Kanupu bakadi balekele kuyisha ne kubuela mu bisangilu muoyo
1. Bua tshinyi tudi ne bua kuambuluisha muntu ukadi mulekele kuyisha ne kubuela mu bisangilu?
1 Udiku mumanye muanetu kampanda ukadi mulekele bisangilu ne mudimu wa kuyisha anyi? Pamuapa ni mmupambuke mukose ne makasa mu tshisumbu! Udi mufuane kusambakena ne muntu wa mushindu eu paudi uyisha ku nzubu ne ku nzubu. Kadi umanye ne: muntu eu utshidi anu muena Kristo netu. Mbimpe amone ne: tudi bamunange, kabidi tumuambuluishe bua apingane mu tshisumbu ne kudi ‘mulami ne mutangidi wa mioyo yetu.’—1 Pet. 2:25.
2. Mmunyi mutudi mua kukankamija muntu udi mulekele bisangilu ne kuyisha?
2 Muleja muudi umutabalela: Padi muntu udi mulekele bisangilu ne kuyisha umona tumubikilaku ku telefone nansha bua munite umue anyi tuya kumutangila, udi ujingulula ne: katuena bamupue muoyo to. Kadi ntshinyi tshituamuambila bua kumukankamija? Tudi mua kumuambila anu patupu ne: tutu anu nende mu meji. Akula ne musangelu ne mêyi adi amukolesha ku muoyo. (Filip. 4:8) Tudi mua kumutelela bualu buvua butusankishe mu tshisangilu tshituvua babuele. Tudi kabidi mua kumubikila mu tshisangilu tshidi tshilonda anyi mu mpuilu ne kumuambila ne: netumulamine muaba anyi makuta a kumufutshila njila.
3. Mmunyi muvuabu bambuluishe muanetu wa bakaji kampanda bua kualukila mu tshisumbu ne kutuadija kuyisha?
3 Muanetu mukuabu wa bakaji wakasangana munga muanetu wa bakaji ukavua mulekele kuyisha ne kubuela mu bisangilu kukavua bidimu 20 mu teritware wende. Nansha muakabengaye bua kulonga Bible, muanetu wa bakaji au wakatungunuka anu ne kulua kumutangila, umutuadila bibejibeji bipiabipia. Panyima pa mpungilu wa distrike, muanetu kuyaye kumulondela amue malu manene avuaye mumvuamu. Panyima pa matuku, yeye pende kutuadijilulaye kubuela mu bisangilu ne kuyisha.
4. Ntshinyi tshitudi mua kuenza ne muanetu ukavua mukose makasa mu tshisumbu padiye utuadija kabidi kulua mu bisangilu?
4 Padi muanetu upingana: Ntshinyi tshitudi mua kuenza ne muanetu ukavua mukose makasa mu tshisumbu kadi mutuadijilule kuluamu kabidi? Tshilejilu, ntshinyi tshiakenza Yezu pavua bayidi bende bavua banji kumushiya nkayende bapingane kudiye? Wakababikila ne disanka dionso ne: “Bana betu” ne uvua ubatekela muoyo. Wakabapesha too ne mudimu wa mushinga mukole. (Mat. 28:10, 18, 19) Matuku makese pashishe, bakayisha bantu lumu luimpe ‘kabayi balekela.’—Bien. 5:42.
5. Tela malu atudi ne bua kuambila bakulu bua muntu ukavua mukose makasa mu tshisumbu.
5 Kumpala kua kuambila muntu ukavua mukose makasa mu tshisumbu munkatshi mua matuku a bungi bua kulonga nende Bible anyi bua kuyaye katufila mu buambi, tudi ne bua kuanji kuambila bakulu bualu ebu bua batuleje tshia kuenza. Nansha patudi tupetangana ne muanetu wa mushindu eu mu teritware, tudi ne bua kuambila kabidi bakulu bua bamone mua kumuambuluisha bu mudibi bikengela.
6. Patudi tuambuluisha muntu ukavua mukose makasa mu tshisumbu, tshitudi tupeta ntshinganyi?
6 Bible udi uleja patoke ne: anu bantu bashala balamate Nzambi too ne ku nshikidilu ke basungidibua. (Mat. 24:13) Nunku keba bua kumanya bantu bakadi balenduke anyi bapambuke. Tuetu batabalele bantu ba mushindu eu ne dinanga ne lutulu anu bu mutu Yehowa wenza, netupete disanka dia kubamona batuadijilula kabidi kuenzela Yehowa mudimu pamue netu.—Luka 15:4-10.