Tutumbishayi Yehowa pa kuyisha mu mpukapuka

¹ Basadidi ba lulamatu ba Yehowa batu bakeba mishindu mishilashilangane idibu mua kumutumbisha dituku dionso. (Mus. 96:2, 3; Eb. 13:15) Mushindu umue utudi mua kuenza nunku mpa kuyisha mu mpukapuka, kuyisha bantu nansha ni katuvua balongolole bua kubayisha. Batendeledi ba Yehowa ba bungi lelu’eu badi ne dianyisha munda muabu bualu kuvua muntu uvua mubamanyishe mukenji wa Bukalenge mu mpukapuka.

² Kuyisha muntu mu mpukapuka kudi misangu ya bungi mua kupetesha bakuabu mushindu wa kuteleja mukenji wa Bukalenge. Tshilejilu, muyiki wa Yezu ne mukaji muena Samalea ku tshina tshia mâyi tshia Yakoba wakafikisha bantu ba bungi ku diteleja lumu luimpe. (Yone 4:6-30, 39-42) Pavua Paulo ne Sila mu buloko ku Filipoi, bakayisha mulami wa buloko, nenku bena mu dîku dijima dia muntu au bakitaba bulelela.​—Bien. 16:25-34.

³ Bikondo bia kuyisha: Mbikondo anyi mpunga kayi iudi nayi idi mua kukupetesha mushindu wa kuyisha mu mpukapuka? Bamue batu bayisha padibu mu disumba dia bintu, padibu mu mashinyi anyi padibu bindila bua kumonangana ne munganga ku lupitadi. Bakuabu batu bayisha mu mêba a dikisha ku mudimu anyi mu kalasa. Kuangata patupu umue wa ku mikanda yetu ya malu a mu Bible ne kuuteka muaba udi bantu mua kumona kudi mua kusaka bakuabu bua kuela nkonko pa malongesha etu.​—1 Pet. 3:15.

⁴ Mushindu wa kutuadija: Muana wa bakaji mukuabu wa bidimu muanda-mutekete uvua ne bundu kayi utamba kuakula wakumvua muvuabu bambe mu bisangilu ne: bantu bonso badi ne bua kuyisha. Nunku pavuaye uya mu disumba dia bintu ne mamuende, wakela broshire ibidi mu tshibuta tshiende. Pavua mamuende ku tshifutshidi tshia makuta, muana wa bakaji au wakapesha muntu mukaji mukuabu broshire, au kuangataye ne disanka. Pakamukonkabu mushindu uvuaye mupete dikima dia kuyikidisha muntu mukaji au, muana wa bakaji eu wakandamuna ne: “Mvua ndiambila nkayanyi munda munda ne: Enza! Ke meme kuakula!”

⁵ Tuetu bonso tudi ne bua kuikala ne lungenyi bu lua muana wa bakaji au bua kumona mua kuyisha mu mpukapuka. Ntshinyi tshidi mua kutuambuluisha? Disambila didi mua kutuambuluisha bua kupeta dikima dia kuakula. (1 Tes. 2:2) Longolola mu lungenyi luebe lukonko anyi malu a kuamba pa bualu kampanda budi bukoka ntema ya bantu audi mua kutuadija nau diyuki. Pashishe wikale ne dishindika dia se: Yehowa neabeneshe didifila diebe.​—Luka 12:11, 12.

⁶ Kuyisha mu mpukapuka bantu batudi tupetangana nabu dituku dionso nansha ni katuvua balongolola bua kuyisha kudi kutumbisha Yehowa ne kutupa tuetu bine disanka. Kudi kabidi nansha mua kuambuluisha muntu bua kubuelaye mu njila udi ufikisha ku muoyo wa tshiendelele.