Mmunyi mumvuabu?

1. Ntshinyi tshidi pamuapa mua kuvuija diyisha mudimu mukole? Bua tshinyi tudi anu tutungunuka ne kuwenza?

¹ Bu mudi dituku dia Yehowa dienda dilua lubilu, bidi bikengela kuambuluisha bantu ba bungi lukasa bua bapete dimanya dijalame dia Nzambi ne dia malu adiye mulongoluele bantu. (Yone 17:3; 2 Pet. 3:9, 10) Mudimu eu kautu anu mutekete misangu yonso to, bualu bantu ba bungi batu babenga kututeleja anyi badi mua kutuseka bua mutudi tuyisha. (2 Pet. 3:3, 4) Nansha nanku, tudi bajadike bimpe ne: kudi anu bamue bantu mu teritware wetu bitaba lumu luimpe musangu umue padibu balumvua. Kadi mmunyi mualumvuabu kakuyi wa kubambilalu?​—Lomo 10:14, 15.

2. Mmushindu kayi udi tshilejilu tshia mupostolo Paulo tshitukolesha?

² Mua kupita ne buluishi: Bu mudiku bantu ba bungi badi bajinga kumvua mukenji wa Bukalenge, katuena ne bua kuteketa nansha. Tshimenga tshia Filipoi ntshimenga tshia kumpala tshivua Paulo muyishe lumu luimpe ku Mputu. Pakabandabu Paulo ne Sila ne malu a dishima, bakabatuta ne milangala e kubelabu mu buloko. (Bien. 16:16-24) Kadi lutatu lukole alu kaluvua luenze Paulo buôwa bua kulekelaye kuyisha to. Pakafikaye ku Tesalonike (tshimenga tshibidi tshivuaye muyishe mu luendu lua bu misionere alu) ‘wakakolesha mutshima [anyi muoyo] mu Nzambi.’ (1 Tes. 2:2) Tshilejilu tshia mupostolo Paulo etshi katshienaku tshituleja tshitudi katuyi ne bua ‘kupungidila’ anyi?​—Gal. 6:9, MMM.

3. Ntshinyi tshidi mua kushintuluisha mioyo ya bantu bavua kabayi bateleja lumu luimpe kumpala?

³ Bantu bavule bavua babenga kututeleja kale bakadi bashintulule mioyo yabu. Dinyanguka dia malu a mpetu, masama, lufu lua mulela kampanda, anyi ngumu ya malu mabi makuabu adi enzeka pa buloba bidi mua kushintulula bantu aba. (1 Kol. 7:31) Bakuabu batshivua bana pavua baledi babu bababengela bua kumvua bulelela mbasue kubumvua padibu balua bantu bakole. Patudi tutungunuka ne kuyisha, tudi tubapetesha mpunga wa ‘kutendekenabu dîna dia Mukalenge’ Yehowa kumpala kua nshikidilu kulua.​—Lomo 10:13.

4. Mmalu kayi adi atusaka bua kutungunuka ne kuyisha katuyi ‘tulekela’?

⁴ ‘Katulekedi’: Dinanga ditudi banange Nzambi ne muntu netu neditusake bua kutungunuka ne kuyisha ne kuvuija bantu bayidi anu muakenza bapostolo ba Yezu katuyi ‘tulekela.’ (Bien. 5:42) Bantu ba bungi badi ‘bapumuna muoyo ne badila bua malu a bundu’ adi enzeka. (Yeh. 9:4) Padi bantu aba bumvua lumu luimpe si badi bapeta ditekema ne disulakana dia dikema! Nansha padi bantu ba bungi babenga bua kututeleja, Bible udi utujadikila ne: didifila dietu didi disankisha Yehowa.​—Eb. 13:15, 16.