Tuyishayi katuyi tuakula
1 Bintu bitudi tumona bidi Yehowa mufuke bidi bileja ngikadilu yende mivule kabiyi biakula. (Mus. 19:1-3; Lomo 1:20) Bia muomumue, tshikadilu tshietu tshimpe, ngikadilu yetu ya bena Kristo ne tshimuenekelu tshietu tshimpe bidi biyisha kabiyi bipatula dîyi. (1 Pet. 2:12; 3:1-4) Nanku, tuetu bonso tudi ne bua kukeba bua ‘kutumbishisha diyisha dia Nzambi, Musungidi wetu, mu malu onso’ ku ngikadilu yetu.—Tito 2:10.
2 Mmunyi mudi bantu betu aba mua kulengeja dilongesha dia mu Bible? Dîyi dia Nzambi ne nyuma muimpe ke bidi mua kubambuluisha bua kuenza nanku. (Mus. 119:105; 143:10) Didi mua kubambuluisha bualu ‘didi ne muoyo ne bukole, didi dipita muele wonso musakisha nseke ibidi kutua.’ (Eb. 4:12) Didi dibuela munda muetu ne dituambuluisha bua kuvuala bumuntu bupiabupia. (Kolos. 3:9, 10) Nyuma muimpe yeye udi upatula ngikadilu mimpe munda muetu bu mudi bulenga, buimpe, lutulu ne didikanda. (Gal. 5:22, 23) Utuku ulekela dîyi dia Nzambi ne nyuma wende bilengeja ngikadilu yebe anyi?—Ef. 4:30; 1 Tes. 2:13.
3 Bakuabu badi bamona: Patudi tutumikila mikenji ya Yehowa ne tudienzeja bua kuikala ne ngikadilu yende, bakuabu badi bamona bualu ebu. Tuangate tshilejilu tshia muntu mulume mukuabu uvuabu baseka kudi bena mudimu nende bualu uvua muipi. Kadi muanetu wa bakaji mukuabu uvua wenza mudimu mu biro bimue ne muntu eu uvua yeye umunemeka. Ke kusakabi muntu au bua kumuebeja bua tshinyi uvua yeye mushilangane ne bakuabu. Muanetu wa bakaji kumuandamuna ne: uvua unemeka bantu bualu uvua utumikila mêyi a mu Bible. Wakamumanyisha kabidi ditekemena dilenga dia Bukalenge bua Nzambi. Muntu au wakatuadija kulonga Bible ne kuluaye kutambula. Pakapinganaye mu ditunga diabu, ngikadilu wende muimpe wakakemesha balela bende bikole ne bavule ba kudibu bakitaba pabu bulelela.
4 Ku mudimu, mu kalasa anyi patudi ne balela betu ne bena mutumba netu, tudi mua kuenza bua ngikadilu wetu muimpe ne mudimu wetu wa kuyisha bisake bakuabu ku ditumbisha Nzambi.—Mat. 5:16.