Matuku asatu a mabenesha a kudi Yehowa
1. Mpungilu wa distrike wa tshidimu etshi neatuambuluishe mushindu kayi?
1 Lelu udi buloba bua Satana buikale bu tshipela, Yehowa udi utungunuka ne kudisha batendeledi bende. (Yesh. 58:11) Tshimue tshia ku bintu bidi Yehowa utudisha nabi ke mpungilu wa distrike utu wenzeka ku tshidimu tshionso. Bu mukadi mpungilu wa tshidimu etshi wenda usemena, mmushindu kayi utudi mua kudilongolola bua kupeta mabenesha a kudi Yehowa ne kuapesha bantu bakuabu?—Nsu. 21:5.
2. Mmu malu kayi mutudi ne bua kudianjila kudilongolola?
2 Wewe kuyi muanji kudilongolola, banga anu ku mpindieu bua kulongolola programe yebe mikuabu ne ya malu a midimu bua ubuele mu mpungilu matuku onso asatu. Ukadiku muele meji a dîba diudi ne bua kuenda dituku dionso bua kufika muaba wa mpungilu ne kupeta muaba wa kusomba kumpala kua mpungilu kutuadija anyi? Kakuyi mpata, katuena basue kupangila katupa nansha kamue ka biakudia bimpe bidi Yehowa mutulongoluele abi nansha! (Yesh. 65:13, 14) Ukadiku mumane kulongolola malu a muaba uwalala ne a makuta a njila anyi?
3. Nngenyi kayi yatuambuluisha tuetu ne mêku etu bua mpungilu kutukuatshishaye bimpe menemene?
3 Tshiakuambuluisha bua kuteka lungenyi luebe kaba kamue padibu balongesha ntshinyi? Kuoku mushindu, mbimpe wikishe bimpe menemene butuku buonso bua matuku atuikala mu mpungilu. Wikale utangija mêsu ebe anu kudi muntu udi wakula ku tshiakuidi. Mvese yonso udibu bafila, wikale umubala pebe mu Bible. Ikala ufundaku malu makese. Badi mu mêku bobu basombelaku pamue mbimpe bua baledi bambuluishe bana babu bua kushala ne ntema. (Nsu. 29:15) Dilolo dionso mu dîku dienu, nudi nansha mua kuyikila malu kampanda manene avuabu balongeshe. Bua dîku dienu kutungunukadi ne kuikala ne bukole nansha pikala mpungilu mumane kupita, nudi mua kuteka dîba mu Ntendelelu wa mu Dîku bua kuyikila malu masunguluke anudi mua kutumikila mu dîku.
4. Mmushindu kayi utudi mua kuambuluisha bantu bakuabu mu tshisumbu tshietu bua kupeta mabenesha a kudi Yehowa?
4 Ambuluisha bakuabu bua kupeta mabenesha: Tudi basue ne: mpungilu eyi yambuluishe bantu bakuabu. Kudiku bana betu bakadi bakulakaje anyi bantu bakuabu mu tshisumbu badi dijinga ne diambuluisha bua kufikabu muaba udi mpungilu wenzekela anyi? Udiku ne mushindu wa kubambuluisha anyi? (1 Yone 3:17, 18) Bakulu, nangananga batangidi ba tusumbu, badi ne bua kuenza ne: bantu ba mushindu au bapete diambuluisha.
5. Mmushindu kayi utuabanya mabeji a dibikila nawu bantu mu mpungilu? (Tangila kabidi kazubu kadi kulu.)
5 Anu bu mututu tuenza, mbingu 3 kumpala kua mpungilu wetu kutuadijaye, netuditue mu diabanya mabeji a kubikila nawu bantu. Bisumbu bidi ne bua kudilongolola bimpe bua kujikija wabi mushiki wa mabeji adibu bapete ne kupita ku nzubu yonso wa mu teritware wabu. Bua mabeji ikale mashale mu dîku dienu ku ndekelu kua mudimu wa diabanya, nulue nawu mu mpungilu bua nuyishe nawu padi mpunga umueneka. Nebatuambile malu makuabu adi atangila mudimu eu mu Ditanu. Bua mabeji anudi nuela meji ne: katuakuapesha bantu mu mpungilu, nudi mua kuapesha bana betu badi bakidilangana ku tshiibi matuku a mpungilu. Kadi, ulamaku dibeji dimue bua wewe kutapamu dîsu pikalabu benza muyuki wa ndekelu wa mu Dia lumingu.
6. Telaku mishindu itudi mua kuleja ne: tudi ne bukalanga.
6 Bukalanga budi buambuluisha bantu: Mu tshikondo etshi tshidi bantu ba bungi “badisui” ne kabayi batangilaku mudi bakuabu badiumvua, bidi bitukolesha bua kuikala munkatshi mua bena Kristo netu batu bobu baditatshisha bua kuikala ne bukalanga. (2 Tim. 3:2) Tudi tuleja mutudi ne bukalanga patudi tubuela muaba wa mpungilu bimpe bimpe mu bulongame padibu bakangula biibi, patudi tukuatshila miaba anu bua bantu batudi nabu mu nzubu umue anyi batuvua nabu mu mashinyi amue anyi bua balongi betu ba Bible. Tudi tulonda tshidi mulombodi wa tshitupa tshionso utuambila, bu mudi bua kuya kusomba pa miaba yetu bua kuteleja mizike. Kukanga kabidi telefone padi mpungilu utuadija, mmushindu wa kuleja bukalanga. Tuetu tubenga bua kuyikila, kufundilangana malu mu telefone, kudia anyi kubanda kupueka kakuyi bualu pakadi mpungilu mubange, mmushindu mukuabu mulenga wa kuleja bukalanga.
7. Mmushindu kayi utudi mua kukoleshangana ne bana betu batuikala nabu?
7 Buena muntu budi butukolesha: Bikondo bia mpungilu bidi bitupetesha mpunga mimpe ya kukoleshibua kudi buobumue buetu bua bena Kristo ne malanda etu a buena muntu. (Mus. 133:1-3) Kuenaku mua kutuadija ‘kudiundisha mutshima’ webe ne kuya kudi bana betu ba mu bisumbu bikuabu badi balue mu mpungilu bua kusambangana nabu anyi? (2 Kol. 6:13) Nunku, udi nansha mua kudifundila bua kumanyanganaku ne muntu umue anyi ne dîku dimue peshi a bungi dituku dionso. Dikisha dia mu midi ke tshikondo tshimpe tshiudi mua kuenza nanku. Nanku, mbimpe ulue ne biakudia bikese biudi mua kudila muaba wa mpungilu, nuenda nuyikila ne bakuabu pamutu pa kupatuka bua kuya kubikeba anyi bua kudia ku restoran. Mushindu eu, neupete balunda bapiabapia ba kashidi.
8. Bua tshinyi tudi ne bua kudifila bu bena budisuile mu mpungilu? Netuenze nanku bishi?
8 Kuenza kua mudimu wa tshijila pamue ne batendeledi netu bakuabu kudi kutukolesha bikole be! Kuenaku pebe mua kudifila bu mudisuile bua kuwenza mu tshibambalu kampanda anyi kuambuluisha tshisumbu tshienu mu mudimu udibu batshipeshe wa kuteka mankenda anyi? (Mus. 110:3) Biwikala kutu wenza mudimu kampanda mu mpungilu, udi mua kupita ku Tshibambalu tshia bena budisuile. Mudimu wa bantu ba bungi utu mupepele, utu wenza ne disanka.
9. Bua tshinyi tudi ne bua kuditatshisha bikole bua ngikadilu wetu ne tshimuenekelu tshietu matuku a mpungilu?
9 Ngikadilu wetu udi ukolesha badi batumona: Tudi bu batumibue mu mpungilu eu mu matuku onso asatu, kadi ki nganu bua dîba didi miyuki yenzeka to. Bena mu musoko udi mpungilu wenzekela badi ne bua kumona dishilangana pankatshi petu ne bantu badi kabayi Bantemu. (1 Pet. 2:12) Mvuadilu wetu ne kudilengeja kuetu kua mubidi muaba wa mpungilu, miaba itudi basombele, ne mu restoran bidi ne bua kuikala bitumbisha Yehowa. (1 Tim. 2:9, 10) Tuetu base kamanyinu ketu pa tshiadi, badi batumona nebatumanye ne: tudi Bantemu ba Yehowa. Nenku netupete mushindu wa kubambila bua mpungilu ne wa kubayisha kabidi.
10. Mmalu kayi adi aleja ne: ngikadilu wetu muimpe udi mua kufikisha ku diyisha bantu bimpe?
10 Mbukole kayi budi nabu ngikadilu wetu muimpe mu matuku a mpungilu kudi bakuabu? Bilondeshile tshibejibeji kampanda, mutangidi wa muaba mukuabu uvuabu benzela mpungilu wakamba ne: “Bantu aba badi ne bukalanga be! Tutu ne disanka dia kubakidila tshidimu tshionso.” Tshidimu tshishale, muntu mukuabu uvua mujimije kabuta kende ka makuta ku tshilala benyi kuvua Bantemu batudile bua mpungilu. Pakakapeshabu mutangidi wa tshilala benyi atshi ne bintu bionso bivua munda, wakambila muenaku ne: “Udi ne diakalenga anu bualu Bantemu ba Yehowa badi muaba eu bua mpungilu wabu, ne mu shambre yonso emu anu bobu ke badimu. Bu bobu kabayi muaba eu, pamuapa kuvua mua kupeta kabuta aka to.”
11. Bu mudi mpungilu wenda usemena pa buipi, mmalu kayi atudi ne bua kudifundila? Bua tshinyi?
11 Mpungilu ya tshidimu etshi idi isemena ne lukasa lua dikema. Bana betu mbadifile bikole ne dîba diabu bua kulongolola programe wa mpungilu eu ne miaba itudi basombe bua kutukolesha. Nanku udifundile tshipatshila tshia kubuela mu mpungilu eu matuku onso asatu, udilongolole bua bidi Yehowa mutulongoluele ku diambuluisha dia bulongolodi buende. Udiakaje bua kukolesha bakuabu ku bukalanga, ku diyikila nabu ne ku ngikadilu yebe milenga. Dîba adi, wewe ne bantu bakuabu nenumvue anu bu muvua muanetu mukuabu mumvue pakafundaye ne: “Tshitu muanji kumvua disanka bu edi to!”
[Lungenyi lunene lua mu dibeji 4]
Anu bu mututu tuenza, mbingu 3 kumpala kua mpungilu wetu kutuadijaye, netuditue mu diabanya mabeji a kubikila nawu bantu
[Lungenyi lunene lua mu dibeji 6]
Mvuadilu wetu ne kudilengeja kuetu kua mubidi muaba wa mpungilu, miaba itudi basombele, ne mu restoran bidi ne bua kuikala bitumbisha Yehowa
[Lungenyi lunene lua mu dibeji 7]
Udiakaje bua kukolesha bakuabu ku bukalanga, ku diyikila nabu ne ku ngikadilu yebe milenga
[Kazubu mu mabeji 4-7]
Malu a kuvuluka bua mpungilu wa distrike wa 2011
▪ Dîba: Programe neatuadije pa dîba dia 8:20 matuku onso asatu. Kadi bua mpungilu yenzeka mu bimenga binene ebi: Brazzaville, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire ne Tshikapa, yoyi neyikale ituadija pa dîba 9:20. Bilondeshile muaba ne muaba, bantu nebabange kubuela muaba wa mpungilu mu 7:00 anyi mu 8:00. Padi mizike ibanga, tuetu bonso tudi ne bua kuikala basombe pa miaba yetu bua mpungilu kutuadijaye bimpe.
▪ Dikuatshila miaba ya kusomba: Anu bantu badi ku nzubu kuenu, banudi benze nabu luendu pamue, anyi baudi ulonga nabu Bible ke baudi mua kukuatshila muaba.—1 Kol. 13:5.
▪ Biakudia bia mu midi: Tudi tunulomba bua kulua ne biakudia bungi bukumbanyine kadi bidi mua kudisha mubidi, bu mudi: mampa, mikata, bimuma (bibote), tumbele, benyi anyi tuto. Bua kuepuka njiwu, panudi nulua ne bintu bu mudi mâyi, kafe anyi tshiayi, nubiele mu bintu bidi kabiyi mua kutayika to. Mbikandikibue bua kulua ne maluvu adi akuatangana mu mpungilu. Tuetu balue ne bietu biakudia anyi bietu bia kunua, katuakukeba bua kubisumba kudi badi babipanyisha muaba wa mpungilu to. Kuepuka basumbishi ba bintu aba ndilongesha dinene, kudi kuleja mutudi ne mankenda. (Numanye ne: Bapanyi ba bintu bia kudia kabena ne bua kubuela nabi muaba udi mpungilu wenzekela to, nansha kakese.—Yone 2:13-17.)
▪ Mapa: Bua kuleja dianyisha dietu bua malu onso adibu balongolole bua mpungilu, tuikalaku tuela makuta mu tushete tua mapa a mudimu wa pa buloba bujima tua ku Nzubu wetu wa Bukalenge anyi tudi muaba udi mpungilu wenzekela. Muntu yeye muele sheke wa makuta bu dipa mu mpungilu, udi ne bua kufundapu Association “Les Témoins de Jéhovah” bu muntu udiye upesha makuta au.
▪ Njiwu ne masama a tshimpitshimpi: Misangu ya bungi, batu babikila bena Tshibambalu tshia diondopangana ku telefone bua tusamasama tua tshianana. Padi bualu bua disama dia tshimpitshimpi bumueneka dîba ditudi mu mpungilu, bikila muanetu wa ku bakididianganyi udi pabuipi nebe bua amanyishe diakamue bena Tshibambalu tshia diondopangana; dîba adi bana betu badi mu tshibambalu atshi badi mua kuteta kumona bukole bua disama ne kukeba tshia kuenza.
▪ Dikuata foto: Paudi ukuata foto dîba ditudi munkatshi mua mpungilu, kutemeshi midilu anyi flashe to. Kubikidi bakuatshi ba foto ba pambelu bua kulua kuyikuata muaba wa mpungilu to. Wewe mumone bena pambelu aba bakeba kukuatangana foto muaba wa mpungilu, kubalombi bua kukukuatabu pebe to.—Yone 2:13-17.
▪ Telefone ya ku bianza: Wenze muebe muonso bua kamu kebe kakapangishi bakuabu bua kuteleja to.
▪ Mankenda: Bitu bimueneka ne: bana betu batu baya kusumbila biakudia muaba wa mpungilu ke batu bimansha panshi bintu bu mudi: mabeji, tubudimbu, tutotola ne bintu bikuabu. Muntu yeye musumbe biakudia kudi basumbishi ba bintu (bu mudi mbombo, bisukuita, tuto, makopo a misanyi anyi bintu bikuabu), udi ne bua kuya kuela tubudimbu ne mabeji anyi bizubu bia bintu ebi muaba udibu babilongoluele bua kubiela pamutu pa kubimansha anu panshi. Kadi tuetu bamone muntu muele bintu bu mudi tubudimbu anyi mabeji panshi, tubiangule, tubiele mu tshintu tshia kuela bintu bia butshiafu. Bana betu, bu nuenu mua kusua, tuenzayi muetu muonso bua kulamaku muaba utudi tuenzela mpungilu ne kumpenga kuawu kuonso ne mankenda. Mankenda ntshilumbu tshia muntu yonso udi ubuela mu mpungilu. Muntu yonso yeye muikale uditatshisha bua mankenda nunku, dituku dionso ku ndekelu kua mpungilu muaba utudi tumuenzela newikale ushala amu ne mankenda. Tudi basue kuleja ne: tudi ne ngikadilu ya buena ya Nzambi wa tshijila utudi tutendelela.—1 Pet. 1:15, 16; Ekes. 19:10; Dut. 23:14.
▪ Miaba itudi batudile: (1) Kanusombi anyi kulala mu nzubu bantu bungi bupite budi muntu udi munuakidile munuanyishile to. (2) Wewe mumone ne: kuakuya muaba uuvua mulombe bua kutudila, manyisha kumpala kua dîba. (3) Kumpala kua wewe kulamba, lomba dianyisha kudi muena nzubu anyi kudi bana betu badi batangila malu a miaba ya kulala ku Nzubu wa Bukalenge bua bakuleje tshia kuenza. (4) Bobu batuanyishile bua kuenza tshintu, katunekeshi to. Enza malu ne nkatshinkatshi. (5) Batendeledi ba Nzambi bonso badi ne bua kuikala ne mankenda. Dituku dionso, ikala ushiya muaba uuvua mulale ne mankenda, mulongolola kabidi bimpe. Bikalabu balongolole bua bana betu badi bafuma kule kutudilabu ku Nzubu wa Bukalenge, badi ne bua kumulama ne mankenda. (6) Uleje muanetu udi munuakidile anyi bana betu bakuabu banudi nabu muaba umue ngikadilu ya dimuma dia nyuma wa Nzambi.—Gal. 5:22, 23.
▪ Mudimu wa badisuile: Neupete kabidi disanka dia bungi wewe mudifile bua kuenza imue midimu mu mpungilu. (Bien. 20:35) Muntu yonso udi musue kuenza midimu eyi, udi mua kuya ku Tshibambalu tshia badisuile. Bana badi ne bidimu muinshi mua 16 badi pabu mua kuenza mudimu eu ne diambuluisha dia baledi babu anyi muntu mukole udi baledi babu banyishe.
[Kazubu mu dibeji 5]
Mushindu utuabanya mabeji a kubikila nawu bantu
Bua kumona mua kuyisha mu teritware yonso mujima, tudi ne bua kuakula mêyi makese. Tudi mua kuamba ne: “Muoyo webe au! Tudi tuenda tuabanya mabeji aa pa buloba bujima bua kubikila bantu. Diebe dibeji ndiodi edi. Pawabala, neupete malu makuabu a bungi.” Pa mutu pa dibeji dia dibikila edi padi pimpe be! Nanku dipesha muntu mu mushindu wa ne: amone pamutu apu bimpe. Ikala ne disanka. Panudi nuabanya mabeji aa mu Disambombo anyi mu Dia lumingu, nudi mua kupesha kabidi bantu bibejibeji pikalaku mushindu.