Tuidikijayi buakane bua Yehowa
1 ‘Yehowa udi unanga kulumbulula kuakane,’ peshi buakane. (Mus. 37:28) Bua nunku, udi wanji udimuija kumpala kua yeye kubutula bantu babi. (Mâko 13:10) Didimuija edi ditu dipesha bantu mushindu wa bobu kulekela malu mabi ne kupeta lupandu. (2 Pet. 3:9) Tutuku tuditatshisha bua kuidikija buakane bua Yehowa anyi? Ntatu ne makenga a bantu bidiku bitusaka bua kubambila pabu bua kutekemenabu Bukalenge bua Nzambi anyi? (Nsu. 3:27) Dinanga dia buakane neditusake bua kuyisha bikole.
2 Yisha kuyi kansungasunga: Patudi tuambila bantu bonso malu a Nzambi, kakuyi kansungasunga, tudi tuenza “malu makane.” (Mika 6:8) Tudi ne bua kulekela tshilele tshia kuelela bantu meji mabi anu bua tshidibu bamueneka ku mêsu patupu. (Yak. 2:1-4, 9) Yehowa ‘mmusue bua bantu [ba mishindu yonso] basungidibue, bafike ku dimanya dia malu malelela.’ (1 Tim. 2:4) Dîyi dia Nzambi dia bulelela didi mua kushintulula nsombelu wa muntu. (Eb. 4:12) Diumvua bimpe dia malu aa nedituambuluishe bua kuyikila ne bantu kakuyi bualu to, kuyikila too ne aba bavua babenge bua kututeleja musangu mushale.
3 Muanetu wa bakaji mukuabu uvua upana mu makazen kampanda uvua ne ka-buôwa ndambu bua tshimuenekelu tshia muntu kansanga uvua ne tshibidilu tshia kubasumba bintu. Nansha nanku, pavua mushindu mumueneke, wakateta bua kumuyisha e kumuambila bua mudi Nzambi mulaye Mparadizu. Muntu eu e kumukosa ku dîyi umuambila mudiye kayi munange kuteleja mianu ya patupu ne kabidi wakamba muvuaye mu dingumba dia benzavi ne banu ba diamba. Kadi muanetu wa bakaji eu kavua mulekele nansha. Dimue edi, muntu eu kukonkaye muanetu wa bakaji eu muvuaye wela meji bua nsuki yende mile, ne muanetu kumumvuija ne budimu malu adi Bible wamba bua tshilumbu etshi. (1 Kol. 11:14) Bualu bua dikema, dituku divua dilonda, wakamona muntu au mukosa miedi yende ne nsuki! Wakalomba bua kulonga Bible, ne muanetu wa balume mukuabu ke wakatuadija kulonga nende, yeye e kuya kumpala kufika too ne ku didilambula kudi Nzambi ne pashishe kutambulaye. Anu bu muntu eu, bantu ba bungi badi basadila Yehowa lelu badi ne dianyisha dia bungi bua muvua muntu mukuabu mudifile ne tshisumi bua kubambila lumu lua Bukalenge bua Nzambi kakuyi kansungasunga.
4 Mu tshitupa tshikese emu, Yehowa neumbushe malu mabi onso pa buloba. (2 Pet. 3:10, 13) Mu tshikondo tshidi tshishale tshikese emu, tutungunukayi ne kuidikija buakane bua Yehowa pa kuenza muetu muonso bua kuambuluisha bantu bonso bua bapete mushindu wa kupanduka ku kabutu ka bulongolodi bua Satana kadi kalua kumpala eku.—1 Yone 2:17.