Mua kudilongolola bua kufila bibejibeji

1. Bua tshinyi mbimpe kulongolola etu mêyi a mushindu wa kuakula kumpala kua kufila bibejibeji pamutu pa kuambulula anu adibu baleje mu Mudimu wetu wa Bukalenge?

¹ Pamuapa udi mua kudiambila ne: ‘Bobu bamane kuleja mushindu wa kufila bibejibeji mu Mudimu wetu wa Bukalenge, kadi mbua tshinyi bidi bikengela anu kudilongolola kabidi?’ Nansha mudi mishindu ya mua kufila bibejibeji idibu batufundila eyi yambuluisha bantu ba bungi, mbimpe kuanjiku anu kudilongolola. Mushindu kampanda wa mua kuakula kumpala kua kufila bibejibeji mu teritware kampanda udi mua kuikala muimpe kadi kauyi muimpe mu teritware mukuabu. Nunku, katuena benzejibue bua kubala muaku ku muaku mêyi a mua kufila bibejibeji adibu baleje mu Mudimu wetu wa Bukalenge to. Nansha tuetu bangate umue wa ku mishindu idibu balejemu eyi, mbimpe tuetu kuakula mu etu mêyi.

2. Ntshinyi tshiudi ne bua kuenza bua kumanya tshiena-bualu tshimpe tshia kuleja muntu?

² Sungulamu tshiena-bualu: Anji bala tshibejibeji atshi tshionso, pashishe usungulamu tshiena-bualu tshidi tshikumbanyine teritware wenu, nangananga tshiudi umona tshikusankisha. Wewe wakula ne muoyo mujima ne musangelu paudi uleja muntu tshiena-bualu atshi, bidi mua kumusaka bua kutshikeba pende bua kutshibalaye. Nansha muudi pamuapa mua kuleja tshiena-bualu kampanda tshidi mua kusankisha bantu ba bungi ba mu teritware wenu, mbimpe umanye kabidi biena-bualu bikuabu bidi mu tshibejibeji atshi. Kuenza nanku nekukuambuluishe bua kushintulula mêyi a kuamba paudi kumpala kua muntu udi musue yeye tshiena-bualu tshikuabu.

3. Mmunyi mutudi mua kutuadija muyuki muimpe ne bantu?

³ Ela kalukonko: Longolola kabidi mêyi ebe a ntuadijilu awu bimpe, bualu adi ne mushinga wa bungi. Mbimpe kuikala kuelaku muntu kalukonko kimpe ka kumuyobola naku bua kumujula nyota ya tshiena-bualu tshiudi musue kumuleja. Nkonko idi mua kumusaka bua kuleja mudiye pende wela meji itu nangananga mimpe. Kadi wamanya, kumuedi nkonko idi mua kumutondesha nsombelu anyi ya mufuana kudimona bu udi ku tshilumbuluidi to.

4. Kubadila muntu mvese kampanda padiku mushindu nkuimpe ku tshinyi?

⁴ Balaku mvese: Bua kujikija, sungula mvese uudi mua kubadila muntu padiku mushindu, pamuapa mvese wa ku idi mu tshiena-bualu tshiudi umuleja. Paudi ubadila muntu mvese, udi umona ne: malu audi umuambila adi afumina mu Dîyi dia Nzambi. (1 Tes. 2:13) Nansha yeye mubenge tshibejibeji, kadi newikale mumane kumuyisha ne mvese awu. Bamue mbafikishe bantu ku dibateleja pa kudianjila kubabadilaku mvese kampanda kumpala kua kubela lukonko kansanga. Kumpala kua kubala mvese udi mua kuambila muntu ne: “Mvua musuaku kumanya tshiudi pebe wela meji bua mvese eu.” Pashishe muleja bualu kampanda bua mu tshibejibeji atshi budi bupetangana ne mvese eu ne usakidilaku mêyi makese bua kumujula nyota ya bungi ya kutshibala kumpala kua kumupeshatshi.

5. Mmalu kayi atudi katuyi mua kupua muoyo patudi tudilongolola bua mushindu wa kufila bibejibeji?

⁵ Ki mbatuelele mikenji ya mushindu utudi ne bua kuakula patudi tufila bibejibeji to. Kadi mbimpe kuakula nangananga mêyi mapepele makese tshianana. Angata mêyi a kubanga nawu muyuki adi makupepelele adi mua kufikisha bantu ku dikuteleja. Leja dikuatshisha didi nadi bibejibeji abi ne ikala ne musangelu. Wewe muikale udilongolola bimpe, neufike ku dipesha bantu badi badiakaje ‘bua kubapabu muoyo wa tshiendelele’ Tshibumba tshia Nsentedi ne Réveillez-vous! kakuyi lutatu to.​—Bien. 13:48.