Programe mupiamupia wa mpuilu wa pa buende wa dituku dimue

¹ Padi eku tudiomba, bikandakanda ne balongeshi batumbisha bubanji, Dîyi dia Nzambi diodi didi dituambila ne: “Tuikalayi babanji mu midimu mimpe.” (1 Tim. 6:18, Muanda Mulenga Lelu) Etshi ke tshiena-bualu tshia mpuilu wa pa buende wa dituku dimue wabanga mu ngondo wa tshitema tshidimu tshia 2002 etshi. Mmalu kayi atukankamija atuapeta mu mpuilu eu?

² Mutangidi wa tshijengu neumvuije tshidi ‘Kuikala mubanji ku mêsu kua Nzambi’ ne, neele bamue bana betu badi benza muabu muonso bua kulua babanji mu nyuma nkonko. Mu muyuki wende wa kumpala, ngamba-malu muenyi nealeje mushindu udi bantu ba Nzambi bakumbaja “Midimu mimpe mu tshikondo tshia dinowa etshi.” Nebambuluishe yonso wa kutudi bua amone mudiye mua kudifila muende muonso mu mudimu wa dinowa udi wenda wenzeka lelu udi Nzambi mutuambile bua kuenza.

³ Bidi bituenza musangelu wa bungi bua kumona bansonga bena Kristo batungunuka ne kukeba bubanji bua mu nyuma. Bualu budibu benze ebu budi butumbisha Yehowa ne kabidi buambuluisha bansonga bua kudijadikila tshishimikidi tshimpe bua midimu ikalabu mua kuenza mu matuku adi ku mpala. Muyuki wa: “Tudi tuela bansonga kalumbadi bua midimu mimpe idibu benza bua kutumbisha Yehowa” neuleje midimu milenga idi bansonga ba mu tshijengu tshienu benza.

⁴ Mmalu malenga kayi atudi mua kupeta patudi tutungunuka ne kuenza midimu mimpe? Ngamba-malu udi mulue kunuendela buenyi neakuile mu muyuki wende wa ndekelu pa tshiena-bualu etshi: “Yehowa udi utubenesha patudi tutungunuka ne kuenza midimi mimpe.” Neakuile pa bitupa binayi mututu tupetela mabenesha: (1) muntu pa nkayende, (2) mu dîku, (3) mu tshisumbu ne (4) mu bulongolodi bua pa buloba bujima.

⁵ Bantu badi badilambule kudi Yehowa nebapete mushindu wa kutambula. Biwikala mumane kudiakaja bua kutambula, suaku umanyishe mutangidi-muludiki wa tshisumbu tshienu kubangila anu ku mpindieu.

⁶ Padibu bamanyisha dituku dia mpuilu eu muaba unudi, utuadije diakamue kudilongolola bua kuikalamu. Udienzeje bua kufikamu kumpala kua dîba bua kuimba musambu wa ntuadijilu ne kuteleja disambila. Kubuela mu mpuilu ne kulonda ne ntema programe eu mujima nekutukoleshe bua kutungunuka ne nsombelu udi mua kutuvuija babanji ba bushuwa ku mêsu kua Yehowa Nzambi wetu.