“Nukuatshile Yehowa mudimu ne disanka”
1. Bua bantu badi basadila Yehowa, ntshinyi tshidi mua kuikala tshibatuadila disanka dia bungi?
1 Mupostolo Paulo wakamba ne: ‘Nusanke mu Mukalenge misangu yonso. Nengambe tshiakabidi ne: Nusanke!’ (Filip. 4:4) Diakalenga dia kuamba lumu luimpe ne kuambuluisha bantu badi bu mikoko bua kumonabu mua kutendelela Yehowa didi ditutuadila disanka dia bungi. (Luka 10:17; Bienz. 15:3; 1 Tes. 2:19) Kadi netuenze tshinyi bituamona mu bimue bikondo ne: disanka nditukepele mu mudimu wetu?
2. Mmunyi mudi dishala beyemene muntu udi mutuambile bua kuenza mudimu eu dituambuluisha bua kuikala ne disanka?
2 Mudimu udi Nzambi mututumine dîyi bua kuenza: Tuvuluke se: mudimu wetu wa kuyisha ng’wa kudi Yehowa. Eyowa, tudi ba diakalenga bua mutudi “benzejanganyi ba mudimu ne Nzambi” patudi tumanyisha Bukalenge ne tuvuija bantu bayidi! (1 Kol. 3:9) Kristo Yezu udi netu mu mudimu wikale kawuyi mua kuenzeka tshiakabidi pikalawu mumane kujika. (Mat. 28:18-20) Nansha banjelu badi pabu mu mudimu eu ne badi benza netu mudimu pamue mu dinowa dinene dia mu nyuma didi dienda dienzeka mpindieu. (Bienz. 8:26; Buak. 14:6) Mifundu minsantu ne malu mamonamona a bantu ba Nzambi bidi bifila tshijadiki tshilelela tshia se: Yehowa udi ubenesha mudimu eu. Patudi tuyisha, tudi tuya kumpala bualu ‘tudi ba kudi Nzambi, ne ku mêsu kua Nzambi pamue ne Kristo.’ (2 Kol. 2:17) Ebu ki mbualu bua disanka menemene anyi?
3. Mmushinga kayi udi nawu disambila bua kumona mua kushala anu ne disanka mu mudimu wa Nzambi?
3 Disambila didi ne mushinga wa bungi bua kumona mua kushala anu ne disanka mu mudimu wa Nzambi. (Gal. 5:22) Bu mudibi bikengela bukole bua kudi Nzambi bua kuenza mudimu wende, mbimpe tuetu kumulomba ne muoyo mujima nyuma wende udiye ufila ne kalolo konso kudi bantu badi bamulombaye. (Luka 11:13; 2 Kol. 4:1, 7; Ef. 6:18-20) Kusambila bua mudimu wetu wa buambi nekutuambuluishe bua kuikala ne mmuenenu muimpe patudi tupeta bantu badi batuandamuna bibi. Nekutuambuluishe bua kutungunuka ne kuyisha ne dikima ne disanka.—Bienz. 4:29-31; 5:40-42; 13:50-52.
4. Mmunyi mudi didilongolola dimpe dituambuluisha bua kuvudija disanka mu buambi, ne ng’imue mishindu kayi mimpe itudi mua kulongolola?
4 Dilongolola bimpe: Bua kuikala ne disanka dia bungi patudi mu buambi, bidi bikengela kudilongolola bimpe. (1 Pet. 3:15) Didilongolola dia nunku kadiena dilomba anu dîba dipitepite bungi to. Ditu diangata anu minite mikese patupu bua kutangila tshiakabidi ngenyi ya mushindu wa kufila bibejibeji bia ngondo idi miakanyine bua mukanda uudi ukeba kufila. Bua kupeta mbuelelu ya mu mayuki mimpe, udi mua kutangila kakanda ka Mbuelelu ya biena-bualu bia mu Bible anyi mu mukanda wa Comment raisonner peshi Midimu yetu ya Bukalenge ya ngondo mishale. Bamue bamanyishi ba Bukalenge batu bamona bibambuluisha bikole padibu bafunda ka-dileja kîpi pa dibeji. Batu ku misangu ne ku misangu bela dîsu pa bidibu bafunda pa kabeji aka bua kuvulukabu bidibu basue kuamba. Ngenzelu eu udi ubambuluisha bua kubenga kulubakana, kadi bua kuyisha ne dikima kabayi batshina.
5. Mmunyi mudi disanka dituambuluisha, diambuluisha ne bakuabu?
5 Disanka ditu dilua ne bipeta bimpe bia bungi. Kuikala ne disanka kutu kulengeja mukenji wetu. Disanka didi ditupetesha bukole bua kunanukila. (Neh. 8:10; Eb. 12:2) Kadi tshidi tshipite bionso mmudimu wetu muenza ne disanka udi utumbisha Yehowa. Bua bualu ebu, ‘tukuatshile Yehowa mudimu ne disanka.’—Mus. 100:2.