Mua kutuadija malonga a Bible bimanyine kulukulu ne ku telefone
1, 2. Mmunyi mutudi mua kufika ku dilonga Bible ne bantu badi ne bia bungi bia kuenza?
1 Lelu bantu batu ne bia bungi bia kuenza. Kadi bavule batu basankidila malu a mu nyuma. Nunku, tshia kuenza ntshinyi bua kubambuluisha bua kukumbajabu majinga abu a mu nyuma? (Mat. 5:3) Bamanyishi bavule batu balonga Bible ne bantu bimanyine kulu anyi ku telefone. Udiku mua kuenza pebe mushindu eu anyi?
2 Bua kutuadija malonga a Bible, tudi ne bua kuikala badiakaje bua kuleja muntu mushindu utu dilonga dia Bible dienzeka. Tudi mua kuenza nunku mushindu kayi, ne penyi?
3. Bua tshinyi bidi bimpe kuleja muntu mushindu wa kulonga Bible anu dia nzanzanza, ne mmunyi mutudi mua kuenza nanku?
3 Kulukulu: Paudi upetangana ne muntu udi musue kuyukila malu a mu Bible, bulula diakamue anu pa tshikoso tshiuvua mudianjile kulongolola, bu mudi tshikoso tshia kumpala tshia mu dilongesha dia kumpala dia broshire wa Utulomba, ne tuadija. Bala tshikoso, bala lukonko ne bala mvese umue anyi ibidi ya ku idibu belamu. Misangu mivule, bitu bilomba anu minite itanu anyi dikumi patupu bua kuenza nunku diakamue paudi upetangana ne muntu kumbelu. Pikalabi bimusankisha, numvuangane bua kulua kumona malu makuabu adi mu tshikoso tshimue anyi bibidi bidi bilonda musangu udi kumpala.—Mibelu mikuabu pa mushindu wa kutuadija malonga diakamue idi mu Mudimu wetu wa Bukalenge wa Tshiongo 2002, dib. 6.
4. Mmunyi mutudi mua kutuadija dilonga dia Bible bimanyine anu kulu patudi tuenza makumbula mapiamapia?
4 Tudi kabidi mua kutuadija malonga a Bible patudi tuenza makumbula mapiamapia. Tshilejilu, udi mua kuleja mua kulonga broshire wa Utulomba ne kuakula bua dîna dia Nzambi pa kukuata mudimu ne dilonga 2, tshikoso 1-2. Mu dikumbula dialonda, nudi mua kuyukila pa tshidi Bible wamba bua ngikadilu ya Yehowa mu tshikoso 3 ne 4. Musangu udi kumpala, nudi mua kukonkonona tshikoso 5 ne 6 ne tshimfuanyi tshidi mu dibeji 5 bua kuleja mudi dilonga dia Bible dituambuluisha bua kumanya Yehowa. Bionso ebi bidi mua kuenzeka bimanyine anu kulukulu ne muntu.
5, 6. (a) Bua tshinyi bamue bantu badi mua kujinga bua kulonga Bible ku telefone? (b) Mmunyi mutudi mua kuenza bua kutuadija dilonga dia Bible ne bantu ku telefone?
5 Ku telefone: Bamue bantu badi mua kuikala batambe kunanga bua kulonga netu Bible ku nshinga pamutu pa kulonga netu mpala ne mpala. Tangila bualu budi bulonda ebu: Pavua muanetu mukuabu wa bakaji uyisha ku nzubu ne ku nzubu, wakapetangana ne munga nsongakaji ukavua mulele ne uvua wenza mudimu uvua umuangata mêba a bungi. Muanetu wa bakaji au wakamubikila ku nshinga bualu kavua kabidi ne mushindu wa kumusangana ku nzubu to. Nsongakaji au wakamumvuija ne: kavua ne dîba to. Muanetu wa bakaji wakamuambila ne: “Kudi mushindu wa wewe kulonga bualu bupiabupia mu minite 10 anyi 15 nansha ku nshinga. Nsongakaji au wakamuandamuna ne: “Bua ku nshinga ndi ngitaba.” Abidi mmale asatu mmîpi, bakatuadija kulonga pa tshibidilu ku telefone.
6 Bamue ba ku bantu baudi uyisha badi mua kuikala ne dijinga dia kulonga ku nshinga anyi? Udi mua kuteta kuenza anu bu mudibu baleje, anyi udi mua kuamba patupu ne: “Biwikala musue, tudi mua kuyukila malu a mu Bible ku telefone. Udi umona munyi?” Tuetu tukeba kulonga Bible ne bantu bilondeshile nsombelu wabu, tudi mua kubambuluisha bua ‘kupeta dimanya dia malu a Nzambi.’—Nsu. 2:5; 1 Kol. 9:23.