‘Tukenke bu bimunyi bia butoke’
1 Munkatshi mua mîdima ya mu nyuma ne bikadilu bibi bia mu ndongoluelu eu wa malu, batendeledi ba Yehowa Nzambi mulelela bu miliyo isambombo badi ‘bakenka bu bimunyi bia butoke’ mu matunga 234 a pa buloba bujima. (Filip. 2:15, Mukanda wa Mvidi Mukulu [Katolike, MMM]) Abi bidi bituvuija bashilangane ne bakuabu. Mmushindu kayi utudi mua kukenka ne butoke bua bulelela budi bufumina kudi Yehowa?—2 Kol. 3:18.
2 Bienzedi bietu: Bantu batu batamba kumona bikadilu bietu pa lukasa. (1 Pet. 2:12) Muntu mukaji mukuabu wakamona ne: Ntemu kampanda uvua muena mudimu nende uvua muntu wa malu mimpe ne muambuluishi wa bakuabu; kavua wakula mêyi mabole anyi useka padi bantu bela bilele bia busenji to. Pavua bakuabu bateta kuyobola Ntemu au mu diamba mêyi a bukoya padiye, uvua ushala mupuwe kadi mulamate anu malu makane. Biakapesha muntu mukaji au meji kayi? Udi uvuluka wamba ne: “Bikadilu biende bivua binsankisha bikole, meme kutuadija kumuela nkonko pa malu a mu Bible. Ke meme kutuadija ne kulonga Dîyi dia Nzambi e kufika ku ditambula kunyima kua matuku.” Udi wamba kabidi ne: “Bikadilu biende ke biakansaka bua kuteleja malongesha a Bantemu ba Yehowa.”
3 Mushindu utudi tuangata bakokeshi, mmuenenu utudi nende bua bienzedi bia bena panu ne ngakuilu wetu wa bukalanga, ke bidi bifikisha Bantemu ba Yehowa ku dishilangana ne bantu bakuabu pa kuikala bantu badi banemeka mêyi a mushinga mukole a mu Bible. Midimu mimpe ya nunku idi mua kutumbishisha Yehowa ne kukoka bakuabu mu ntendelelu wende.
4 Mêyi etu: Bushuwa, bantu badi bamona bikadilu bietu bilenga kabena anu mua kumanya bua tshinyi tudi bashilangane ne bantu bakuabu to, amba anu tuetu bayukile nabu bua malongesha etu. Bena mudimu nebe ta balongi nebe mbamanyeku ne: udi Ntemu wa Yehowa anyi? Utuku ukeba mishindu ya kubueja diyisha dietu mu mayuki enu a patupu anyi? Udiku ne dipangadika dia se: ‘butoke buenu butokeshe ku mêsu a bantu bonso’ misangu yonso padi mushindu umueneka anyi?—Mat. 5:14-16, MMM.
5 Kukumbaja mudimu wetu wa bimunyi bia butoke kudi kulomba lungenyi lua didifila. Patudi tuenza malu ne muoyo mujima, netulengulule malu adi kaayi ne mushinga bua kumona mua kudifila ne muetu muonso mu mudimu udi upandisha mioyo ya bantu wa diyisha ne dienza bayidi.—2 Kol. 12:15, MMM.
6 Tutungunukayi ne kukenka bu bimunyi bia butoke ku bienzedi bietu ne mêyi etu. Tuetu tuenza nanku, nebikale mua kusaka bakuabu bua kudisangabu kutudi bua kutumbisha Yehowa.