Tudi ne bua kuikala balongeshi, ki ng’anu bayishi

¹ Muntu kampanda wakamba ne: “Bantemu ba Yehowa mbuuje bushuwa buloba ne bumanyishi buabu.” Mmunyi? Mudimu eu wa bumanyishi ki mmuenzeke ku bukole bua muntu, kadi nku buenzeji bua spiritu wa Nzambi pa basadidi bende, bu mudibu bababidila malongolola mashilashilangane menza bua kukumbaja mudimu mubapesha wa kuyisha ne kulongesha.​—Zek. 4:6; Bien. 1:8.

² Mabeji matuta ku biamu adi mushindu muakanyine wa dikumbaja mudimu wetu wa buambi. Mu kupita kua bidimu, Bantemu ba Yehowa mbapatule ne babanye miliyare ya mikanda, broshire, bibejibeji ne trakte bua kumanyisha lumu luimpe lua Bukalenge. Luapolo mifila mu Annuaire 1997 idi ileja ne: dipatula dia mikanda ndifike ku bungi bubandile bikole. Lelu’eu, Bible ya Traduction du monde nouveau mmipatula bungi bupite pa miliyo 91. Mu bule bua tshidimu tshimue, dipatula dia Tshibumba tshia Nsentedi ne Réveillez-vous! mu États-Unis ndibande ne bia pa lukama 7,1. Mu Allemagne, ndibande ne bia pa lukama 35. Bungi bupite pa tshia bisatu tshia bibejibeji bipatula kudi filiale wa ditunga edi bivua bia kutuma mu Russie.

³ Bua tshinyi bidi bikengela mikanda ya bungi nunku? Pa buloba bujima, mbandamune bimpe bia dikema ku dilomba dia kufila bumanyishi miaba yonso idi bantu. Bavule ba kutudi badi badiundisha mudimu wabu pa kuyisha mu miaba ya bantu bonso, mu misesu ne mu turtié tua bangenda; bu tshipeta, kudi divula dia bungi bua mikanda mishila bantu badi baleja disankidila. Bavule ba kudibu bavua bapete misangu anu mikese, anyi kabavua nansha bapete pa kutelejila mukenji wa Bukalenge. Bua kukumbaja dijinga edi, bisumbu bidi ne mikanda kabukabu mienza bua bitupa bishilashilangane bia mudimu.

⁴ Tudi tuabanya mikanda ne tshipatshila kayi? Tshipatshila tshietu ki ntshia kuabanya mikanda patupu. Mudimu mutupesha bua kuenza bayidi udi ne nseke ibidi: kuyisha ne kulongesha. Tshia kumpala, tudi ne disanka dia kuyisha lumu luimpe lua Bukalenge, mmuomumue ne: kuenza bua bantu bamanye se: Bukalenge ke ditekemena dimu’epele dia bukua-bantu. (Mat. 10:7; 24:14) Mikanda yetu mishindamene pa Bible idi midileje ya dikuatshisha milonga bimpe ne miakanyine bua kujula dijinga dia kumanya bivule pa Bukalenge ne kufila dimanya pa bualu ebu.

⁵ Tshibidi, bituikala basue kuenza bayidi, tudi ne bua kulongesha malu onso avua Yezu mutumine dîyi. (Mat. 11:1; 28:19, 20) Apa kabidi, mikanda idi ne mushinga mukole mu madikolela etu bua kubueja bulelela mu mitshima ya balongi, tubambuluisha bua balue bayidi.

⁶ Pamu’apa bantu badi bangata mikanda badi ‘bumvu ba dîyi,’ kadi bituapanga kubambuluisha, bumue kabena mua kulua benji baadi nansha. (Yak. 1:22-25) Bakese ke balua bayidi bikalaku kakuyi muntu udi ubalombola. (Bien. 8:30, 31) Bidi bikengela mulongeshi bua kutuishibuabu bua bulelela buleja mu Mifundu. (Bien. 17:2, 3) Tshipatshila tshietu ntshia kubafikisha ku dienza malubuluka too ne ku didilambula kudi Nzambi ne ditambula, kabidi ne kubashidimuja mushindu wabavuija bakumbane bua kulongesha bakuabu.​—2 Tim. 2:2.

⁷ Bidi bikengela nangananga bua balongeshi bavule bikaleku: Patudi tuyisha, tudi tuamba lumu luimpe patoke. Kadi, kulongesha muntu, nkumushidimuja ku kakese ku kakese. Padi eku diyisha dipetesha muntu netu mukenji wa Bukalenge, dilongesha didi dimuambuluisha bua kuitaba lumu luimpe ne dimusaka ku dienza. (Luka 8:15) Mulongeshi udi wenza bivule kupita dimanyisha: udi umvuija, welangana meji pa ngenyi mishindame, ufila bijadiki ne udileja muitabijiji.

⁸ Ba bungi ba kutudi badi ne bua kuikala balongeshi, ki ng’anu bayishi. (Eb. 5:12a, NW) Dimuangalaja dia mikanda ntshitupa tshinene tshia mudimu wetu, kadi dipatula bipeta bimpe mu dikumbaja dia tshipatshila tshibidi tshia mudimu wetu ndisuikakaja, ndekelu wa bionso, ku bitudi tuenza bua kulongesha. Nansha bikalabi bitusankisha bua kuabanya mikanda, bituikala basue kukumbaja tshishiki mudimu wetu, katuena ne bua kuela meji ne: atshi ke tshipatshila tshietu tshionso. (2 Tim. 4:5) Mikanda itudi tushiya idi ipetesha mishindu mivule ya kulongesha muntu netu bulelela.

⁹ Tuenze makumbulula bua kutuadija malonga a Bible: Mbimueneke se: muntu yonso wa kutudi ukadiku mushiye mikanda, broshire ne bibejibeji bungi kampanda, ne ebi biakapetesha mushindu wa kuenza makumbulula. Tudi ne bua kulongolola tshikondo pa tshibidilu bua kukolesha dijinga dia kumanya. Patudi tualukila bua kutangila bantu, tshipatshila tshietu tshinene katshiena anu bua kubashila mikanda mikuabu, kadi mbua kubakankamija bua babale eyi ikadibu nayi bua kulongelamu bivule. Bu bikale muntu kavua mulue kututangila njila ne njila bua kutuambuluisha bua kupeta dimanya dijalame, mmunyi mutuvua tuetu bine mua kuenza malubuluka?​—Yone 17:3.

¹⁰ Tudiundishe dijinga dia kumanya kayi dionso ne tshipatshila tshia kutuadija dilonga dia Bible, dikala mua kushindamena pa broshire wa Ntshinyi tshidi Nzambi utulomba? anyi pa mukanda wa Dimanya didi difikisha ku muoyo wa kashidi. Mikanda ibidi eyi idi imanyisha mukenji wa Bukalenge mu mushindu mupepele bua kumvua. Broshire wa Utulomba udi ne dilongesha dijima dia Bible didi dikonkonona malongesha a nshindamenu a Bible. Mukanda wa Dimanya udi wambuluisha bua kulongesha bulelela mu buondoke, kadi bikale mu mushindu mupepele, mutokesha ne mujadika biakane.

¹¹ Anu mudibi biumvuija mu tshisakidila tshia Mudimu wetu wa Bukalenge wa Kashipu 1996, programe eu mupepeja wa dilongesha udi ukepesha mudimu kudi mulongeshi ne kudi mulongi. Tuikale misangu yonso ne tshisakidila etshi bua kutangilula ngenzelu ya dilongesha ne ndongeshilu idi mipatule bipeta bimpe. Imue ya ku ngenyi-mifila idi yumvuija mushindu wa kutabalela mulongi ne muoyo umue, bungi bua ngenyi inudi mua kukonkonona mu dilonga dionso, mushindu wa kuandamuna ku nkonko idi kayiyi yumvuangana buludiludi ne tshiena-bualu, mushindu udi mulongeshi ne mulongi mua kudianjilabu kudilongolola ne mushindu wa kulombola mulongi ku bulongolodi bua Yehowa. Pa kutumikila mibelu eyi, bavule ba kutudi, pamue ne bapiabapia, nebafike ku dilombola malonga adi alubuluka.

¹² Imue luapolo idi ileja bipeta bimpe bipatula: Broshire wa Utulomba ne mukanda wa Dimanya bidi bimueneka bia diambuluisha dinene bua kuenza bayidi lukasa. Diakamue pakapeta muanetu kampanda wa mu ditunga dia Bolivie broshire wa Utulomba, wakatumika nende bua kutuadija dilonga ne muntu mukuabu. Panyima pa ngondo inayi, mu mpuilu wa distrike, muntu eu uvua munkatshi mua balumbidi ba batismo bena disanka!

¹³ Bavule batu badiumvua basakibue ku dilambula bumuntu buabu kudi Yehowa padibu bafika ku ndekelu kua dikonkonona dia mukanda wa Dimanya. Mu Angola, bungi bua malonga a Bible malombola kudi bamanyishi ba mu tshisumbu kampanda buakumbuka ku 190 kufika ku 260, eku bungi bua bantu badi babuela mu bisangilu buakavula misangu ibidi, bumbuke ku 180 bufike ku 360, anu mu ngondo inayi patupu panyima pa dituadija kutumika ne mukanda wa Dimanya mu teritware. Katupa kîpi pashishe, bivua bikengela kuenza tshisumbu tshipiatshipia.

¹⁴ Pakatuadija muanetu kampanda dilonga diende dia kumpala ne mukanda wa Dimanya, wakamba ne: ebi bivua “bipepele bikala muntu udi ulombola dilonga wela anu nkonko, ubala imue mvese miakanyine ne ujadika se: muntu mmumvue.” Uvua kumpala wela meji ne: anu bamanyishi bakumbane tshishiki ke bavua mua kulombola malonga a Bible adi alubuluka, ne se: yeye muine kavua mua kufika ku dienza nanku, kadi wakalua kumona se: uvua mua kukokesha ne wakamba ne: “Bingikala mua kuenza, nanku bantu bonso badi mua kuenza pabu.”

¹⁵ Pa kulombola malonga a Bible, adi tshitupa tshia mudimu wetu, tudi tukumbaja tshipatshila tshia kuenza bayidi. Aba batu balubuluja makokeshi abu mu tshitupa etshi tshia mudimu batu bapetelaku masanka malelela ne diakalenga dinene. Bambeku bua bualu buetu ne: tudi petu ‘tuyisha bukalenge bua Nzambi ne tulongesha ne dikima dionso’!​—Bien. 28:31, NW.