‘Witabuje dîyi edi’
1 Dimue dituku pavua Yezu uyikila ne bayidi bende pa bidi bitangila bualu bua dibaka, wakakula bua bujike ububikila ne: ‘ntshipedi.’ Pashishe wakamba ne: ‘Udi mumanye mua kuitabuja dîyi adi aditabuje.’ (Mat. 19:10-12) Kunyima kua bidimu, mupostolo Paulo wakafunda bua buimpe bua bujike ne kukankamijaye bakuabu bua kulondabu tshilejilu tshiende pa kushala bajike. (1 Kol. 7:7, 38) Lelu’eu bantu ba bungi ‘mbitabuje’ bua kushala bajike ne badi bamona buimpe buabu. Mbuimpe kayi abu?
2 Badi benza mudimu ‘kabayi bela meji ku manga malu’: Paulo wakamona ne: bujike buvua bumupetesha mushindu wa kukuatshila Yehowa mudimu ‘kakuyi diela meji ku manga malu.’ Bia muomumue lelu’eu kabidi muanetu wa balume udi mujike udi mua kukokesha bua kubuela mu Kalasa ka Dilongesha Mudimu, kabidi muntu udi mujike udi pa tshibidilu ne dîba divule dia kuenza bumpanda-njila, kulonga muakulu mukuabu, kuya muaba udibu dijinga ne bamanyishi, kuya ku Betele anyi kuikala ne mushindu wa kuenza midimu mikuabu ya pa buayi. Udi mua kupeta dîba dia kudifila bikole mu didilongela malu mondoke ne diela meji, kabidi ne disambila Yehowa ne muoyo mujima. Muntu udi mujike utu pa tshibidilu ne dîba dia bungi dia kudifila mu diambuluisha bakuabu. Bionso ebi mbua “bimpe” biende.—1 Kol. 7:32-35, MMM; Bien. 20:35.
3 Mudimu muenzela Yehowa nunku kakuyi diela meji ku manga malu udi upetesha mabenesha a bungi. Muanetu wa bakaji mukuabu mujike uvua muenze mudimu bidimu 27 mu Kenya wakafunda ne: “Mvua ne balunda ba bungi ne mudimu muvule! Tuvua tuenza malu popamue ne tuendelangana. . . . Bujike buvua bumpetesha dîba divule dia kuenza mudimu ne kutambakana, mbuntuadile disanka dia bungi.” Wakamba kabidi ne: “Mu bungi bua bidimu malanda anyi ne Yehowa akakola.”
4 Mua kukuata mudimu bimpe ne tshipedi etshi: Yezu wakamba ne: tshidi ne bua kusaka muntu bua kushala mujike tshidi ne bua kuikala bualu ‘bua bukalenge bua mu diulu.’ (Mat. 19:12) Anu mutubi bua tshipedi tshionso, bidi bikengela kuenza mudimu biakane ne tshikondo tshia bujike bua kupeta masanka. Padi bantu ba bungi badi bajike bakuata mudimu bimpe ne tshikondo tshia bujike buabu ne beyemena Yehowa bua kupeta meji ne bukole, badi bafika ku dijingulula ne: tshipedi tshia bujike tshidi ne mushinga wa bungi.