‘Dîyi dia Nzambi didi ne bukole’

¹ Mupostolo Paulo wakafunda ne: ‘Dîyi dia Nzambi didi ne muoyo ne bukole.’ (Eb. 4:12) Ntshinyi tshivuaye usua kuamba? Uvua usua kuamba ne: Dîyi dia Nzambi (peshi mukenji udi mu Bible) didi ne bukole bua kufikisha bantu ku dienza malu kampanda. Meji adi nau Bible adi ne bukole bua kulengeja nsombelu wa muntu. Dikuatshisha ne ditekemena didi Bible ufila didi difikisha bantu ku dinanga Yehowa Nzambi mufidi wa muoyo. Mukenji udi mu Bible udi mua kufikisha bantu ba mioyo miakane mu njila wa ku muoyo wa kashidi. Kadi, bua kumona bukole bua Bible, tudi ne bua kuikala tumubadila bantu patudi tubayisha.

² Bala Bible misangu yonso idi mushindu umueneka: Mbimueneke ne: bamanyishi ba bungi mbalekele tshibidilu tshia kubadila bantu Bible padibu mu buambi bua ku nzubu ne ku nzubu. Utu pebe wenza nanku anyi? Bu mudi bantu ba bungi bamueneka kabatshiyi ne dîba dia kulepesha muyiki nabu, pamu’apa udi mulue kuditua pebe mu tshibidilu tshia kufila anu mikanda anyi kumvuija patupu mvese kampanda. Tudi tukankamija bamanyishi bonso bua kudienzejabu muabu muonso bua kubala nansha mvese umue mu Bible padibu bayisha lumu luimpe; nebiambuluishe bantu bua kumona ne: mukenji utudi tuenda nau ng’wa mu Dîyi dia Nzambi.

³ Nansha mudi bantu bakese patupu bikale ne tshibidilu tshia kubala Bible, ba bungi batu bamunemeka pa tshibidilu. Nansha bantu batu ne bia bungi bia kuenza badi mua kuitaba munite umue anyi ibidi bua kuteleja mukenji mubabadila buludiludi mu Bible. Paudi ubadila muntu mvese ne musangelu, ne umumvuija mu mêyi makese, bukole bua dîyi dia Nzambi budi mua kumuambuluisha. Kadi mmunyi muudi mua kulunga mêyi ebe a mbuelelu ne dibala dia mvese?

⁴ Teta kuenza nunku mu mudimu wa difila bibejibeji: Mutangidi muena ngendu mukuabu utu wenza mudimu bimpe ne Bible padiye mu diabanya dia bibejibeji. Utu upatuka ne Bible mukese muela mu mpaya. Yeye mumane kupesha muntu bibejibeji ne mumvuije mu tshikoso tshimue tshia ku biena-bualu, udi ubulula Bible kayi welakana ne ubala mvese udi umvuangana ne tshiena-bualu atshi. Udi pebe mua kuenza nanku wewe muebeje muntu patupu ne: “Udi wela meji kayi bua dilaya dilenga edi?,” ne pashishe ubala mvese uudi musungule au.

⁵ Difundila tshipatshila tshia kubadila muntu yonso udi ukuteleja mvese umue peshi ibidi. Bukole budi nabu Bible budi mua kupetesha bantu ba bungi mushindu wa kulua balunda ba Nzambi.​—Yone 6:44.