Bua atambe kushindamena pa Bible!
1. Ku ntuadijilu, bavua bapatula Tshibumba tshia Nsentedi nangananga bua banganyi, ne L’Âge d’Or uvua bua banganyi?
1 Nimero wa kumpala wa tshibejibeji tshia L’Âge d’Or wakapatuka mu dia 1 Kasuamansense 1919. Tshiakalua tshiamu tshinene tshia mudimu wa buambi. Bua tshinyi? Bualu bavua batshilongolole nangananga bua bantu bakuabu bonso. Kabivua nanku bua Tshibumba tshia Nsentedi to, bualu munkatshi mua bidimu bivule bakatshiangata bu tshibejibeji tshivua nangananga anu bua bena mu ‘kasumbu kakese.’ (Luka 12:32) Bamanyishi ba Bukalenge bakasanka bikole bua tshibejibeji etshi tshipiatshipia tshia L’Âge d’Or, kuenzabi bua ne: munkatshi mua bidimu bia bungi bikale batshipatula bungi bupite bua Tshibumba tshia Nsentedi.
2. Mmunyi mutudi tubikila tshibejibeji tshia L’Âge d’Or lelu, ne tshivua ne tshipatshila kayi katshia ku ntuadijilu?
2 Bakapatula tshibejibeji tshia L’Âge d’Or bua kuleja bantu ne: anu Bukokeshi bua Kristo bua Bidimu Tshinunu ke buvua ne bua kujikija ntatu yonso ya bantu ne kubangisha tshikondo tshilengele bua bukua-bantu. Mu bidimu biakalonda, bakashintulula amue malu mu L’Âge d’Or bua kukumbaja majinga a bikondo bishilangane. Mu 1937 bakashintulula dîna dia tshibejibeji etshi, e kuluatshi Consolation. Mu 1946 tshiakangata dîna dia Réveillez-vous! didiku too ne lelu.
3. Réveillez-vous! mmuambuluishe bikole mu dikumbana dia mulayi kayi?
3 Kubangila anu ku ntuadijilu kuatshi, tshibejibeji etshi tshiakambuluisha bamanyishi bikole mu mudimu munene wa buambi katshia mu 1919. (Mat. 24:14) Kadi pa kumona mudibi bikengela kuenza malu ne lukasa matuku etu aa, bidi bimpe bua kushintululaku malu makuabu mu Réveillez-vous!
4. (a) Ntshinyi tshidi muntu ne bua kuenza bua kumusokokabu mu “dituku dia tshiji tshia Yehowa”? (b) Bilondeshile Buakabuluibua 14:6, 7, ‘muanjelu udi upapala munkatshi mua diulu’ udi wambila bantu bonso bua benze tshinyi?
4 Bantu miliyo ne miliyo batu banyisha bua kubala Réveillez-vous! bualu utu wakula bua malu kabukabu mu mushindu mulenga. Kakuyi mpata, tshitupa tshinene tshia bantu batu babuela mu Tshivulukilu tshidimu tshionso batu ne tshibidilu tshia kubala Réveillez-vous! Nansha nanku, bikala muntu musue bua bamusokoke mu “dituku dia tshiji tshia Yehowa,” udi ne bua kupeta diambuluisha bua amone mua kuenza malu makuabu pa kumbusha didibadila dia mikanda yetu.—Sef. 2:3; Buak. 14:6, 7.
5. (a) Kutuadija ne Réveillez-vous! wa Tshiongo 2006, nebatambe kuakuila pa malu kayi? (b) Bantu ba bungi badi mua kufika ku dienza tshinyi, ne nebikumbaje mulayi kayi?
5 Nunku, bituadijile mu ngondo wa Tshiongo 2006, Réveillez-vous! neatambe kushindamena pa Bukalenge bua Nzambi. Neatambe kukankamija buludiludi bantu bua kukeba mishindu ya kujikija ntatu yabu mu Mukanda wa Nzambi ne kabidi neatambe kuakuila pa tshidi Bible wamba bua mianda idi yenzeka lelu. Nunku babadi nebumvue bimpe mianda eyi ne malu adibu babala neabasake pamuapa bua kumanya malu a bungi adi atangila Yehowa.—Zek. 8:23.
6, 7. (a) Mmunyi mualongololabu Réveillez-vous! bua kuambuluishaye bantu ba bungi bua batumikile 1 Tesalonike 2:13? (b) Réveillez-vous! neikale upatuka misangu bungi kayi ku ngondo, ne dishintuluka edi nedilenge miakulu mitue ku bungi munyi?
6 Réveillez-vous! neatungunuke ne kuakula bua malu adi akoka ntema ya bantu bonso. Kadi tshidibi neatambe kushindamena pa Bible. (1 Tes. 2:13) Bu mudi Tshibumba tshia Nsentedi tshikale ne malu male a mu Bible ne bu muikala Réveillez-vous! ne bua kushindamena nangananga pa malu a mu Bible, nanku kabiena kabidi ne mushinga bua kutungunuka ne kupatula Réveillez-vous! misangu ibidi ku ngondo to. Ke bualu kayi, kubangila ku nimero wa Tshiongo 2006, Réveillez-vous! neikale upatuka anu musangu umue ku ngondo. Kuenza nenku nekupepeje malu a bungi adi atangila dilongolola, dikudimuna ne dituma dia mikanda yetu.
7 Dishintuluka edi nedilenge bia pa lukama bu 40 bia ku miakulu yonso mudi Réveillez-vous! upatuka. Mu miakulu ya bungi, Réveillez-vous! ukavua upatuka musangu umue ku ngondo anyi musangu umue ngondo yonso isatu. Kadi dipatula dia Tshibumba tshia Nsentedi diodi kadiena dishintuluka to.
8. Mmushindu kayi wikala bamanyishi mua kuabanya Réveillez-vous! pamue ne Tshibumba tshia Nsentedi?
8 Bamanyishi nebafile Réveillez-vous! wa ngondo yonso pamue ne nimero umue anyi mukuabu wa Tshibumba tshia Nsentedi bua ngondo au. Bamanyishi badi babanya Réveillez-vous! nebafile nimero umue umue au ngondo mujima kabayi bashintulula mushindu wa kumufila munkatshi mua ngondo bu mudibu benza mpindieu.
9. Réveillez-vous! neatungunuke ne kuikala ne mudimu kayi?
9 Katshia ku 1919, tshibejibeji etshi tshivua tshimanyike kumpala bu L’Âge d’Or, pashishe bu Consolation, ne mpindieu bu Réveillez-vous! ntshiambuluishe bikole mu mudimu wa diyisha. Tudi tulomba Yehowa bua atungunuke ne kubenesha bionso ebi bua diabanya dia tshibejibeji etshi diambuluishe bantu ba bungi ba ‘munkatshi mua ditunga dionso, bisamba bionso, bantu bonso, ne miakulu yonso’ bua bashale batekemene anu Bukalenge bua Nzambi.—Buak. 7:9.