Udiku mua kubuelela ku ‘tshiibi tshinene tshia kuenza mudimu’ anyi?
1. ‘Ntshiibi kayi tshinene tshia kuenza mudimu’ tshidibu batunzuluile?
1 Pakunzuluilabu mupostolo Paulo ‘tshiibi tshinene tshia kuenza mudimu,’ wakatuadija kuwenza diakamue kuyisha Bukalenge bua Nzambi ne muoyo mujima nansha muvuaye ne baluishi bavule. (1 Kol. 16:9) Lelu eu bamanyishi ba Bukalenge batue ku 642 000 pa buloba bujima badi babuelele ku tshiibi tshinene tshia kuenza mudimu mbalue bampanda-njila ba pa tshibidilu.
2. Bua tshinyi mbimpe bua yonso wa kutudi kuikalaye ukonkonona nsombelu wende ku musangu ne ku musangu?
2 Nsombelu idi ishintuluka: Nansha nsombelu uudi nende mpindieu yeye ukupangisha bua kuyisha bikole, udi mua kushintuluka. Ke bualu kayi mbimpe bua yonso wa kutudi kuikalaye ukonkonona nsombelu wende ku musangu ne ku musangu ne kubenga kuindila dîba dikala malu onso mua kuenda bimpe. (Muam. 11:4) Wewe nsonga, ukadi pa kujikija tulasa tua bikadilu anyi? Wewe muledi, muanebe mutekete ukadi pa kutuadija kuya mu kalasa anyi? Ukadi pa kuangata pasio ku mudimu anyi? Dishintuluka dia nsombelu dia nunku didi mua kukupetesha dîba bua kulua mpanda-njila wa pa tshibidilu. Muanetu mukuabu wa bakaji uvua musame munkatshi mua matuku a bungi wakangata dipangadika dia kulua mpanda-njila pavuaye ne bidimu 89. Bua tshinyi? Bu muvuaye muenze tshidimu tshijima ne matuku pa mutu kayi mubuele mu lupitadi, wakamona ne: uvua ne makanda bua kulua mpanda-njila.
3. Mmunyi mudi bamue bakaje malu bua kumona mua kulua bampanda-njila ba pa tshibidilu?
3 Paulo wakatuadija yeye mudimu wende pavuaye muye kutangila bana babu ba mu Kolinto. Wakakaja malu ende onso bua kumona mua kuyisha lumu luimpe. Bampanda-njila ba bungi batudi nabu lelu eu bavua pabu bashintulule amue malu bua kumona mua kuenza mudimu eu. Bamue mbapepeje nsombelu wabu, bafike too ne ku dienza mudimu wa bianza wa mêba makese ku dituku bua kumona mua kupeta anu bintu bia kudiambuluisha nabi. Badi bapeta disanka dia bungi mu mudimu wabu eu. (1 Tim. 6:6-8) Bamue bena dibaka mbakaje nsombelu wabu mu mushindu wa se: mulume nkayende ikale wenza mudimu bua mukaji amone mua kuikala mpanda-njila.
4. Ntshinyi tshiudi mua kuenza biwikala wela meji ne: kuena mua kukumbaja mêba malomba bampanda-njila?
4 Kutshinyi bua kulua mpanda-njila wela meji ne: kuena mua kukumbaja mêba malomba to. Wewe uyisha ku dituku mêba abidi ne minite pamutu ndambu udi ukumbaja mêba malomba. Wewe welakana, udi mua kuanji kuenza bumpanda-njila buambuluishi mu ngondo umue anyi ibidi ne tshipatshila tshia kuenza mêba 70. Bualu ebu nebukuambuluishe bua kumvua disanka ditu nadi bampanda-njila. (Mus. 34:8) Yukila ne bampanda-njila bakuabu. Imue misangu bavua mua kuikala pabu bapete ntatu ya buena yebe eyi. (Nsu. 15:22) Lomba Yehowa bua abeneshe bionso biudi wenza bua kudiundisha mudimu webe.—1 Yone 5:14.
5. Bua tshinyi kuikala mpanda-njila wa pa tshibidilu mmudimu muimpe mutambe?
5 Mudimu muimpe mutambe: Kuikala mpanda-njila wa pa tshibidilu kudi kupesha muntu masanka a bungi. Kudi kukuambuluisha bua kupeta disanka ditu bantu bapeta patubu bapesha bakuabu bintu. (Bien. 20:35) Kuikala mpanda-njila kudi kuambuluisha bua kulengeja mushindu wa kuludikila bantu njila mu Dîyi dia Nzambi dia bushuwa. (2 Tim. 2:15) Nekukupeteshe mishindu ya bungi ya kumona mudi tshianza tshia Yehowa tshikale nebe. (Bien. 11:21; Filip. 4:11-13) Nekukuambuluishe kabidi bua kuikala ne ngikadilu ya bena Kristo bu mudi wa ditantamana ne kupeta mushindu wa kuikala pabuipi ne Yehowa. (Yak. 4:8) Kuenaku pebe mua kubuelela ku tshiibi etshi tshinene tshia kuenza mudimu ne kulua mpanda-njila wa pa tshibidilu anyi?