Ngondapilu mutambe buimpe nngondapilu kayi?

Munganga Michael Rose udi mulombodi wa lupitadi kampanda udi wamba ne: “Mubedi yonso udibu bondapa kabayi bamuela mashi ke mubedi udibu bondope bimpe bitambe.” Nngondapilu kayi idibu mua kuondopa nayi muntu “kabayi bamuela mashi”? Mmanga kayi adibu mua kumuondopa nawu pamutu pa kumuela mashi? Tudi ne bua kumanya malu aa bua kumona mua kusungula ngondapilu mujalame padibi bikengela bua kutuondopabu disama kampanda anyi kutupanda. Bua bualu ebu, tangila bande wa video wa Pas de sang​—la médecine relève le defi. Pashishe, teta kuandamuna nkonko idi kuinshi eku.​—Dimanyisha: Bu mudi bande eu muikale ne imue miaba idibu baleja mu tshikoso mudibu bapanda bantu, baledi badi ne bua kuikala ne budimu padibu bamutangila ne bana babu batekete.

(1) Mbualu kayi bunene butu Bantemu ba Yehowa babengela bua kubelabu mashi? (2) Ntshinyi tshitu Bantemu ba Yehowa bajinga padibi bikengela kudiondapisha? (3) Mbukenji kayi budi nabu mubedi yonso? (4) Bua tshinyi mbimpe muntu nkayende adiangatshile dipangadika mu bualu bua kusungula kua ngondapilu mikuabu ya kabayi bamuela mashi? (5) Mmalu kayi manene abidi adi baminganga mua kuenza kumpalampala dîba didi mashi a muntu makepele bikole? (6) Tela malu manene anayi atubu balonda bua kuondopa muntu kakuyi dimuela mashi. (7) Mmunyi mudi baminganga mua (a) kuenza bua mashi a muntu kaakepedi bikole, (b) kulama globile mikunze, (c) kukeba bintu bidi mua kuvudija mashi mu mubidi, ne (d) kuenza bua kubenga kujimija mashi adi apatuka mu mubidi wa muntu? (8) Umvuija ngondapilu udibu babikila ne: (a) diengulula dia mashi (hémodilution) ne wa (b) kuangata mashi adi apatuka mu mubidi wa muntu kuatata ne kupingaja globile yawu mikunze mu mubidi wende. (9) Ntshinyi tshiudi ne bua kumanya pa bidi bitangila manga adibu mua kuondopa nawu muntu pamutu pa kumuela mashi? (10) Muntu udi ne disama didi mua kutatshisha bamunganga bua kudipanda, badiku mua kumupandadi kabayi bamuele mashi anyi? (11) Mbualu kayi buimpe budi baminganga benda benza mu malu a diondopangana matuku etu aa?

Kuitaba imue ya ku mishindu ya diondopangana idibu baleje mu bande eu ndipangadika didi muntu ne muntu ne bua kudiangatshila bilondeshile kondo kende ka muoyo kalongesha kudi Bible. Ukadi mudisunguile mushindu wa luondapu uudi umona muimpe buebe wewe ne bua bana bebe anyi? Manyisha bena dîku diebe badi kabayi Bantemu dipangadika dia luondapu luudi mudisunguile alu ne tshiudi mudiangatshile.​—Tangila “Nkonko ya babadi” mu Tshibumba tshia Nsentedi tshia dia 15 Kabalashipu 2004 ne tshia dia 15 Kasuamansense 2000.