Tudi tushimbula ngumbu mikolesha
1 Kudi mpindieu bidimu bipite bungi bidi Satana wenza mudimu ne malongesha a dishima ne mashimi makuabu bua kudinga mioyo ne ngenyi ya bantu ba bungi. Mmutangalaje malongesha bu mudi dia: Busatu busantu, dia anyima udi kayi ufua ne dia inferno wa kapia. Udi usaka bantu bua kuela meji ne: Nzambi katuku to, kubenga kuitaba ne: Bible mmukanda wa Nzambi. Ditapuluka dia dikoba ne bisamba didi kabidi dipangisha bantu bua kuitaba bulelela. (2 Kol. 4:4) Mmushindu kayi utudi mua kushimbula malongesha a nunku akadi bantu bitabe matuku a bungi?—2 Kol. 10:4, 5.
2 Tshilumbu ntshia lungenyi: Malongesha atubu bamane kulongesha muntu ne: ke malelela, ke atu ashala mu lungenyi lua muntu au bikole. Tshilejelu, bamue mbabalongeshe malongesha aa mabi katshia ku buana buabu. Bua tuetu kubambuluisha, tudi ne bua kuakula mu mushindu udi uleja kanemu bua mmuenenu udibu nende.—1 Pet. 3:15.
3 Tudi mua kunemeka bantu ba nunku patudi tubapesha mpunga bua bumvuije malongesha adibu bitabuja, batuleje kabidi bua tshinyi badi baitaba. (Yak. 1:19) Tshilejilu, badi mua kuikala balamate dilongesha dia anyima udi kayi ufua bualu bakadi bafuishe muntu uvuabu banange, nanku mbatekemene bua kumonangana nende kabidi. Anyi mbanange kuenza fete kampanda anu bualu udi ubapesha mushindu wa kusanka pamue mu dîku. Tuetu tuteleja bidibu bamba, nebituambuluishe bua kumvua tshidibu bumvua, nunku nebituambuluishe bua kubapesha diandamuna dimpe ne dikumbane.—Nsu. 16:23.
4 Idikija Yezu: Yezu uvua mutushile tshilejilu tshimpe pavuaye muandamune nkonko ya mumanyi wa mikenji kampanda. Yezu kavua mumuandamune musangu umue to, bualu, bu muvua muntu au mulamate malongesha ende bikole, uvua mua kubenga diandamuna diende. Kadi, Yezu wakenza mudimu ne Dîyi dia Nzambi, wakamulomba bua aleje tshivua munda muende, wakamuelesha meji ne tshilejilu bua kumufikisha ku diandamuna dilelela.—Luka 10:25-37.
5 Dîyi dia Nzambi didi mua kuambuluisha muntu bua kulekela malongesha a dishima adi mu bitendelelu bia bungi adiye muitabe ne muoyo mujima. (Eb. 4:12) Tuetu tumvuija bulelela ne lutulu, bidi mua kushintulula mioyo ya bateleji betu, tudi mua kufika nunku ku diambuluisha bantu bua kulekela mashimi bua kulonda bulelela budi bufila budishikaminyi.—Yone 8:32.