesha dîba mu bungi bua bia pa lukama 50 too ne 60. Abi nebituambuluishe kabidi bua kulongolola ngenzelu mifunda mitambe kuakanangana ne mikuatakane bua Nzubu ya Bukalenge.” Bu mudi bisumbu bileja lungenyi luimpe lua dienzejangana mudimu ku dikuatshisha diabi mu diakajangana dia Nzubu ya Bukalenge, tudi tutekemena bua se: bujitu buambula ne muoyo mujima kudi bazodi ba plan, bashikuluji ba malu a luibaku ne bamfumu ba kumpanyi badi bafila diambuluisha diabu ne budisuile, bupepele mu mushindu muimpe.

⁴ Badisuile badi batue mudimu mutambe buimpe nyama ku mikolo: Société udi uleja dianyisha diende kudi badisuile bavule badi badifila mu luibaku lua Nzubu ya Bukalenge. Bidi bimpe bitambe bua kumona makumi a binunu a badisuile badifila mu bitupa bionso bia mudimu eu. Dilubuluka dia programe wa luibaku didi dienzeka bua lungenyi lua budisuile, lua kalolo ne lua dituishangana bianza luleja kudi badisuile badi bafila dîba diabu divuabu mua kupitshishila ku malu makuabu mu bisumbu biabu ne pamue ne mêku abu. (Mus. 110:3; Kolos. 3:23) Mmuenenu eu mûle tente ne dinanga mmuakanyine ka-lumbandi, dianyisha ne dikuatshisha dietu didi kadiyi ndekelu.​—⁠Lomo 12:10; Eb. 13:1.

⁵ Mbilombibue bua bonso badi ne mamanya bua kuambuluisha ku musangu ne ku musangu komite ya luibaku ya rejon kuujabu formilere ya Construction des Salles du Royaume — Questionnaire pour les volontaires (S-82) (Luibaku lua Nzubu ya Bukalenge​—⁠Nkonko bua badisuile). Tshisumbu ke tshidi tshitumina komite wa rejon formilere eyi bua kumumanyisha mamanya a badisuile ne didiakaja diabu. Padi nsombelu wa mudisuile kampanda ushintuluka, tshilejilu padiye umuangala peshi bamuteka musadidi wa mudimu anyi mukulu, bidi bimukengela bua kuuja pa lukasa formilere mupiamupia, watumabu kudi sekretere wa tshisumbu. Bikala muntu katshiyi ukumbaja malu-malomba, bakulu badi ne bua kumanyisha diakamue komite wa rejon mu mukanda mufunda. Binuikala dijinga ne mabeji a bungi a nkonko, nenuikale mua kualomba pa formilere wa ku ngondo wa Dilomba dia mikanda. Tshilumbu etshi tshia liste wa mêna a badisuile badi badifila mu tshitupa etshi tshia mudimu wa tshijila tshidi tshitangila kabidi mutangidi wa tshijengu. Nunku, musangu wonso udiye ukumbula tshisumbu, udi utangilula fishi ya nkonko bua badisuile.

⁶ Tukepeshe bikole mfranga mitula mu luibaku: Komite ya luibaku ya rejon idi ne bukenji bua kulongolola mudimu wa disumba bintu mulombola kudi mukulu mukumbane. Bana betu ba mu mudimu eu badi bakonkonona ne lubatshi luonso bintu bibaleja bua kubipeta ku mushinga muimpe, badi benza difuanyikija dia bintu ne ditembangana diabi. Mu dienza nunku, badi mua kujadika basumbishi bashala ba tshibidilu ne bintu biasumbabu. Imue misangu, mu dienza dipangadika dia kuasa Nzubu wa Bukalenge, batu babikila bana betu bakumbane ba mu tshisumbu bua kufilabu diambuluisha diabu kudi bena mu mudimu eu.

⁷ Bua nuenu kujadika ne: kanuena nutulakaja mfranga tshianana, nudi ne bua kumanyisha komite wa luibaku wa rejon bungi buonso bua mfranga mitula bua luibaku bua kufilaye dianyisha diende, ne kutuaye tshiala pa sheke peshi pa faktire. Padi dipangadika dia luibaku peshi dilongoluesha dia Nzubu wa Bukalenge dikengela diambuluisha dia badisuile ba mu bisumbu bikuabu bikala kabayi mua kudisangisha mu nzubu eu, komite wa rejon neikale ne bujitu bua ditangila mudimu eu.

⁸ Nebalombe mfumu yonso wa kumpanyi wa midimu kampanda udi wenza mukanda wa tshipungidi bua kuenza mudimu pa Nzubu wa Bukalenge kampanda bua afile tshijadiki tshia se: udi ne tshieya bua kuambula bujitu bua bena mudimu bende dîba didiku bualu, ne tshieya bua kudiambuilaye bujitu buende padi bualu bujuka, ne tshieya atshi ntshia mfranga mikumbane mua kuambuluisha, pa kuleja ne: tshisumbu ntshibueja patshi mu tshieya etshi ne witaba bua kudibudisha bimue bintu peshi mfranga bua kutshiambuluisha.

⁹ Diambuluisha dipesha filiale mikuabu: Bitu bienzeka ne: filiale mikuabu ikale dijinga ne diambuluisha dia komite wa luibaku wa rejon wa États-Unis. Bitu nunku nangananga padibi bua dilongoluesha nzubu minyangakaja kudi tshipupu kampanda anyi bua kulongesha bena mu komite wa luibaku wa rejon wa muaba au. Bana betu badi ne majitu mu mudimu eu ne badi badiakaje bua kuya mu matunga menyi, ku mfranga yabu, bua kuambuluisha bakuabu badi bafila tshilejilu tshilenga tshia dinanga. Padibu banyisha dilomba dienza kudi filiale kampanda, Société udi ubikidisha komite wa rejon udi pamu’apa kayi ne mudimu wa bungi wa luibaku mu rejon wende bua tshikondo atshi. Pa nanku, badi balongolola malu biakane.

¹⁰ Bu mudi dijinga dia Nzubu ya Bukalenge mu matunga makuabu dikale anu dienda divula, bidi bikengela kukuba mfranga idiku ne meji. Mukanda wa mu dia 15 Kabalashipu 1995 mutumina bisumbu bionso bia mu États-Unis, mmutukankamije bua kuepuka butulavi bua mfranga mu luibaku peshi dilongoluesha dia Nzubu ya Bukalenge. Dilomba edi diakapeta diandamuna dimpe ditambe. Bu tshipeta, anu bu muvuabi bimanyisha mu Mudimu wetu wa Bukalenge wa Luabanya 1997 (États-Unis), tshitupa tshia Mfranga ya Société bua Nzubu ya Bukalenge tshidi mpindieu tshilama bua disombesha bisumbu bia mu amue matunga mudi mumueneka dijinga dinene dia Nzubu ya Bukalenge, kadi kaayi ne mfranga mikumbane bua kujikija mudimu ne mikale mu nsombelu mukole wa mfranga.

¹¹ Annuaire 1997 udi wela kashonyi pa dikengedibua dia kuikala ne Nzubu ya Bukalenge mivule mu amue matunga. Kudi matunga bu mudi: Ukraine, muakasabu Nzubu ya Bukalenge 47 too ne ku mpindieu, ne batshidi mu diasa mikuabu 56. Mbimueneke patoke ne: kudi dijinga dinene mu matunga aa. Ke tshidi luapolo kampanda luleja: “Mu Russie, badi dijinga ne Nzubu ya Bukalenge mivule. Bungi bua Bantemu budi buenda buvula lukasalukasa, kadi bisumbu 85 pa lukama bidi bilombola kudi filiale wa Russie kabiena ne miaba mijalame ya bisangilu nansha. Mu Zimbabwe, mudi bisumbu bitue ku 800, bivule bia kudibi bitu bidisangishila pambelu. Bu tshipeta, bamue bantu badi basankidila bulelela kutshidi matuku makese badi badikanda bua kubuela mu bisangilu.” Nsombelu imue-imue eyi itu kabidi ku Mputu wa ku Est, mu Afrike ne mu Amerike latine.

¹² Bushuwa, mu matuku aa a ku nshikidilu, dinanga dia bantu ba bungi didi dikepela, kadi bantu ba Nzambi badi batungunuka ne kulejangana dinanga diabu, dinanga didi kadiyi ne kansungasunga ka dikoba peshi mikalu ya matunga. (Mat. 24:12) Pa kuidikija Tatu wetu wa mu diulu, tutungunukayiku ne kuleja dinanga bu nunku pa kutua ne budisuile luibaku lua Nzubu ya Bukalenge nyama ku mikolo, mu États-Unis ne mu matunga menyi! Mu dienza nunku, netupete dianyisha ne mabenesha mavule bia Yehowa.​—⁠Mal. 3:10; Eb. 6:10.

[Addition on page 4]

Luibaku Lua Nzubu Ya Bukalenge Pa Buloba Bujima

¹ Dijinga dia Nzubu ya Bukalenge ndinene pa buloba bujima. Munkatshi mua tshidimu tshia mudimu tshia 1996, mbenze bisumbu 3 288, bia bungi bikale mu Afrike, mu Amerike wa pankatshi, mu Amerike wa ku Sud, mu Azi ne mu Mputu wa ku Est.

² Nimero ya musangu mushale ya Mudimu wetu wa Bukalenge mmifile luapolo lua dilubuluka dipeta mu luibaku lua Nzubu ya Bukalenge mu matunga mavule. Pabi, Luapolo idi ileja ne: kudi anu Nzubu wa Bukalenge umuepele mu ditunga kampanda didi ne bisumbu 568. Mu dikuabu ditunga, mudi Nzubu wa Bukalenge 1 bua bisumbu 129. Miaba mikuabu kabidi, kudi nzubu 1 bua bisumbu 41. Mu matunga makuabu mavule mudi bisumbu bitue ku 1 000, kakuvua mushindu wa kuasa nansha Nzubu wa Bukalenge umuepele, ne bine abi anu bua ntatu ya lupetu. Mudimu munene mmumana kuenza, kadi kutshidi bia bungi bia kuenza. Tudi bajadike ne: bana betu ba mu États-Unis nebanyishe bua kuambuluisha bisumbu bia mu matunga menyi bidi kabiyi ne Nzubu ya Bukalenge miakanyine.

³ Ke tshidi mu diumvuangana ne 2 Bena Korente 8:14 (MMM), udi wamba ne: “Bua bualu budi panshi ebu, bienu bidi bisambuke nudi mua kuambuluisha nabio badi mu dikenga.” Mu matunga kabukabu mbalongolole Mfranga bua Nzubu ya Bukalenge, kadi nsombelu wa lupetu kena upetesha bana betu mushindu wa kuasa nzubu bilondeshile bungi bukengela. Kadi, ne diambuluisha dia bana betu ba mu matunga makuabu, Société mmutue mpanda ku luibaku lua Nzubu ya Bukalenge 413 ne ku dilongoluesha dia mikuabu 727 mu matunga mashilashilangane 75, ne bine ebi anu mu ngondo inayi patupu. Bu mudi dilomba ditshikale anu dinene, bidi bikengela kuangata lupetu mu yetu Mfranga bua Nzubu ya Bukalenge bua kutua mpanda ku luibaku mu matunga menyi. Mu ditungunuka ne disombesha bakuabu mfranga bua luibaku lua Nzubu ya Bukalenge idi ikengela mu États-Unis, padi majinga makumbaja ne mfranga mikalaku, netutumike kabidi ne mfranga yetu bua kuambuluisha bisumbu bikuabu ku babende. Tudi ne disanka dia kuenza tshietu tshitupa mu luibaku lua Nzubu ya Bukalenge mivule pa buloba bujima, bua butumbi bua Yehowa.​—⁠Mus. 102:16; Hag. 1:7, 8.