Ikala ufila bibejibeji mu buambi
1, 2. Mmunyi mudi Tshibumba tshia Nsentedi ne Réveillez-vous! bishintulule nsombelu ya bantu?
1 “Mbilenga, bifika anu pa dîba diabi, kabidi bikankamijangana.” “Ebi ke bibejibeji bidi bikankamijangana bikole ku bionso binkadi mubale.” Mêyi aa mimpe adi aleja mudi bantu badi babala Tshibumba tshia Nsentedi ne Réveillez-vous! bumvua pa buloba bujima. Bushuwa, bibejibeji bietu mbintu bia mudimu bikumbane bua kufikisha lumu luimpe kudi “bantu bonso.”—1 Tim. 2:4.
2 Ngenda-mushinga kampanda wakapeta Réveillez-vous! uvua ne tshiena-bualu tshivua tshimusankisha bikole. Pashishe, yeye kubala kabidi Tshibumba tshia Nsentedi tshivuaye mupete kabidi tshikale ne tshiena-bualu tshivua tshiumvuija mu bule ne mu butshiama dilongesha diende dia ku buana dia Busatu bunsantu. Tshiena-bualu etshi tshiakamujula nyota ya kumanya bia bungi. Wakatambula kunyima kua ngondo isambombo. Muntu mukuabu uvua pende upeta bibejibeji pa tshibidilu kadi kayi ubibala to. Mukajende uvua yeye ubenga kuyukila ne Bantemu, kadi eku ubala bibejibeji bivuabu bashila bayende. Dilaya dia mu Bible dia mparadizu wikala pa buloba ne bantu bakane diakalenga mutshima wende bikole. Mu bule bua matuku, yeye, muanende wa balume ne muakunyende wa bakaji bakalua basadidi ba Yehowa.
3. Bua tshinyi mbimpe bua kushila muntu bibejibeji bionso bibidi?
3 Fila bibejibeji bionso bibidi: Anu bu mudi bilejilu bidi kulu eku bileja, katuena bamanye muntu wabala bibejibeji anyi tshiena-bualu tshikala mua kusankisha muntu nansha. (Muam. 11:6) Ke bualu kayi mbia mushinga bua kupesha muntu Tshibumba tshia Nsentedi pamue ne Réveillez-vous! nansha mutudi mua kuakula anu bua tshimue tshia kudibi. Mu nsombelu mikuabu, bidi mua kuikala bimpe bua kufila nimero ya bungi ya bibejibeji bietu kudi muntu patudi tuya kumutangila.
4. Mmunyi mutudi mua kulongolola programe wa difila dia bibejibeji?
4 Mbimpe kulongolola dituku dimue ku lumingu luonso bua kufila bibejibeji. Mu kalandriye ka Bantemu ka 2005, disambombo dionso ndilongolola bu “Dituku dia bibejibeji.” Bushuwa, bu mudi malu ashilangana bilondeshile miaba ne kudi muntu ne muntu, bamue badi mua kusungula dituku dikuabu bua kuikalabu bafila bibejibeji. Tutuku ne dituku dia kuyisha mushindu’eu mu programe wetu wa ku lumingu luonso anyi?
5. Mbikondo kayi bidi biakanyine bia tuetu kufila bibejibeji, ne ntshinyi tshidi mua kutuambuluisha bua kuenza nunku?
5 Difundila bipatshila: Tuetu badifundile bungi kampanda bua bibejibeji bia kufila ku ngondo yonso nebituambuluishe bua tuetu kuikala tubifila pa tshibidilu. Utuku ne bantu bautu ushila bibejibeji pa tshibidilu anyi? Utuku upesha bantu bautu upetangana nabu mu buambi bibejibeji anyi? Kuenaku mua kufila bibejibeji paudi uyisha mu njila, mu bisalu ne mu miaba idi bantu ba bungi bapitshila anyi? Utuku wambula bibejibeji pautu wenza luendu anyi uya mu tshisalu peshi uya kumonangana ne banuvua balayangane nabu anyi? Wenze bua kuambuluisha bakuabu mu tshikondo tshionso tshiakanyine ne malu adi mu Tshibumba tshia Nsentedi ne Réveillez-vous!
6. Mmunyi mutudi mua kuenza mudimu bimpe ne bibejibeji bia kale?
6 Tudi kabidi mua kudifundila tshipatshila tshia kufila bibejibeji bia kale bitudi nabi. Nansha bikala bibejibeji bimane kupita ngondo wabi wa kubifila umue anyi ibidi, tumanye ne: malu adimu atshidi anu ne mushinga. Bipesha bantu badi basue kumanya bulelela. Tshibumba tshia Nsentedi ne Réveillez-vous! mbilue bu ‘dîyi diamba mu tshikondo tshiakane’ kudi bantu miliyo ne miliyo. (Nsu. 25:11) Tuambuluishayi bantu bavule menemene bua bamanye Yehowa ne bamusadile.