Difundila bipatshila bia mu nyuma
1 Ndiakalenga kayipu dituikala nadi dia kusamuna Yehowa tshiendelele! Bua tuetu kufika ku tshipatshila etshi, tudianjilayi kudifundila bipatshila bia mu nyuma kubangila ku mpindieu ne kuluangana bua kubikumbaja. Dienza nunku didi dituambuluisha bua kuenza mudimu ne lungenyi ne makanda etu. (1 Kol. 9:26) Mbipatshila kayi biudi mua kudifundila?
2 Dilonga dia Bible: Utu udilongolola bua bisangilu bionso bia tshisumbu anyi? Bikalabi nanku, utuku ulama dîba dia kuenza makebulula ne kuelangana meji pa malu audi ulonga anyi? Tshilejilu, paudi ulongolola dilonga dia ku lumingu dia Tshibumba tshia Nsentedi ne Dilonga dia Mukanda dia Tshisumbu, utu anu wela tulongo ku mandamuna anyi peshi utuku kabidi ubala mvese idi mifila ne welanganapu meji bua kumanya bua tshinyi mbafile mumvuija au? Bua tshinyi kubengaku kudifundila tshipatshila tshia kuenza makebulula pa imue ngenyi ya mu dibala dia Bible dia ku lumingu dia mu Kalasa ka Mudimu wa Teokrasi? Dikebulula mu buondoke mu Dîyi dia Nzambi didi diangata bushuwa dîba ne makanda, kadi masanka adidi dipetesha adi bungi tshianana.—Nsu. 2:4, 5.
3 Bisangilu bia tshisumbu: Tshipatshila tshikuabu ntshia kubuela pa tshibidilu mu bisangilu bionso bitanu bia tshisumbu. Difika kumpala kua dîba bua kupeta mushindu wa kuyukilaku ne bana betu bakuabu ne kuimba nabu pamue musambu wa ntuadijilu ne kuteleja disambila kudi kuambuluisha bua kukolesha malanda mu tshisumbu. Tudi kabidi mua kuenza muetu muonso bua kuandamunaku mu tshisangilu tshionso ne kulengejaku mandamuna etu atudi tufilamu. Pamuapa udi mua kuleja mushindu udi mvese udibu bafile mu tshikoso upetangana ne malu anudi nulonga anyi kuleja mudi malu adi mambamu mua kuambuluisha mu nsombelu wa matuku onso.—Eb. 10:24, 25.
4 Mudimu wa buambi: Mudimu wetu udi utamba kulengela patudi tudifundila bipatshila bisunguluke. Udiku mudifundile bungi kampanda bua mêba buwudi musue kuenza mu buambi ku ngondo yonso anyi? Bamue bakamona dienza nunku dikala diambuluisha bikole. Anyi udi mua kuakaja imue mishindu ya mudimu webe wa buambi, bu mudi kubadila bantu Bible mu buambi bua ku nzubu ne ku nzubu, kutamba kupinganyina bantu, kudienzeja bua kutuadija dilonga Bible ne bantu anyi kulongesha bantu bimpe?
5 Baledi, nutuku nusaka bana benu bua kudifundilabu bipatshila mu mudimu wa Yehowa anyi? Bambuluishayi bua bamone ne: kuikala mpanda-njila, misionere anyi muena ku Betele mmushindu mutambe bulenga wa kuleja bukole bua dianyisha diabu kudi Yehowa.—Muam. 12:1.
6 Patudi tukonkonona mudimu wetu, tudifundile bipatshila bia mu nyuma ne tuenze bukole bua kubikumbaja, nanku netupete disanka dinene mu mudimu wetu ne, netulue bakankamiji ba bakuabu.—Lomo 1:12.