Katuena nkayetu nansha

1-2. a) Bua tshinyi tudi tuamba ne: katuena nkayetu padi ntatu itukuata? b) Ntshinyi tshituakuila mu tshiena-bualu etshi?

PATUDI ne ntatu mikole, tudi mua kumona anu bu ne: tudi nkayetu mu kabuatu kakese pa mâyi padi tshipepele tshikole tshituta. Kadi katuena nkayetu to. Tatu wetu wa mu diulu mmumone mutudi tutata amu, ne mmulaye bua kutuambuluisha. Udi mene utujadikila ne: ‘Neatuambuluishe.’​—Yesh. 41:10.

² Mu tshiena-bualu etshi, netumone mudi Yehowa, 1) utulombola, 2) utupetesha bitudi nabi dijinga, 3) utukuba ne 4) utusamba; udi wenza bionso abi bua kutuambuluisha. Yehowa udi utujadikila ne: nansha tuetu mua kutuilangana ne ntatu kayi, kakutupua muoyo to. Kakutulekela nansha. Nanku katuena nkayetu to.

YEHOWA UDI UTULOMBOLA

3-4. Mmunyi mudi Yehowa utulombola lelu? (Misambu 48:14)

³ Bala Misambu 48:14. Yehowa mmumanye ne: katuena mua kudilombola nkayetu to. Mmunyi mudiye ulombola batendeledi bende ba lulamatu lelu? Umue mushindu udiye ubalombola nku diambuluisha dia Bible. (Mis. 119:105) Udi utuambuluisha ne Dîyi diende difundisha ku bukole bua nyuma bua kuangata mapangadika ne kuikala ne ngikadilu idi itupetesha disanka dia bungi lelu ne muoyo wa tshiendelele kumpala eku.a Tshilejilu, udi utubela bua katuikadi tulaminangana munda to, kadi tuikale ne bululame mu malu onso atudi tuenza ne tunange bakuabu ne muoyo mujima. (Mis. 37:8; Eb. 13:18; 1 Pet. 1:22) Tuetu ne ngikadilu eyi, tudi tulua baledi bimpe, bena dibaka bimpe ne balunda bimpe.

⁴ Mu Bible mudi kabidi malu avua Yehowa mufundishe adi atangila bantu bavua ne ntatu, bavua bumvua mututu petu tumvua patudi ne ntatu. (1 Kol. 10:13; Yak. 5:17) Patudi tubala malu au ne tutumikila malongesha atudi tupeta, bidi bituambuluisha mu mishindu ya bungi. Ibidi ya kudiyi nyoyi eyi: wa kumpala, tudi tufika kudimona ne: katuena nkayetu to, bualu kuvua bantu bakuabu bavua pabu ne ntatu ya buena itudi nayi kadi bayitantamene. (1 Pet. 5:9) Muibidi, tudi tumanya mua kutantamena ntatu itudi nayi.​—Lomo 15:4.

5. Mbanganyi badi Yehowa wenza nabu mudimu bua kutulombola mu njila udi ufikisha ku muoyo?

⁵ Yehowa mmulongolole kabidi bua bena Kristo netu batulombole.b Tshilejilu, batangidi ba bijengu batu balua kutukumbula bua kutukankamija. Miyuki itubu benza itu ikolesha ditabuja dietu ne ituambuluisha bua tuikala anu mu buobumue. (Bien. 15:40–16:5) Bakulu batu pabu badifila ne muoyo mujima bua kuambuluisha yonso wa kutudi bua ashale mu malanda makole ne Yehowa. (1 Pet. 5:2, 3) Baledi pabu batu balongesha bana babu bua kunanga Yehowa, kuangata mapangadika mimpe ne bua kuikala ne bikadilu bimpe. (Nsu. 22:6) Bana betu ba bakaji bakulumpe bakadi bashindame mu nyuma batu benza malu mimpe adi bana betu ba bakaji batshidi bansonga mua kuidikija. Batu babapesha mibelu mimpe ne batu babakankamija.​—Tito 2:3-5.

6. Ntshinyi tshitudi ne bua kuenza bua mushindu udi Yehowa utulombola utuambuluishe?

⁶ Yehowa mmutupeshe bionso bitudi nabi dijinga bua kuangata mapangadika mimpe ne kuikala ne disanka. Ntshinyi tshitudi ne bua kuenza bua kuleja ne: tudi ne dianyisha bua malu adi Yehowa mutuenzele? Nsumuinu 3:5, 6 udi wamba ne: “Eyemena Yehowa ne muoyo webe wonso, kueyemenyi dijingulula diebe dia malu.” Tuetu benze nanku, “yeye nealulamije njila [yetu].” Bidi biumvuija ne: neatuambuluishe bua kuepuka ntatu ya bungi ne netuikale kabidi ne disanka dia bungi. Tudi ne dianyisha dia bungi kudi Yehowa bua mudiye mutumanye bimpe ne mutunange bikole, bimufikisha kudipesha yonso wa kutudi mibelu idiye ukengela.​—Mis. 32:8.

YEHOWA UTU UTUPETESHA BITUDI NABI DIJINGA

7. Tela imue mishindu itu Yehowa utupetesha bitudi nabi dijinga. (Filipoyi 4:19)

⁷ Bala Filipoyi 4:19. Pakumbusha malu adi Yehowa utuenzela bua tuikale bashindame mu nyuma, Yehowa utu ubenesha bionso bitudi tuenza bua kupeta tshiakudia, bilamba ne muaba wa kuteka mutu. (Mat. 6:33; 2 Tes. 3:12) Bu mutudi bantu, bidi anu mua kutufikila bua kusamisha mutu bua kupeta bintu bitudi katuyi nabi, kadi Yehowa udi utukankamija bua katutambi kusamisha mutu to. (Mat. 6:25) Bua tshinyi? Bualu Tatu wetu kakulekela batendeledi bende ba lulamatu padibu mu dikenga nansha kakese. (Mat. 6:8; Eb. 13:5) Tudi batuishibue ne: neatupeteshe bitudi nabi dijinga anu mudiye mutulaye amu.

8. Ntshinyi tshivua Yehowa muenzele Davidi?

⁸ Tuakule bua mushindu uvua Yehowa muambuluishe Davidi. Mu bidimu bionso bivua Davidi wenda unyema Shaula, Yehowa wakamupesha yeye ne bavuaye nabu bintu bivuabu nabi dijinga. Pavua Davidi muvuluke muvua Yehowa mumuambuluishe bidimu bionso abi, wakafunda ne: “Mvua nsonga, mpindieu nkadi mukulakaje, kadi tshiena muanji kumona muntu muakane mulekelela, peshi bana bende benda bakeba tshiakudia to.” (Mis. 37:25) Pamuapa wewe pebe ukadi mudimuenene muvua Yehowa mukuambuluishe anyi muambuluishe batendeledi bakuabu ba lulamatu mu bikondo bikole.

9. Mmunyi mutu Yehowa wambuluisha batendeledi bende lelu eu mu bikondo bitu bipupu bienzeka? (Tangila kabidi bimfuanyi.)

⁹ Yehowa utu kabidi wambuluisha batendeledi bende patu bipupu bienzeka. Tshilejilu, pavua tshiyole tshia nzala tshibuele mu bantu mu bidimu lukama bia kumpala, bena Kristo ba miaba mishilashilangane bakatumina bena Kristo nabu bavua tshiyole atshi tshikuate bintu bivuabu nabi dijinga. (Bien. 11:27-30; Lomo 15:25, 26) Ke tshitu bantu ba Nzambi benza kabidi lelu. Padi tshipupu tshienzeka, Yehowa utu usaka bantu bende bua kupetesha bena Kristo nabu bintu bidibu nabi dijinga bu mudi biakudia, mâyi, bilamba ne manga a kunua. Batu batuma bana betu batu bibaka nzubu yetu bua kulongoluela bena Kristo nabu abu nzubu yabu ne nzubu ya Bukalenge idi minyanguke. Bikondo bia nunku, nzubu ya bamue bana betu itu yupuka yonso pamuapa bafuisha ne balela babu. Nunku batendeledi ba Yehowa batu baya ne lukusa luonso bua kubakankamija ne mêyi a mu Bible.c

10-11. Bualu bua Borys budi bukulongesha tshinyi?

¹⁰ Yehowa utu upetesha too ne bantu badi kabayi bamutendelela bintu bidibu nabi dijinga. Tuetu petu tutu tukeba mpunga ya kuenzela bantu badi kabayi batendelela Yehowa malu mimpe. (Gal. 6:10) Kuenza nanku kutu imue misangu kubasaka bua bitabe bua kulonga malu ende. Tuangate tshilejilu tshia Borys, mulombodi wa tshilongelu kampanda tshia mu Ukraine. Nansha mudiye kayi Ntemu wa Yehowa, uvua anu wenzela Bantemu bavua balonga mu tshilongelu tshiende malu mimpe; kavua wakula bibi bua malongesha abu to. Pakajingaye kunyema muaba uvuaye musombele bua muvua mvita yenzekelapu, bana betu bakamuambuluisha bua kunyemena muaba mukuabu. Panyima pa matuku, wakabuela mu tshivulukilu tshia lufu lua Kristo. Wakavuluka malu mimpe avua Bantemu bamuenzele, wamba ne: “Bantemu bakantabalela bikole. Ndi mbela tuasakidila wa bungi.”

¹¹ Bua kuleja mutudi tuidikija Tatu wetu wa mu diulu muena luse, mbimpe tuambuluishe bantu badi mu dikenga nansha buobu bitabuja malongesha etu anyi kabayi baitabuja. (Luka 6:31, 36) Tudi batekemene ne: bionso bitudi tuenza bua kuambuluisha bantu nebibasake bua kulua bayidi ba Kristo. (1 Pet. 2:12) Nansha buobu kabayi balue bayidi ba Kristo, netuikale ne disanka dia bungi bua mutudi tubambuluisha.​—Bien. 20:35.

YEHOWA UTU UTUKUBA

12. Mmushindu kayi udi Yehowa mulaye bua kukuba batendeledi bende mu tshibungi? (Misambu 91:1, 2, 14)

¹² Bala Misambu 91:1, 2, 14. Lelu Yehowa mmulaye bua kukuba batendeledi bende ku tshintu tshionso tshidi mua kunyanga malanda abu nende. Kakulekela Satana unyanga ntendelelu mulelela nansha. (Yone 17:15) Tudi bashindike ne: patuadija “dikenga dinene,” Yehowa neakumbaje mulayi wende wa kukuba bantu bende mu nyuma ne ku mubidi.​—Buak. 7:9, 14.

13. Mmushindu kayi udi Yehowa ukuba muntu yonso pa nkayende?

¹³ Mmushindu kayi udi Yehowa ukuba muntu yonso pa nkayende? Yehowa mmutupeshe Bible bua tufike ku ditapulula tshidi tshimpe ne tshidi tshibi. (Eb. 5:14) Patudi tutumikila mêyi manene adi mu Dîyi dia Nzambi, tudi tukuba bulunda buetu nende ne bidi bituambuluisha bua kuangata mapangadika mimpe; dîba adi netuikale ne disanka ne makanda a mubidi mimpe. (Mis. 91:4) Yehowa udi utukuba kabidi ku diambuluisha dia tshisumbu tshia bena Kristo. (Yesh. 32:1, 2) Bana betu ba mu tshisumbu mbanange Yehowa ne batu bamutumikila. Patudi tubuela nabu mu bisangilu, tuyisha nabu ne patudi tusomba nabu mêba makuabu a tshianana, bidi bitukankamija ne bituambuluisha bua kubenga kuenza malu mabi.​—Nsu. 13:20.

14. a) Bua tshinyi Nzambi katu utukuba ku ntatu yonso? b) Misambu 9:10 udi utujadikila tshinyi? (Tangila kabidi dimanyisha dia kuinshi kua dibeji.)

¹⁴ Kale kuvua misangu ivua Yehowa ukuba batendeledi bende ku malu avua mua kubakebela njiwu anyi avua mua kubakebela lufu. Kadi kavua wenza nanku misangu yonso to. Imue misangu “malu adi kaayi matekemena” atu atufikila tuetu bonso. (Muam. 9:11) Bualu bukuabu, Yehowa uvua ulekela bakengesha batendeledi bende anyi mene babashipa bua kuleja muvua Satana muena dishima. (Yobo 2:4-6; Mat. 23:34) Ke mudibi kabidi lelu. Nansha mudi Yehowa kayi mua kujikija ntatu yetu yonso, tudi batuishibue ne: kakulekela bantu badiye munange nansha kakese.d​—Mis. 9:10.

YEHOWA UTU UTUSAMBA

15. Mmushindu kayi utudi tupeta busambi ku diambuluisha dia disambila, dia Dîyi dia Nzambi ne dia bena Kristo netu? (2 Kolinto 1:3, 4)

¹⁵ Bala 2 Kolinto 1:3, 4. Kudi misangu itutu tupeta tunyinganyinga, tumvua malu atutonda anyi bikale ne lutatu kampanda. Pamuapa patudi tuakula apa udi mua kuikala ne lutatu ludi lukufikisha ku dimona ne: udi nkayebe. Kudiku muntu udi mumanye muudi umvua amu anyi? Yehowa mmumanye. Utu uditeka pa muaba wetu ne “utusamba mu mateta etu onso.” Mushindu kayi? Patudi tusambila, tumunzuluila muoyo wetu, udi utupesha ‘ditalala diende didi dipite dijingulula dionso dia malu.’ (Filip. 4:6, 7) Tudi kabidi tupeta busambi patudi tubala mêyi ende adi mu Bible. Udi utuambilamu mudiye mutunange bikole, utulongesha mua kulua bena meji ne utupesha ditekemena. Bisangilu bietu bidi kabidi bitukolesha bualu tudi tulongamu malu a mu Bible adi atukankamija ne tudi tupetamu bena Kristo netu badi batunange.

16. Bualu bua Nathan ne Priscilla budi bukulongesha tshinyi?

¹⁶ Bualu bua Nathan ne Priscilla badi basombele mu Etats-unis, budi buleja mudi Yehowa utusamba ne utukankamija ku diambuluisha dia Dîyi diende. Kukadi bidimu ndambu bivuabu bapangadije bua kuya muaba uvuabu dijinga ne bamanyishi ba bungi. Nathan udi wamba ne: “Tuvua batuishibue ne: Yehowa uvua ne bua kubenesha bionso bituvua ne bua kuenza.” Kadi buobu bamane kufika muaba au bakasama, kupetabu ne lutatu lua makuta. Ndekelu wa bionso bakapingana kuabu. Nansha nanku batshivua anu ne lutatu lua makuta. Nathan udi wamba ne: “Mvua ndiebeja bua tshinyi Yehowa kavua mutubeneshe mutuvua bele meji. Ngakatuadija mene kudiebeja ni mvua muenze bualu kampanda bubi.” Kadi panyima pa matuku, Nathan ne Priscilla bakalua kumona ne: Nzambi kavua mubalekele mu tshikondo tshia dikenga atshi to. Nathan udi wamba ne: “Tshikondo atshi Bible uvua mulue mulunda wetu wa meji, uvua utukankamija ne utuludika. Bu mutuvua bimanyine pa mushindu uvua Yehowa utuambuluisha bua kunanukila mu ntatu ayi, biakatujadikila ne: neatungunuke ne kutuambuluisha.”

17. Mmushindu kayi uvua muanetu Helga mupete busambi? (Tangila kabidi tshimfuanyi.)

¹⁷ Bena Kristo netu badi mua kutusamba pabu. Mushindu kayi? Tuangate tshilejilu tshia Helga, uvua musombele mu Hongrie. Uvua mutuilangane ne ntatu mishilashilangane mukantshi mua bidimu bia bungi ne uvua udiumvua mushikile, udimona kayi ne mushinga. Kadi udi uvuluka muvua Yehowa mumusambe ku diambuluisha dia tshisumbu tshia bena Kristo. Mmufunde, wamba ne: “Pavua Yehowa umona muvua mudimu wanyi wa bianza, mushindu umvua ntabalela muananyi mulela umue uvua usama, ne muvua ntatu mikuabu imvua nayi bintshiokesha bikole mu lungenyi, uvua anu ungambuluisha. Mu bidimu bionso 30 bishale ebi, kakuena dituku nansha dimue dipite kayi munsambe anu muvuaye mulaye to. Pa tshibidilu, utu unkolesha ku diambuluisha dia mêyi mimpe a bana betu. Bana betu bavua bamfundila mesaje, bamfundila mikanda anyi bangela kalumbandi mu tshikondo tshimvua nabi dijinga menemene.”

18. Mmunyi mutudi mua kusamba bakuabu?

¹⁸ Tudi ne diakalenga dia kusamba bakuabu anu bu Nzambi wetu. Mmushindu kayi utudi mua kubasamba? Mbimpe tuikale tubateleja ne lutulu, tubambila mêyi adi abakolesha ne tubambuluisha mu mishindu mimpe. (Nsu. 3:27) Tudienzeje bua kusamba bantu bonso badi mu dikenga nansha aba badi kabayi benzela Nzambi mudimu. Padi bakuetu ne kanyinganyinga, basama, bikale ne malu abatonda, mbimpe tuye kubakumbula, tubateleje, ne tubabadile mêyi a mu Bible bua kubakankamija. Tuetu tuidikija Yehowa, “Nzambi wa busambi buonso,” tudi tuambuluisha bena Kristo netu bua kutantamena ntatu idibu nayi, tuambuluisha kabidi bantu badi kabayi benzela Nzambi mudimu bua balonge malu ende.​—Mat. 5:16.

YEHOWA UTU UTUAMBULUISHA MISANGU YONSO

19. Yehowa utu utuenzela tshinyi? Mmunyi mutudi mua kumuidikija?

¹⁹ Yehowa utu utabalela bikole bantu bonso badi bamunange. Patu ntatu itukuata, katu utulekela to. Yehowa utu utabalela batendeledi bende ba lulamatu anu mutu tatu udi ne dinanga utabalela muanende. Utu utulombola, utupetesha bitudi nabi dijinga, utukuba ne utusamba. Tudi tuidikija Tatu wetu wa mu diulu patudi tuambuluisha bakuabu ne tubakankamija padibu mu ntatu. Nansha mutudi mua kutuilangana ne ntatu mikole, tuikale batuishibue ne: Yehowa neatuambuluishe. Tuambe eku tuele eku, si mmutulaye, wamba ne: “Kutshinyi to, bualu ndi nebe.” (Yesh. 41:10) Ntshinyi tshidi Yehowa utujadikila? Mêyi aa adi atushindikila ne: katuena nkayetu nansha.