‘Nuenu bonso bantu ba Yehowa, numunangayi’

Tshivulukilu tshia lufu lua Yezu netshienzeke mu dia 4 ngondo muinayi

¹ Kukadi kupite bidimu bia bungi, pavua ditunga dia Ukraine ku bulombodi bua ba-koministe, bamfumu bavua batentekela bana betu ne mu katoba, nangananga pavua dituku dia Didia dia Mukalenge disemena pabuipi bualu bavua bakeba kumanya muaba uvua Tshivulukilu ne bua kuenzekela. Bivua lutatu bualu bamfumu bavua bamanye mua kutshinka dituku dia Tshivulukilu etshi. Ntshinyi tshivua bana betu benza? Mu nzubu wa muanetu wa bakaji kampanda muvua tshibambalu tshia muinshi mua buloba tshivua tshisapalale mâyi. Bu muvua bamfumu kabayi mua kuela meji ne: bantu bavua mua kudisangishila mu muaba au to, bana betu bakibaka tshisasa pamutu pa mâyi au avua afika ne mu binu. Nansha muvuabu ne bua kusomba bavunge mikolo muinshi mua plafon muîpi, kakuvua muntu nansha umue wakabatatshisha, pavua tshisumbu tshienza Tshivulukilu ne disanka dionso to.

² Didisuika dia bana betu ba mu Ukraine dia kutumikila mukenji wa dienza divuluka lufu lua Yezu divua mushindu wa dikema wa kuleja dinanga diabu kudi Nzambi. (Luka 22:19; 1 Yone 5:3) Patudi tupeta ntatu mu nsombelu wetu, bilejilu bia mushindu eu bidi mua kutukolesha ku muoyo ne kutusaka bua kuikala kudienzeja bua kuikalaku bua kumona muenzeka Didia dia Mukalenge mu dia 4 ngondo muinayi. Mu dienza nunku, tudi tuleja ne: tudi tuitaba mêyi a mufundi wa Misambu a se: ‘Nuenu bonso bantu ba Yehowa, numunangayi.’​—Mus. 31:23, Mukanda wa Mvidi Mukulu, [Katolike, MMM].

³ Ambuluisha bakuabu bua kukoleshabu dinanga diabu bua Nzambi: Dinanga bua Nzambi didi ditusaka kabidi bua kubikila bakuabu bua kubuelabu netu mu Tshivulukilu. Tshisakidila tshia Mudimu wetu wa Bukalenge wa ngondo muibidi tshivua tshitukankamija bua kuenza liste wa bantu batudi basue kubikila mu Tshivulukilu. Udiku mutungunuke ne kubikila muntu yonso udi pa liste webe anyi? Umvuije muntu yonso wa kudibu tshidi muanda eu umvuija. Bavuluije bimpe dituku ne dîba bienzeka Tshivulukilu, ne kuoku mushindu, diya kubangata bua kuya nabu didi mua kubakankamija bua kubuela mu tshisangilu etshi.

⁴ Enza muebe muonso bua kuela bantu balua mu Tshivulukilu bavua bitabe ku dibikila diebe muoyo, ne enza bua kabadimonyi bu bana ba nshiya to. Mmunyi muudi mua kubambuluisha bua kukolesha dinanga diabu bua Yehowa? Ikala pabuipi bua kuandamuna ku nkonko yabu. Kuoku mushindu, kujingakanyi bua kulomba bamue bua kulonga nabu Bible to. Ubalombe bua kuikalabu babuela lumingu luonso mu bisangilu bietu bia tshisumbu. Bakulu batambe nangananga kutabalela bena Kristo bakadi balekele kuyisha badi balue. Badi mua kulongolola dituku kampanda bua kuya kusombesha bawetu aba ne kubakolesha bua kutuadijilulabu kabidi mudimu wabu, pamu’apa basakidila ne ngenyi ivua mu muyuki wa Tshivulukilu.​—Lomo 5:6-8.

⁵ Tukoleshayi dinanga dietu bua Yehowa: Kuelangana meji bua dipa dia mulambu udi utupikula kudi mua kukolesha dinanga dietu bua Yehowa ne bua Muanende. (2 Kol. 5:14, 15) Muanetu wa bakaji mukuabu utu ubuela mu Tshivulukilu kukadi bidimu bia bungi wakamba ne: “Tudi bashale bindile Tshivulukilu. Tshivua tshikondo tshia pa buatshi kutudi tshidimu tshionso. Kukadi kupite bidimu 20 mpindieu, ndi muvuluke mushindu utuvua bimane mu nzubu utubu batekela bitalu kumpala kua kubijika mushale mutangile tshitalu tshia tatu wanyi munanga ne mufike ku dikala ne dianyisha dia bungi bua mulambu wa tshia-bupikudi. Kumpala kua lufu lua tatu, muanda eu uvua anu bualu bumvua mumanye patupu mu mutu wanyi. Bushuwa, mvua mumanye mvese yonso idi itangila mulambu wa tshia-bupikudi ne mumanye mua kuyumvuija! Kadi anu pakantonda bualu bua lufu ebu bikole ke pangakumvua disanka dikole mu muoyo wanyi bua bionso bituapeta bua mulambu eu wa mushinga mukole wa kupikula nawu bantu.”​—Yone 5:28, 29.

⁶ Bu mudi dituku dia Tshivulukilu tshia tshidimu etshi dienda disemena pabuipi, lulongolola mutshima webe bua bualu ebu. (2 Kul. 19:3) Elangana meji bua dibala dia pa buadi dia mvese mifila bua Tshivulukilu idi mu broshire wa Tukonkononayi Mifundu dituku dionso​—2004 ne mu Calendrier 2004. Bamue bana betu batu basue kubalulula nshapita wa 112-116 ya mu mukanda wa Muntu mutambe bunene mu dilonga diabu dia mu dîku. Bakuabu pabu batu bakebulula manga malu a pa mutu mu mikanda ya kulonga nayi Bible mipatula kudi kasumbu ka mupika wa lulamatu ne wa budimu. (Mat. 24:45-47) Tuetu bonso tudi ne bua kusambila ne muoyo wa dianyisha bua dipa edi dia mulambu udi upikula bantu. (Mus. 50:14, 23) Bushuwa, tutungunukayi ne kuelelangana meji pa mushindu udi Yehowa mutunange ne tukebayi mishindu itudi mua kumuleja dinanga mu tshikondo etshi tshia Tshivulukilu.​—Mâko 12:30; 1 Yone 4:10.