Longeshayi bana benu mua kutumbisha Yehowa
1. Bana badiku mua kutumbisha Yehowa anyi?
1 Musambu wa 148:12, 13 udi ulomba bana batekete bua kutumbisha dîna dia Yehowa. Mu Mukanda wa Nzambi mudi bilejilu bivule bia bana bavua batumbisha Yehowa. Tshilejilu, ‘Samuele wakenzela Yehowa mudimu patshivuaye muana.’ (1 Sam. 2:18) ‘Nsongakaji mukese’ ke wakambila mukaji wa Nâmana ne: kuvua muprofete wa Yehowa mu Isalele uvua mua kuondopa nsudi ya Nâmana. (2 Bak. 5:1-3) Pakabuela Yezu mu ntempelo ne kuenzamu bishima, “bana” ke bakela mbila bamba ne: “Hosana ikale kudi muana wa Davidi!” (Mat. 21:15) Mmunyi mudi baledi mua kulongesha bana babu mua kutumbisha Yehowa?
2. Bua tshinyi mbimpe baledi baleje bana babu tshilejilu tshimpe?
2 Tshilejilu tshienu: Yehowa uvua muambile bena Isalele ne: kumpala kua bobu kubueja bulelela mu mitshima ya bana babu, bavua ne bua kuanji kumunanga bobu nkayabu ne kulama mêyi ende mu mitshima yabu. (Dut. 6:5-9) Nuenu nuakula nuleja mudi mudimu wa buambi mulenga, nenuyishe lumingu luonso, bana benu nebamone ne: mmudimu wa mushinga mukole ne udi upetesha bantu disanka.
3. Mmunyi mudi muanetu wa bakaji kampanda mupete diambuluisha ku tshilejilu tshia baledi bende?
3 Muanetu wa bakaji mukuabu udi wamba ne: “Patutshivua bana, baledi betu bavua benze programe wa kuyisha ku ndekelu kua lumingu luonso. Ngakamona ne: baledi banyi bavua banange kuyisha bikole. Too ne mutuakakole, tuvua tumona mudimu wa buambi bu tshintu tshia disanka.” Ke bualu kayi muanetu wa bakaji eu wakalua mumanyisha udi kayi muanji kutambula pavuaye ne bidimu 7 ne lelu eu kukadi bidimu bipite pa 32 bidiye mpanda-njila.
4. Kulongesha bana ku kakese ku kakese kudi kumvuija tshinyi?
4 Balongeshayi ku kakese ku kakese: Ikalayi nuenza bua bana benu bayishe pabu panudi nupatuka nabu mu buambi. Tshilejilu, badi mua kukokola ku tshiibi, kupesha muntu trakte anyi kubala mvese. Bualu ebu nebubasankishe ne nebumvue ne: badi pabu mua kuyisha lumu luimpe. Padibu benda bakola, nebatuadije kuenza malu a bungi mu buambi. Kadi bambuluishayi bua kuya kumpala ne kuela meji a bidibu mua kuenza mu mudimu wa Nzambi matuku adi kumpala.
5. Tela malu adi muana mua kukumbaja bua kuluaye mumanyishi udi kayi muanji kutambula.
5 Paudi umona ne: muanebe wakumbanyi bua kulua mumanyishi udi kayi muanji kutambula ne padiye yeye nkayende uleja dijinga edi, wambile bakulu. Padi muana ulua muambi wa lumu luimpe, udi udimona ne bujitu bua kutumbisha Yehowa. Kadi numanye ne: kabiena bikengela bua muana kuikalaye ne dimanya bu dia bantu bakole bakadi batambule bua kushishaye kulua mumanyishi to. Tshilejilu, muana yeye mumanye malongesha manene a mu Bible, yeye ne bikadilu bimpe, yeye musue kuamba lumu luimpe ne kulua Ntemu wa Yehowa, bakulu badi ne bua kumuitabila bua kulua mumanyishi udi kayi muanji kutambula.—Tangila mukanda wa Bulongolodi budi buenza disua dia Yehowa, dib. 79-82.
6. Bua tshinyi mbimpe baledi balongeshe bana babu?
6 Kulongesha bana mua kutumbisha Yehowa mmudimu mukole. Kadi kakuena bualu budi mua kusankisha baledi kupita padibu bamona bana babu baya kumpala mu mudimu wa Nzambi to. Kadi nangananga, Yehowa udi usanka bikole padiye umona bana bambila bantu malu ende a kukema.