Mandamuna ku nkonko yenu

▪ Mmunyi mudibu ne bua kuimbisha musambu wa kutuadija nawu Kalasa ka Mudimu wa Nzambi, Tshisangilu tshia Mudimu, Tshisangilu tshia Patoke ne Dilonga dia Tshibumba tshia Nsentedi? Nnganyi udi ne bua kuwimbisha?

Misambu idibu basungule bua kutuadija nayi Kalasa ka Mudimu wa Nzambi lumingu luonso idi mu programe utubu bapatula mu Mudimu wetu wa Bukalenge wa ngondo wa 10. Musambu wa kutuadija ne kujikija nawu Tshisangilu tshia Mudimu batu bawuleja mu dibeji 2 dia Mudimu wetu wa Bukalenge. Biamuomumue, musambu wa kutuadija ne kujikija nawu Dilonga dia Tshibumba tshia Nsentedi udi mu dibeji diatshi dibidi. Misambu idibu bafila eyi idi tshitupa tshia tshisangilu ne tshisangilu tshionso. Nunku badi ne bua kuyimbisha kudi muanetu udi ulombola tshisangilu atshi, kadi ki nkudi muanetu udi mulombole tshisangilu tshidi tshifuma ku dijika to.

Tshilejilu, Mutangidi wa Kalasa ka Mudimu wa Nzambi udi ne bua kujingila bantu difika dilenga, kuimbisha musambu wa ntuadijilu ne kulombola kalasa too ne ku ndekelu, pashishe kubikila muanetu udi ne tshitupa tshia kumpala mu Tshisangilu tshia Mudimu. Muanetu udiye ubikila eu ke udi ne bua kulua kuimbisha musambu wa kutuadija nawu Tshisangilu tshia Mudimu.

Ke mudi kabidi mulombodi wa Tshisangilu tshia Patoke ne bua kuenza. Udi ne bua kujingila bantu difika dilenga ne disanka dionso ne kubalomba bua kuimba musambu udi ngamba-malu musungule. Padi musambu ujika, yeye (anyi muanetu mukuabu udi mukumbane uvuabu badianjile kusungula) neenze disambila dia ntuadijilu. Mulombodi wa Tshisangilu tshia Patoke ke udi ne tshia kubikila ngamba-malu ne kuleja tshiena-bualu tshia muyuki wende. Padi muyuki ujika, mulombodi kêna ne bua kuambulula mu tshikoso malu avua ngamba-malu muambe to, kadi neamuele anu tuasakidila patupu mu mêyi makese bua muyuki wende. Pashishe udi umanyisha tshiena-bualu tshia muyuki wa lumingu ludi lulonda ne ulomba bateleji bua kushala bua Dilonga dia Tshibumba tshia Nsentedi. Bikala ngamba-malu muikale wa mu tshisumbu tshikuabu, mulombodi wa muyuki kêna ne bua kuebeja bateleji ni mbasue kutuminaku bena mu tshisumbu atshi muoyo to. Pashishe, udi ne bua kubikila mulombodi wa Tshibumba tshia Nsentedi.

Mulombodi wa Tshibumba tshia Nsentedi ke udi ne bua kuimbisha musambu wa kumpala wa tshisangilu etshi. Udi ne bua kulombola tshisangilu etshi bilondeshile malu atu bulongolodi buleje ne kuimbisha musambu wa ndekelu. Pashishe neabikile muanetu uvua muenze muyuki wa patoke bua kuenza disambila dia ndekelu.

Kutumikila malu aa nekutuambuluishe bua kuenza bisangilu bia tshisumbu mushindu umue tuetu bonso.