Mbatupeshe bukenji bua kuamba lumu luimpe
1 Ndiakalenga kayipu ditudi nadi dia kuamba lumu luimpe lua Nzambi! (1 Tes. 2:4) Nansha bamue bantu mua kubenga mukenji eu wa bukole, aba ba muoyo muimpe badi bakokibua kudiwu anu bu ku dipembu dilenga. (2 Kol. 2:14-16) Aba badi bitaba ne batumikila lumu luimpe, buobu nebapandishibue. (Lomo 1:16) Tshia kuenza ntshinyi bua mudimu eu udibu batupeshe?
2 Yezu ne bapostolo: Yezu wakateka mudimu wa kuamba kua lumu luimpe pa muaba wa kumpala. (Luka 4:18, 43) Nansha pavuaye mupungile anyi muikale ne nzala, dinanga divuaye munange nadi bantu ne dianyisha divuaye nadi bua mukenji eu biakamusaka bua kuumanyisha bakuabu. (Mâko 6:30-34) Ku mêyi ne ku tshilejilu tshiende, Yezu wakaleja bayidi bende mushinga udi nau mudimu wa diyisha Bukalenge.—Mat. 28:18-20; Mâko 13:10.
3 Mu dilonda tshilejilu tshia Yezu, bapostolo bakamanyisha ne lukunukunu mukenji wa Bukalenge. Nansha pavuabu babela mututu anyi babatumina dîyi bua kulekela kuyisha, “kabakalekela kuyisha bantu ne kubambila lumu luimpe” nansha. (Bien. 5:40-42) Mupostolo Paulo wakenza mudimu eu kayi upungila to. (1 Kol. 15:9, 10; Kolos. 1:29) Wakafuanyikija mudimu mulenga wa kuamba lumu luimpe eu bu dibanza divuaye ne bua kujikija kudi bantu nende, ne uvua muanyishe bua kudibudisha amue masanka bua kumona mua kujikija dibanza adi.—Bien. 20:24; Lomo 1:14-16.
4 Mudimu wetu lelu: Dianyisha ditudi nadi bua mudimu wa tshijila udibu batupeshe neditusake bua kukeba bua kuvudija mudimu wetu wa buambi. (Lomo 15:16) Edward uvua mukalame anu mu dikalu diende dia balema, uvua usomba lua ku tshibueledi tshia nzubu kampanda wa tshilala benyi bua kuambila bantu bavua baluamu malu adi atangila ditabuja diende. Kadi bu muvuaye ne dijinga dia kuenza mudimu wa bungi, bakamuenzela kantu bu kazubu ku tshisasa tshia mashinyi, nenku ku diambuluisha dia mashinyi au, wakenza bumpanda-njila bidimu bia bungi, kuendaye kilometre ne kilometre mu dienza mudimu eu. Anu bu Edward, bantu ba bungi lelu’eu mbakaje nsombelu wabu bua kumona mua kudifila bikole mu diamba lumu luimpe.
5 Bua kulonda tshilejilu tshia Yezu ne tshia bapostolo bende, tuetu petu tutekayi dîba dionso mudimu wa diyisha pa muaba wa kumpala mu nsombelu wetu lelu’eu. Patudi tuenza nunku, tudi tuleja mutudi banange bantu netu, bileja kabidi dianyisha ditudi nadi bua bukenji ebu budibu batupeshe bua kuamba lumu luimpe.