Ngondo muinayi ntshikondo tshia kuenza midimu mimpe ne lukunukunu
1 Padi tshipepele tshikole tshienda tshisemena muaba udi bantu base, bidi bikengela kubadimuija pa lukasa bua njiwu idi mua kubafikila. Ne paditshi tshisemena pabuipi menemene, badi ne tshia kubadimuija bikole. Bua tshinganyi? Bualu bantu badi mu njiwu. Pamu’apa bamue kabavua bumvue didimuija dia kumpala to. Bakuabu bavua mua kuikala badiumvue kadi balengulula bua kudilonda. Ke mudibi kabidi bua mudimu udi Nzambi mutupeshe wa kudimuija bantu bangabanga ne “mvunde” wa tshiji tshiende tshiakane kuvululaye ne kubutula bantu babi bonso butubutu. (Nsu. 10:25) Bantu miliyare ne miliyare badi mua kupangila muoyo wa tshiendelele. Mbimpe tuetu kudimuija bantu. Tuikalayi ne “lukunukunu lua kuenza midimu mimpe.”—Tito 2:11-14.
2 Mbakankamije bantu ba Yehowa, kukadi bidimu bivule, bua kuikalabu ne lukunukunu lua pa bualu mu buambi tshikondo tshia Tshivulukilu. Mu muvu wa printemps mu 1939, Mumanyishi (tshitudi tubikila lelu ne: Mudimu wetu wa Bukalenge) wakakankamija bantu ne: “Bu muikala kuulu kuimpe mu muvu wa printemps ukadi pa kutuadija, tudi batekemene se: mêba enza mumanyishi [wa mu tshisumbu tshionso] mu buambi neavule misangu ibidi, ne enza mpanda-njila yonso neavule mushindu wa dikema. Ngondo muinayi udi ne matuku a Dia lumingu atanu. Udi kabidi ne matuku a Disambombo atanu. Udienzeje bua kuyisha bikole menemene . . . mu Disambombo ne mu Dia lumingu dionso mu ngondo muinayi.” Kukadi kupite mpindieu bidimu 60 pakadienzeja bana betu bua kulonda mubelu eu. Tshidimu etshi, anu bu muvuabi mu 1939, ngondo muinayi udi ne matuku a Disambombo ne a Dia lumingu atanu. Ntshinganyi tshiudi mulongolole bua kuenza ngondo eu? Mmalu kayi audi mufunde mu kalandriye kebe bua Tshisanga 2000? Longolola bua kuenza midimu mimpe mivule pamue ne bantu ba Yehowa mu ngondo eu wa pa buende mutudi ne bua kuvudija mudimu wetu wa mu nyuma.
3 Tshitudi batekemene bua kukumbaja: Dituku ditambe bunene dia tshidimu etshi didi mu ngondo eu. Mmu dia matuku 19 wa Tshisanga, dituku dia mufikilu wa lufu lua Yezu. Tuenzayi muetu muonso bua kubikila bantu ba bungi mu Tshivulukilu. Anu bu mutuvua baleje ngondo mushale, udi mua kufunda mêna a bantu bonso baudi mumone se: badi mua kulua mu Tshivulukilu ne kutabalela kabidi bimpe bua kupu muntu nansha umue muoyo to. Ku baudi ubikila kudi ne bua kuikala bamanyishi bakadi balekele kupatuka mu buambi, balongi ba Bible, bantu bauvua mulaye bua kubapinganyina, bauvua ulonga nabu kumpala, bena mudimu nebe, balongi nebe, bena mutumba, balela ne bamanyangana nabu bakuabu. Bantu badi banyisha bua kulua badi ne mushindu wa kufika kunuenzela tshisangilu etshi anyi? Pikalabu kabayi ne mushindu, udiku mua kubambuluisha? Tudilongolole bua kuakidila bilenga bantu balua mu Tshivulukilu dilolo adi. Kunyima kua Tshivulukilu, tudi mua kutungunuka ne kuya kuambuluisha bantu aba mu nyuma.
4 Kuikala ne “lukunukunu lua kuenza midimu mimpe” kumpala ne kunyima kua Tshivulukilu ke mushindu mulenga wa kuleja Yehowa dianyisha bua bionso bidiye mutuenzele. Ba bungi ba kutudi nebikale ne mushindu wa kuvudija madikolela abu mu mudimu wa diyisha lumu luimpe. Wewe muikale mpanda-njila muambuluishi, mbimpaku wenza muebe muonso bua kukumbaja mêba 50 anyi kupitshisha. (Mat. 5:37) Londa ndongamu uuvua mutuadije nende ngondo. (Muam. 3:1; 1 Kol. 14:40) Tuetu bonso tudienzejayi bua kukuatshisha bampanda-njila, pa kubakankamija ne kupatuka nabu mu buambi. (Tangila 2 Bak. 10:15, 16.) Tuetu bikale ne lukunukunu mu Tshisanga, tudi mua kutekemena masanka a bungi ne Yehowa neatubeneshe. (Mal. 3:10) Pamu’apa kuenza nunku nekutuambuluishe bua kutuadija petu bumpanda-njila buambuluishi peshi bua pa tshibidilu. Tuenzayi bua ne: luendu lua mu nyuma lutudi batuadije nalu mu Tshisanga tuye nalu too ne mu ngondo yalonda pa kutungunuka ne kumanyisha Bukalenge pa tshibidilu.
5 Kakuyi mpata, ngondo eu bantu ba Yehowa binunu ne binunu nebatuadije kulonga Bible ne bantu ba bungi. Udiku musue pebe kutuadija kulonga Bible ne muntu anyi? Sambila bua upete muntu wa kutuadija kulonga nende Bible ne enza madikolela bua kulonga ne bantu. Udi mua kuikala mutuishibue ne: Yehowa neanyishe milombu iudi wenza ne budipuekeshi ne neakuambuluishe bua upete muntu wa muoyo muimpe uudi mua kulonga nende Bible.—1 Yone 3:22.
6 Mona ka-tshilejilu kimpe kavua kapatule bipeta bilenga pa mushindu wa kutuadija diyuki ne muntu. Tuadija ne lukonko elu: “Pa kutangila tshiendenda ne malu a tshinyangu adi enzeka mu tulasa, udi umonaku bishi, bidi nunku mbua buenzavi bua ba-demon anyi peshi bualu baledi mbapangile mua kukolesha bana bimpe?” Indila andamune. Muntu yeye muandamune ne: mbua “ba-demon,” bala Buakabuluibua 12:9, 12, ne leja mudimu udi Diabolo wenza bua kujudija tshimvundu pa buloba. Pashishe bulula broshire wa Utulomba mu dilongesha 4, ne konka muntu bua akuambile bikalaye ukadi mudiebeje bua kumanya kudi Diabolo mufumine. Bala ne yukilayi pa bikoso bibidi bia ntuadijilu. Kadi bikala muntu yeye muandamune ne: mbualu “baledi mbapangile mua kukolesha bana bimpe,” bala 2 Timote 3:1-3 ne leja patoke kudi malu aa afumina menemene. Pashishe bulula broshire wa Utulomba mu dilongesha dia 8, bala tshikoso 5, ne tungunukayi ne diyuki dienu. Muntu yeye muanyishe bua kumupinganyina, bidi mua kukufikisha ku dituadija dilonga nende Bible pa tshibidilu. Pawaya kumutangila musangu walonda, wamukonka bikalaye mumanyeku muntu mukuabu udi mua kuanyisha pende malu adiye ulonga aa.
7 Mushindu mukuabu wa kuikala ne “lukunukunu lua kuenza midimu mimpe” mu ngondo muinayi ng’wa kuenza bitupa bionso bia buambi. Ukadiku muele meji bua kuya kuyisha mu parke peshi muaba utu mashinyi imanyina anyi? Muaba utu bise imanyina peshi ku ngala ya tuwulu? Peshi udiku mua kuteta kuyisha ku nshinga, mu misesu peshi ku makazen? Bua tshinyi kubenga kuteta bitupa bionso ebi bia buambi ngondo eu? Yehowa neakuambuluishe bua upete dikima didi dikengedibua. (Bien. 4:31; 1 Tes. 2:2b) Pamu’apa udi mua kumvuangana ne mpanda-njila umue ta mumanyishi udi mupiluke mu mishindu ya kuyisha eyi.
8 Muntu yonso udi musue kuvudija mudimu wende udi mua kudilongolola bua kuenza buambi bua mu mpukapuka. Tshia kuenza misangu yonso ntshia ne: muntu anyishe bua kuyikila nebe. Ki mbikole to, jula anu bualu kampanda budi butangila bantu bonso, pamu’apa udi mua kuenza mushindu udibu baleje mu tshikoso 6. Enza muebe muonso bua kuyisha nansha bua tusunsa tukese bua dîba kadijiminyi patupu to. Paudi usumba mafuta mu tshisalu, kuakubenga bua kuangata kakopu kamue anyi tubidi tua mafuta anu bualu katuena mulangi tente to. Kadi bu mudi kamue-kamue muikale wa ba dikumi, bua tshinyi kubengaku kuyisha mu mpukapuka nansha bua minite 5, 10, 15 peshi mene dîba dijima?
9 Tshikondo tshia kuela meji: Ela meji ku malu a mushinga avuabu batuleje mu drama wa tshidimu tshishale mu Mpungilu wa Distrike wa “Dîyi dia mulayi dia Nzambi.” Drama au (uvua ne mutu wa bualu ne: Tuanyishayi bumpianyi buetu bua mu nyuma) uvua utusaka bua kuela meji pa dishilangana dinene divuaku pankatshi pa Yakoba ne Esau. Esau wakamba ne: uvua munange malu a mu nyuma anu bu Yakoba, kadi malu avua Esau wenza kaavua aleja nanku to. (Gen. 25:29-34) Edi ndidimuija dikole buetu tuetu. Anu bu Yakoba, tudienzejayi bikole, tuluanganayi mene nansha kuluangana bua Yehowa atubeneshe. (Gen. 32:24-29) Bua tshinyi kubengaku kuangata ngondo muinayi ne mikuabu yalonda bua kufululula lukunukunu luetu ne nanku kuleja ne: katuena tupepeja bumpianyi buetu bua mu nyuma?
10 ‘Dituku dinene dia Yehowa didi pabuipi. Didi pabuipi ne didi didiendesha lukasa.’ (Sef. 1:14) Lumu luimpe lua Bukalenge ludi ne bua kuya kule. Bantu badi mu njiwu. Ngondo eu ikale wa pa buende utudi tuetu bantu ba Yehowa bonso ne bua kuleja ne: tudi ne “lukunukunu lua kuenza midimu mimpe.”
[Kazubu mu dibeji 4]
Malu a kuvuluka bua Tshivulukilu
Tshidimu etshi Tshivulukilu netshienzeke mu Disatu dia matuku 19, mu Tshisanga. Bakulu badi ne bua kuangata malu adi alonda aa ne mushinga:
▪ Panualongolola dîba didi tshisangilu etshi ne bua kuenzeka, nuadimukayi bua bimanyishilu kabipitshi kumpala kua dîba kadiyi dianji kubuela.
▪ Muntu yonso, ne ngamba-malu muine, badi ne bua kumanya dîba dijalame ne muaba wenzekela Tshivulukilu.
▪ Nudi ne bua kukeba ne kuteka pabuipi mampa ne mvinyo biakanyine.—Tangila Tshibumba tshia Nsentedi 15 Luishi 1985, dib. 17 (Mfual.).
▪ Nudi ne bua kulongolola malongo, mesa, vere ne tshilamba tshia pa mesa kumpala kua dîba.
▪ Nudi ne bua kukomba anyi kusukula bimpe Nzubu wa Bukalenge peshi muaba mukuabu wenzekela tshisangilu etshi kumpala kua dîba.
▪ Nudi ne bua kudianjila kusungula bakididianganyi ne bapitshishi ba bimanyishilu ne kubaleja midimu yabu ne mushindu wayenzabu.
▪ Nudi ne bua kulongolola bua kutuadila muela manyi yonso udi mulema anyi udi kayi ne mushindu wa kufika mu tshisangilu etshi bimanyishilu muaba udiye.
▪ Bisumbu bidi bisangile Nzubu wa Bukalenge umue bidi ne bua kumvuangana bimpe bua kuepuka diunguila patupu mu mushiku wa mbelu, ku luseke lua njila ne pa muaba wa dimanyikila mashinyi.