Tshitupa 1: Tulombolayi malonga a Bible mimpe
Dilonga dia Bible ntshinyi?
1 Pa buloba bujima, bantu ba Nzambi badi balombola malonga a Bible matue ku miliyo isambombo ku ngondo yonso. Patudi tuenza mudimu ne ndongeshilu milenga, tudi mua kufikisha balongi ba Bible aba ku didilambula kudi Nzambi ne pashishe kutambula, tudi mua kubambuluisha kabidi bua ‘bakumbane bua kuyisha bakuabu.’ (2 Tim. 2:2) Udiku musue kuambuluisha mulongi webe bua kukumbaja malu onso aa anyi? Kutuadija ne Mudimu wetu wa Bukalenge wa ngondo eu, yonso yalonda neikale ne tshiena-bualu tshikala tshiumvuija malu manene adi atangila mushindu wa kulongesha bantu Bible bimpe.
2 Dîba dia kubala dilonga dia Bible mu luapolo: Wewe uyukila pa tshibidilu ne muntu malu a mu Bible, nansha muyuki wenu eu muikale wa minite mikese patupu, kadi dîba dionso adi wewe muikale wenza mudimu ne Bible ne umue wa ku mikanda idibu baleje bua kulonga nayi Bible ne bantu, tshiudi wenza atshi ndilonga dia Bible. Tudi anu mua kudibala mu luapolo luetu nansha diodi dienzekela ku nzubu kua muntu anyi ku telefone. Tudi mua kubala tshintu atshi ne: ndilonga dia Bible tuetu balonge ne muntu misangu ibidi panyima pa bamane kumuleja mushindu wa kulonga, ne kuoku kuikala malu adi aleja se: dilonga edi neditungunuke.
3 Bua malonga a Bible a bungi, tutu tuenza mudimu ne broshire wa Utulomba ne mukanda wa Dimanya. Padi mikanda eyi ijika, pikalabi bimueneka ne: muntu eu udi wenda uya kumpala, nansha bikale bia majetete majetete, ne kabidi bimueneka se: dianyisha diende bua malu adiye ulonga didi dienda didiunda, nudi mua kutungunuka ne kulonga nende mukanda wa Tutendelelayi Nzambi. Nudi mua kuenza mudimu ne broshire wa Udi mua kulua mulunda wa Nzambi bua bantu badi kabayi balonge tulasa tua bungi anyi badi kabayi bamanye kubala bimpe.
4 Mudimu wa dilongesha bantu Bible mmuambuluishe ba bungi bua kulua bayidi balelela ba Yezu Kristo. (Mat. 28:19, 20) Binuatumikila ngenyi inuapeta mu nimero idi ilonda pa tshiena-bualu etshi, nenulombole malonga a Bible mimpe.