Mpungilu ya Distrike ya: “Dîyi dia mulayi dia Nzambi” bua 1999
1 Pakavua bena Isalele pa kubuela mu Buloba Bulaya, Mose wakabasengelela bua banyishe dibashidimuna kudi Nzambi. Wakabambila ne: ‘Ebu ki mbualu bua patupu kunudi; kadi budi muoyo wenu.’ (Dut. 32:45-47) Katuenaku ne dianyisha kudi Yehowa bua mudi muoyo wetu muikale ne mushinga mukole ku mêsu kuende ne utungunuka ne kutulombola ku diambuluisha dia Dîyi didi ne mushinga wa bungi anyi? Nunku tudi tuindila ne muoyo kulukulu Mpungilu wa Distrike wa: “Dîyi dia mulayi dia Nzambi” wenzeka matuku asatu ne malu adi Yehowa mutulamine.
2 Tshidimu etshi mpungilu ya distrike mmilongolola bua miaba 59 mu République démocratique du Congo. Mpungilu neenzeke mu Kiluba, Lingala, Mfualansa, Monokutuba, Otetela, Swahili, Tshiluba ne Uruund. Nekuikale kabidi ngakuilu wa misalu bua bampudi-matshi ku Kinshasa.
3 Kakuyi mpata ukadi mumane kudilongolola bua kuikalaku dituku dionso dia mpungilu bualu udi mumanye ne: Yehowa mmutekemene ne: newikalemu. Ikala mujadike ne: Yehowa udi umona madikolela a muntu ne muntu ne mudi basadidi bende badipangisha bimue bintu bua kubuela mu mpungilu, ne udi uvuluka badi baleja dianyisha. (Eb. 6:10) Pa kuikalaku dituku dionso dia mpungilu biangatshile ku musambu wa mbangilu too ne ku disambila dia nkomenu, tudi tuleja Yehowa ne: tudi tuangata mêyi ende ne mushinga. (Dut. 4:10) Tudi kabidi tuleja dianyisha dietu bua mudimu mukole muenza kudi bana betu ba bungi bua dilongolola dia mpungilu.
4 Kuakaja malu bua ne: binunu bia bantu ba Nzambi badisangishe miaba mishilashilangane bua mpungilu kudi kulomba didianjila kudilongolola ne dilombola malu bimpe. Kumanya kua ne: mpungilu mmitulongoluela ne dinanga dionso, kudi kutusaka bua kueleshangana diboko, bua ne: “malu onso enjibue bilengele, ne alondangane biakane.” (1 Kol. 14:40) Mamanyisha ne mavuluija adi alonda aa mmafila bua ne: umone mua kufika mu mpungilu mudilongolole bimpe bua kudia biakudia bia mu nyuma ne kulejangana bulunda ne bena Kristo nebe.
Kumpala kua mpungilu
5 Baudi ulonga nabu Bible ne bantu bakuabu badi basankidila bulelela badi dijinga ne diambuluisha bua kudilongololabu bua kubuela mu mpungilu anyi? Malu adibu bamona ne bumvua mu mpungilu adi mua kubasaka ku dilua batendeledi ba Yehowa. (1 Kol. 14:25) Bakulu badi ne bua kumanya muntu yonso udi dijinga ne diambuluisha bua muaba wa kulala ne mushindu wa kufika muaba wenzekela mpungilu, nangananga bakulakaje ba mu tshisumbu. Nebatabalele ne dinanga dionso bua se: majinga abu akumbajibue.—Gal. 6:10.
6 Ukadi mudilongolole bua muaba wa kulala anyi? Biwikala mupangadije bua kutudila kua bana betu mu tshikondo tshia mpungilu, ukadiku muenze dilomba dia muaba wa kulala anyi? Ukadi mumanyishe bungi bua bana bawalua nabu anyi? Sekretere wa tshisumbu udi ne bua kutuma pa lukasa ku muaba wa mpungilu dilomba dionso dia muaba wa kulala dianyisha kudi Komite wa mudimu. Mbia mushinga bua kudianjila kumanyisha kumpala kua dîba bana betu badi bajinga kuakidilangana, bua ne: badilongolole bua kuakidila benyi babu.—1 Kol. 14:40.
7 Bu mudi Tshibambalu tshia diondapa dia diambuluisha tshikaleku anu bua badi bakengela luondapu lua lukasa, tudi tukulomba bua ne: utuale manga ebe a aspirine, bia disuika nabi mputa, bia dikoka nabi manga, manga a diondapa dikutakana dia tshifu ne bikuabu bintu bia buena ebi biwikala mumone se: newikale nabi dijinga anu bu muutu nabi dijinga ku nzubu. Biwikala wewe, anyi munangibue kampanda, ne disama dia munanunanu bu mudi disama dia muoyo, diabete anyi mpalu, anyisha utuale manga a masama aa. Nebikale bia meji bua ne: muena mu dîku peshi mulunda udi mumanye nsombelu wa mubedi eu ikale nende pamue dîba dionso bualu yeye ke udi mumanye bimpe mua kumuambuluisha mudibi bikengela.
8 Mpunga ya kumanyisha lumu luimpe mu mpukapuka idi mua kumueneka mu njila paudi uya ne ufumina mu mpungilu. Neudilongolole bua kumanyisha bulelela kudi bakuabu anyi? Buonso buetu, pa kubala ne bana, tudi mua kudifila mu diabanya dia trakte kudi bantu batudi tupetangana nabu. Mpunga neyimueneke ya kufila bibejibeji, broshire, anyi mikanda mikuabu kudi badi basankidila bulelela. Ikala mudilongolole bua kumanyisha lumu luimpe mu mpukapuka kudi bantu batudi pamu’apa katuyi ne mushindu wa kuyisha pa tshibidilu to. Wewe muâse kabeji kebe ka tshimanyishilu paudi uya ne ufumina mu mpungilu, nebikupeteshe mishindu mivule ya kufila bumanyishi.
Dîba dia mpungilu
9 Dituku dionso nebunzulule biibi pa dîba 8:00 M.D. Udi mua kulama miaba anu bua bena mu dîku diebe anyi bua banudi bende nabu. Netulamine bana betu bakulakaje miaba mimpe ya kusomba ne kushiya muaba bua balema ne bua aba badi ne makalu a balema. Tudi basue kubanemeka ne kubaleja muoyo muimpe. Dituku dionso paudi umbuka muaba uudi musombe, utangile bua kujadika ne: udi muambule bintu biebe bionso.
10 Neutambule mu mpungilu wa distrike anyi? Mu Disambombo mu dinda nekuikale tshitupa tshia miaba milamina balumbidi ba batismo, ne bena mudimu wa diakidilangana nebakulombole ku muaba au. Bikalaku mushindu, anyisha wikale mumane kusombapu kumpala kua ndongamu kutuadijaye. Ulue ne Bible webe, mukanda wa misambu, tshilamba tshia kudikupula natshi mâyi ne tshia dinyibua natshi mu mâyi tshidi tshileja kanemu. Mipanu ya jeans mikosela mu binu, tupila tufunda miaku, ne bilamba bikuabu bia nunku ki mbiakanyine bua tshikondo tshia bunême tshia nunku to. Bakulu badi bakonkonona malu a mu mukanda wa Mudimu wetu ne balumbidi ba batismo nebikale mua kujadika bikala yonso wa kudibu mumvue bimpe malu aa. Bu mudi batismo muikale tshimanyinu tshia didilambula dia muntu nkayende kudi Yehowa Nzambi, kabiakuikala biakanyine bua balumbidi bakuatangane ku bianza dîba dia dinyibua mu mâyi to.
11 Nudi mua kulua ne biamu bienu bia foto, kamera ne radio-kasete mu mpungilu. Kadi, muaba wikalabi ne panudi nuenza nabi mudimu, kabiena ne bua kujika miaba ya kupitshila, kujika bakuabu bua kumonabu anyi kukuatshisha bateleji ditanaji. Bidi ne bua kuenza mudimu nkayabi kabiyi biasa ku nzembu peshi ku biamu bia dibandisha nabi mêyi mu mpungilu.
12 Bua kupeta dîba dia bungi ne kupepeja malu, Société mmutulombe bua kutuala biakudia bietu mu mpungilu matuku onso. Bana betu ba bungi mbalonde dîyi-dilombodi edi ne mbafike ku dimona se: mu diikisha dia midi, badi ne mushindu wa kusomba pamue ne mêku abu ne kudia pamue bidibu batuale bua dituku edi. Badi balonda ne: bavua ne disanka dia kupitshisha tshikondo tshilenga mu diikisha dia midi ne kumonangana kabidi ne bana betu. Ebi bidi bilomba bua kudianjila kusumba biakudia ne bia kunua kumpala kua dîba ne kubilonga mu tshitunga tshikese anyi kashete ka dilama mashika kadi mua kukumbana muinshi mua tshibasa. Tudi tulomba ne: bantu bonso balonde dîyi-dishidimunyi edi. Matuku adi mashale aa, basumbishi ba biakudia ba miaba ivua mpungilu yenzekela bakamona bamue bana betu bapatuka pambelu bua kuya kusumba biakudia ku bipanyishilu bia pabuipi apu. Basumbishi ba biakudia bakuabu ba miaba idi mpungilu yenzekela badi balomba mpindieu bua ne: babanyishile bua kusumbishabu biakudia biabu bua bantu badi babuela mu mpungilu yetu. Buobu mua kubanyishila nunku, bantu badi kabayi bena kuitabuja nebikale munkatshi muetu. Kabidi, difimpakana dia bantu ne diela milongo mile ku bipanyishilu nedipinguluke ne nedikutakaje nsombelu mudilekelele wa mpungilu yetu. Nunku, tudi tulomba ne: muntu yonso adienzeje bua kutuala biakudia biende ne bia kunua dituku dionso. Basankididi ba bulelela badi balue pamue nenu mu mpungilu badi pabu ne bua kutuala biabu biakudia. Milangi ne maluvu makole mbikandikibue bua kubuela nabi muaba wenzekela mpungilu.
13 Udiku mua kudifila ku budisuile bua kusukula dituku dionso muaba wenzekela mpungilu anyi? Peshi udiku mua kusadila mu tshimue tshia ku bibambalu bia mu mpungilu anyi? Biwikala mua kufila diambuluisha, suaku ulue ku Tshibambalu tshia Mudimu wa Budisuile. Bana badi ne bidimu bishadile ku 16 mbanyishibue pabu bua kuenza mudimu pamue ne muledi umue anyi muntu mukulumpe mukuabu. Bushuwa, muntu yonso udi mua kuambuluisha bua kumbusha butshiafu muaba wenzekela mpungilu pa kutabalela bua kuangula bintu bia bukoya bionso ne kubiela muaba mubilongoluela.
14 Tukadi bapete mêyi-malombodi malenga pa bidi bitangila mvuadilu ne ndengejilu wa nsuki ne mubidi mu mpungilu. Tshilejilu: Tudi ne mêyi-malombodi pa bualu ebu mu bisakidila bia Mudimu wetu wa Bukalenge, tudi ne bimfuanyi mu mikanda yetu, ne kupita bionso ebi, tudi ne mêyi a Yehowa adi mu Bible. (Lomo 12:2; 1 Tim. 2:9, 10) Bantu mbamanye tshitudi ne bua tshinyi tudi badisangishe mu musoko wabu. Nunku, mvuadilu wetu ne ndengejilu wetu wa nsuki ne mubidi mbumanyishi bukole. Bantu ba Yehowa ba bungi batu bafila tshilejilu tshimpe pa bualu ebu. Kadi imue misangu tutu tumona se: mvuadilu ne ndengejilu wa nsuki ne mubidi bia bakuabu batu babuela mu mpungilu yetu bitu bileja lungenyi lua bena panu. Bilamba bionso bidi bimuenesha mubidi, bidi bijula mpata kudi bantu bua tshitudi nansha tudiamba mutudi bashindame mu nyuma. Mmuenekelu wa budipope, wa mankenda ne mushemakane ke udi utamba kukoka ntema. Nunku, bamfumu ba mêku badi ne bua kutangila ne ntema bidi bena mêku abu bavuala. Bidi ne bua kuikala kabidi nunku patudi tumbuka muaba udi mpungilu wenzekela. Patudi tuvuala tubeji tua tshimanyishilu dituku dionso kumpala ne panyima pa mpungilu tudi kabidi tudimanyisha bu bantu ba Yehowa, bu bantu bakezuke.—Tangila Mâko 8:38.
15 Mukalenge wa meji Solomo uvua muenzeja ku spiritu ne wakafunda ne: ‘Bupote budi busuikibue mu mutshima wa muana’ ne ‘muana udibu balekela nkayende udi ufuishisha mamuende bundu.’ (Nsu. 22:15; 29:15) Munkatshi mua mpungilu, Bantemu bansonga badibu kabayi batangila batu basuya bana betu badi badienzeja mua kuteleja malu mu mpungilu. Mu mpungilu ya tshidimu tshishale etshi, bakamona bamue bansonga basombele muaba mubandile mu mpungilu ne benda bakenkesha bantu ne kamua kadi kapatula dikenke dikole (nsese ya laser). Dikenke edi dikole didi mua kushipa mêsu a bakuabu, nansha dikale mutantshi mule. Bidi bileja ne: bansonga abu kabavua bateleja ndongamu au wa malu a mu nyuma mubalongoluela to. Bu mudi baledi ne bua kuandamuna kudi Yehowa bua bikadilu bia bana babu, mamuende wa bana anyi tatuabu udi ne bua kujadika ne: bana badi bateleja ne batumikila dilongesha dia Yehowa anu bikalabu basombe nabu pamue. Bena mudimu wa bulongame nebayikile ne bantu badi bateka ditanaji ne nebabalombe bua balekele kuenza nanku; nebabambile kabidi ne bulenga buonso bua balonde ne ntema ndongamu wa mpungilu.
16 Bu mudi bantu ba tshianana babuela mu mpungilu yetu, bidi bia meji bua tuikale badimuke bua kutangila bana ne bintu bietu. Bana batudi balele ndipa dia mushinga mukole dia kudi Yehowa. Kadi tudi bamanye ne: bena panu badi ne lungenyi lua Satana lua dipawulangana. Nunku, nuikale dîba dionso bamanye muaba udi bana benu. Kabidi nuikale ne biamu bienu bia foto, ne tubuta tua mfranga, ne bikuabu bintu bia mushinga ku bianza dîba dionso ne kanubishiyi muaba unudi basombe to. Nuikale bajadike ne: biibi bienu bia mashinyi mbikanga, ne nubueje bintu bienu mu kapo kunyima kua mashinyi anyi nubiambule. Kuenza nunku kudi kuepula bantu bua kabatetshi kuiba bidi mu mashinyi.
17 Bidi bikankamija bua kumona bana betu bangata note mu mpungilu. Kuangata note mikese nekunuambuluishe bua kuteya ntema ne kulama malu manene mu lungenyi. Panudi nulua kubalulula note yenu pashishe ne mêku anyi ne balunda benu, nebinuambuluishe bua kuelangana meji pa malu manene a mu mpungilu ne mu mushindu eu kanuakuapua muoyo to.
18 Bantu ba Yehowa batu misangu yonso baleja muoyo wa kalolo pa kufila mapa bua kulubuluja bipatshila bia teokrasi. (Ekes. 36:5-7; 2 Kul. 31:10; Lomo 15:26, 27) Mapa ebe a budisuile mafila bua kukuatshisha mudimu wa pa buloba bujima neambuluishe bua kufutshila miaba ya dienzela mpungilu.
19 Anu mudibu bafunde mu Amosa 3:7, Yehowa udi wamba ne: ‘Kêna wenza bualu, bikalaye kayi muanji kubusokoluela bantu bende baprofete diambedi.’ Bu mudiye “Musokolodi wa malu masokoka,” Yehowa mmufundishe mu Bible nkama ya milayi ikadi mikumbane mu bujalame ne mu bujima buayi. (Dan. 2:28, 47) Kutshidi malaya manene adi ne bua kukumbana. Mpungilu wa distrike wa: “Dîyi dia mulayi dia Nzambi” bua 1999 neakoleshe ditabuja diebe mu malaya a Nzambi. Teleja ne ntema dîyi dia Yehowa. Tumikila malu awamona ne awateleja—mu buambi, mu tshisumbu ne mu nsombelu webe. Tudi tusambila Yehowa bua abeneshe bikole malongolola enu onso menza bua kuikalaku dituku dionso dia difesto dinene edi dia mu nyuma!
[Lungenyi lunene lua mu dibeji 3]
Dilongolola bua kuikalaku dituku dionso: Ditanu, Disambombo ne Dia lumingu!