Tuenzayi bua Mpungilu wa Distrike wa “Bamanyishi ba Bukalenge ba tshisumi” atukuatshishe bikole
1 Programe udi upesha bantu bukole: Mu mpungilu wetu wa distrike wa musangu eu, tuvua bateleje malongesha adi apetesha bantu bukole bushuwa! Tuvua badisangishe bua tshipatshila tshia muomumue, bua kupeta bidi bikengela bua kumona mua kumanyisha Bukalenge bua Nzambi ne tshisumi. Udi muvuluke muvua ngamba-malu wa kumpala mumvuije muaku eu “kumanyisha” anyi? Udi muvuluke makebulula avuabu batulombe bua kuenza mu muyuki wa ne: “Tuikalayi ne dikima bualu tudi bamanye ne: Yehowa udi netu” anyi? Mmalu kayi malelela a mu nsombelu wa bantu anuvua bakonkonone?
2 Muyuki wa bitupa bisatu wa ne: “Mushinga wa ditabuja dietu badi bauteta kudi mateta kabukabu” uvua mutuleje malu manene asatu adi umvuija tshidi Yehowa wanji ulekela bakengesha bantu bende. Udi mua kumvuija malu au anyi? Tutu tuimanyina pa mvese kayi bua kumvuija bua tshinyi tutu tubenga bua kubuelakana mu malu a tshididi? Bavua batulombe bua tuenze tshinyi bua kuikala badilongolole ne kumanya tshia kuenza patudi kumpala kua bilumbu bitu bijuka bua dibenga kubuelakana dietu mu malu a tshididi? Mmunyi mudi ditantamena dietu dia mateta ne lulamatu ditumbisha Yehowa?
3 Mbitupa kayi bia mu drama wa “Tushalayi ne lulamatu nansha mu bikondo bikole” bivua bitamba kukukolesha? Tshitudi mua kuenza ntshinyi bua kuikala bu Yelemiya?
4 Muyuki wa patoke wa: “Malu a pa buloba ebu adi enda ashintuluka,” uvua mumvuije mashintuluka kayi manene ikala mua kuenzeka kumpala eku afikisha bantu ku dituku dia Nzambi didi dikuatshisha buôwa? Pauvua muteleje muyuki wa ndekelu wa ne: “Bamanyishi ba Bukalenge ba tshisumi, midimu yenu mimpe ivulangane,” uvua mulamakaje munyi malu avua malongeshamu ne mudimu webe wa buambi??
5 Malu manene a kutumikila: Anu bu muvuabu bumvuije mu muyuki wa ne: “Tuikalayi bena dianyisha,” mmushindu kayi utudi mua kuleja dianyisha dia muoyo mujima kudi Yehowa? Mu muyuki wa nshindamenu wa: “Bamanyishi ba Bukalenge basaka kudi tshisumi tshivule,” bavua batukankamije bua kuidikija tshisumi tshia nganyi? Bavua batulombe bua kuenza dikonkonona kayi dia muntu nkayende?
6 Muyuki wa bitupa bisatu wa ne: “Mulayi wa Mika udi utukolesha bua kuenda mu dîna dia Yehowa” uvua muleje malu a mushinga asatu adibu batulomba bua kukumbaja bua Yehowa kutuanyishaye? Tudiku mua kufika ku diakumbaja anyi? (Mika 6:8) Bilondeshile muvuabu baleje mu muyuki wa ne: “Kuba mutshima webe bua udilame bimpe,” mmu mishindu kayi itudi ne bua kudilama bakezuke mu nsombelu wetu? Mmu bitupa kayi bidi muyuki wa ne: “Tudimukilayi mashimi” utudimuija bua se: kabatushimi ne tuetu bine katushimi bakuabu?
7 Mmalu kayi a mushinga a mu muyuki wa bitupa bisatu wa ne: “Bamanyishi ba Bukalenge badi batumbisha mudimu wabu” aukadi mutuadije kutumikila mu mudimu webe wa buambi? Mu muyuki wa ne: “Kuyikidilangana malu a mu nyuma kudi kutukolesha” bavua bakonkonone malu a mu Filipoi 4:8. Mmunyi mudi mvese eu utuambuluisha bua kuikala kuyikidilangana malu a mu nyuma, ne ndîba kayi ditudi ne bua kuenza nanku?
8 Muyuki wa ne: “Eyemena Yehowa ne muoyo mujima mu bikondo bia makenga” uvua mumvuije tshia kuenza bua kumanya mua kupita ne bikondo bia malu makole, lutatu lua kupeta mfranga, masama, bilumbu bia mu dîku ne dienzulula dia bilema bimue bimue. Mmunyi mutudi mua kuleja ne: bushuwa tudi tueyemena Yehowa patudi tutuilangana ne malu a nunku?
9 Biuma bipiabipia bia mu nyuma: Tuvua basanke bikole patuvua bapete mukanda mupiamupia wa ne: Tutendelelayi Nzambi umuepele mulelela. Uvua mudiumvue munyi pavuabu bamanyishe tshipatshila tshia mukanda eu? Bua tshinyi neutuambuluishe bikole bu mukanda muibidi wa dilonga nawu ne bantu mu mudimu wetu wa dienza bantu bayidi?
10 Pashishe tuvua bapete mukanda mulengele wa Semena pabuipi ne Yehowa. Mmalu kayi a pa buawu adi nawu mukanda eu? Mbimfuanyi kayi bidimu biudi mutambe kuanyisha? Dibala diebe dia mukanda eu ndikusemejeku pabuipi ne Yehowa anyi? Nnganyi mukuabu udi mukanda eu mua kuambuluisha? Tuvua kabidi ne disanka dia kupeta Bible wa Les Écritures grecques chrétiennes—Traduction du monde nouveau mu Mangala. Ntshia-mudimu tshimpe bua didilongela dia muntu nkayende ne bua mudimu wetu wa buambi. Mmushindu kayi uudi mudilongolole bua kuenza nende mudimu?
11 Mpungilu wa Distrike wa “Bamanyishi ba Bukalenge ba tshisumi” mmutukankamije mu nyuma bikole ne malu atuvua nawu dijinga bua kutantamana mu tshikondo etshi tshia ntatu. Bua ndongoluelu wa pa buende eu wa mu nyuma kutuambuluishaye bikole, tuenzayi muetu muonso bua kuvuluka malu avua malongeshamu, kuleja dianyisha bua bituvua bapetemu ne kutumikila malu onso atuvua balongemu. (2 Pet. 3:14) Tuetu benze nanku nebitupeshe bukole bua tushale anu ne lulamatu ne kabidi kuleja se: tudi bamanyishi ba Bukalenge ba tshisumi badi bidikija Mukalenge wetu Yezu Kristo, bionso ebi bua butumbi bua Yehowa.—Filip. 1:9-11.