“Nuikale nuenza nenku bua kumvuluka”
Netuvuluke lufu lua Yezu mu dia matuku 2 a ngondo 4
1. Bua tshinyi dituku 2 dia ngondo 4 wa 2007 ndituku dia mushinga mukole?
1 Mu dia matuku 2 a ngondo muinayi mu tshidimu tshia 2007 emu, bantu binunu ne binunu nebadisangishe bua kuvuluka muvua Yezu mulambule muoyo wende bua kutupikula. Yezu wakafua bualu uvua anu musue kuleja ne: Yehowa ke udi mukumbane bua kuikala mfumu wa bionso, kuleja kabidi ne: Satana uvua mushiminyine bantu mudibu benzela Nzambi mudimu anu bua kupeta masanka. (Yobo 2:1-5) Didia dia Mukalenge didi kabidi dituvuluija ne: pakafua Yezu lufu lua muntu uvua kayi kalema, kayi ne bubi nansha bumue buvuaye muenze, ‘wakafila muoyo wende bua kupikula nawu bantu ba bungi.’ (Mat. 20:28) Bua bualu ebu, Yezu wakambila bayidi bende ne: “Nuikale nuenza nenku bua kumvuluka.” (Luka 22:19, MMM) Dianyisha diebe bua bualu budi Nzambi mutuenzele ebu kadienaku dikusaka bua kutuadija kudilongolola bua kuvuluka bualu ebu budi butambe onso, budi buleja mudiye mutunange bikole anyi?—Yone 3:16.
2. Mmunyi mutudi mua kulongolola muoyo wetu bua Tshivulukilu?
2 Longolola muoyo webe: Wewe ukonkonona malu avua menzeke matuku a ndekelu kumpala kua Yezu kufuaye, neulongolole muoyo webe bua kuikalaku pebe mu Tshivulukilu tshia lufu luende. (Eze. 7:10) Bua kutuambuluisha, mbenze programe wa dibala dia Bible mu kakanda ketu ka Tukonkononayi Mifundu dituku dionso—2007 ne mu Calendrier ka 2007. Mbenze programe eu bilondeshile malu avua menzeke mu matuku makese avua madianjidile lufu lua Yezu too ne ku dituku dia lufu luende bilondeshile kalandriye ka matuku etu aa. Matuku adibu baleje mu Bible nga mu kalandriye ka bena Yuda. Bilondeshile kalandriye aku, dituku divua dituadija padi dîba dibuela ne dijika padidi dibuela kabidi dituku didi dilonda. Mbenze programe wa dibala dia Bible bua Tshivulukilu eu bilondeshile mushindu uvuabu babala matuku eu. Tuetu balonde programe wa dibala dia Bible eu ne bele meji ne muoyo mujima bua mushindu udi Nzambi mutunange, dibuela mu Tshivulukilu tshia lufu lua Yezu nedituambuluishe bikole.
3. Mmunyi mutudi mua kuambuluisha benyi ne bana betu bakadi balekele kuyisha ne kubuela mu bisangilu bua kubuela mu Tshivulukilu?
3 Bikila bantu bakuabu mu Tshivulukilu: Bavua batumanyishe mu tshisakidila tshia Mudimu wetu wa Bukalenge wa ngondo mushale ne: netuenze mudimu munene wa kubikila bantu mu tshibilu etshi tshia mushinga mukole. Ukadi mudilongolole bua kuwenza bikole anyi? Ukadi mufunde mêna a balela ne balunda bebe ne bakuabu baudi mumanye bawabikila mu Tshivulukilu anyi? Ukadi mutuadije kubambila anyi? Dilongolola bua wikale muaba unuenzela Tshivulukilu kumpala kua dîba bua kuakidila bantu baudi mubikile ne bakuabu benyi balua. Somba nabu muaba umue. Bikalabu kabayi ne Bible ne mukanda wa misambu yetu, ubakebelabi. Uye nabu kudi bana betu bakuabu ba mu tshisumbu bua bamanyangane nabu. Padi Tshivulukilu tshijika, enza muebe muonso bua kukeba bua kuandamuna nkonko yabu. Ubabikile bua balue kuteleja muyuki wa patoke wenzabu mu dia matuku 15 a ngondo 4. Bakulu badi ne bua kuenza muabu muonso bua bana betu bakadi balekele kuyisha ne kubuela mu bisangilu bapete pabu dibeji dia dibikilangana nadi bua bamone mua kubuela mu Tshivulukilu ne mu muyuki wa patoke eu.
4. Mmunyi mutudi mua kuambuluisha bantu batuvua babikile mu Tshivulukilu bua batungunuke ne kuvudija dimanya diabu dia Nzambi ne kukolesha ditabuja diabu?
4 Ambuluisha benyi ne bana betu bakavua balekele kuyisha ne kubuela mu bisangilu bua kuya kumpala: Ngamba-malu wenza muyuki wa Tshivulukilu nealeje mu tshikoso mushindu ututu tulonga Bible ne bantu ne kulomba batshidi batuadijilaku kuyukila netu bua kutungunuka ne kulonga malu a Yehowa. Udi mua kutela mêyi a buena amba ngamba-malu au bua kuambuluisha bauvua mubikile mu Tshivulukilu bua bakebe mua kulonga malu makuabu a Yehowa. Bikalabu kabayi banji kutuadija kulonga Bible, uye kubatangila diakamue matuku makese panyima pa Tshivulukilu bua kubaleja mututu tulonga Bible ne bantu. Bua kumonabu mua kukolesha dimanya diabu dia malu a Nzambi ne kukolesha ditabuja diabu, mbimpe bikale kabidi babuela mu bisangilu. (Eb. 10:24, 25) Nunku, ubambile bua kutuadija kubuela mu bisangilu. Bakulu badi ne bua kuya kutangila bana betu bakavua balekele kubuela mu bisangilu ne kuyisha kadi bavua babuele mu Tshivulukilu bua kubambuluisha bamone mua kuelangana meji a bungi bua malu avuabu bambe mu muyuki. Bualu ebu budi mua kubambuluisha bua kutuadijilula kuyisha ne kubuela mu bisangilu.
5. Kubuela mu Tshivulukilu nekutupeteshe tshinyi?
5 Patudi tubuela mu Tshivulukilu, tudi tupeta mushindu wa kuela meji bikole bua tshidi Yehowa ne Yezu batuenzele. Diela meji edi didi ditufikisha ku dibananga bikole ne ku dilengeja bienzedi bietu. (2 Kol. 5:14, 15; 1 Yone 4:11) Mpindieu ke dîba dia tuetu kutuadija kudilongolola ne kutuadija kuambila bantu batutu tulonga nabu Bible bua tshibilu tshia mushinga mukole etshi mutuikala ne bua ‘kuambila bantu bua lufu lua Mukalenge’ wetu Yezu Kristo.—1 Kol. 11:26.