Uyishe ne kakanda ka “Longa malu adi mu Dîyi dia Nzambi” bua kutuadija kuyukila ne bantu
1. Ntshintu kayi tshipiatshipia tshitudi bapete tshia kuyisha natshi?
1 Kakanda ka “Longa malu adi mu Dîyi dia Nzambi” ntshitupa tshidi ku ntuadijilu kua Bible muakajilula wa Nkudimuinu wa bulongolodi bupiabupia wa mu Anglais. Mmunyi muudi mua kuenza mudimu ne kakanda kapiakapia aka paudi ulongolola mishindu ya kuyukila ne bantu mu buambi? Bu mudibu balonge mvese mu kakanda aka bilondeshile biena-bualu bishilashilangane bia mu Bible anu mudibu benze mu mukanda wa Comment raisonner, kakanda aka kadi mua kutuambuluisha bikole bua kutuadija miyuki ne bantu.
2. Mmunyi mutudi mua kuyisha ne kakanda ka “Longa malu adi mu Dîyi dia Nzambi”?
2 Udi mua kuangata lukonko lua 8, ne kuamba ne: “Tudi tukumbula bantu bua minite mikese mu kartié ketu emu bualu ba bungi badi badiebeja ne: ‘Nzambi ke udi ukebesha ntatu idi nayi bantu anyi?’ [Mu imue miaba, bidi mua kuikala bitambe buimpe bua kuleja muntu lukonko.] Kadi wewe, udi wela meji kayi? [Lekela muntu andamune.] Bible udi ufila diandamuna dimpe dia lukonko elu.” Ubadile mu Bible mvese umue anyi ya bungi idibu bafile ne nuyukidilanganapu. Muntu yeye muleje dijinga dia kumanya malu makuabu, udi mua kumuleja nkonko 20 idi ku ntuadijilu kua kakanda aka ne kumulomba bua asungule lukonko lua nuenu kulua kuandamuna musangu walonda. Anyi udi mua kumupesha umue wa ku mikanda yetu ya kulonga nayi Bible udi umvuija malu a bungi pa tshiena-bualu tshiudi mukonkonone nende.
3. Mmunyi mutudi mua kuyisha ne kakanda aka bua kutuadija muyuki mu teritware mudi bantu badi kabayi bena Kristo?
3 Lukonko 4 ne lua 13 too ne lua 17 idi mua kuambuluisha nangananga paudi uyisha mu teritware mudi bantu kabayi bena Kristo. Tshilejilu, udi mua kuenza mudimu ne malu adi mu lukonko lua 17, ne kuamba ne: “Tudi tuenda tutangila bantu bua minite mikese bua kuambuluisha bena mu mêku. Udiku witaba ne: lelu eu mêku adi ne ntatu ya bungi anyi? [Lekela muntu andamune.] Bena dibaka ba bungi mbamone mudi mêyi a meji aa ambuluisha: ‘Mukaji udi ne bua kuikala ne kanemu kakole kudi bayende.’ [Kuambidi muntu ne mêyi aa nga mu Efeso 5:33. Wewe uyikila ne muntu mukaji, udi mua kumutelela mêyi adi mu Efeso 5:28.] Udiku wela meji ne: kutumikila mubelu eu kudi mua kuambuluisha bena dibaka anyi?”
4. Ntshinyi tshiudi mua kuenza ku ndekelu kua muyuki ne muntu udi kayi muena Kristo?
4 Panudi nujikija muyuki, numvuangane bua kulua kutungunuka musangu mukuabu. Pamuapa udi mua kulongolola bua kuakula bua mvese mukuabu wa mu lukonko lunuvua bakonkonone. Paudi umona ne: tshikondo ntshikumbane, wambile muntu ne: mêyi a meji anuvua nuyukila nende au nga mu Bible. Bilondeshile malu anukadi bayikile ne mudi muntu wangata Bible, umupeshe mukanda uudi wela meji ne: udi mua kumusankisha.—Bala tshisakidila tshidi mu Mudimu wetu wa Bukalenge wa 12/2013.