Kuitabuja Mukalenge Yezu nkukumbane bua kupeta lupandu anyi?

Diandamuna dia mu Bible

Bena Kristo batu bitaba ne: Yezu wakafua bua mpekatu ya bantu. (1 Petelo 3:18) Kadi ki nganu kuitaba Yezu bu musungidi wetu kudi mua kutupetesha lupandu to. Bualu nansha bademon mbamanye pabu Yezu bu ‘Muana wa Nzambi,’ kadi nebabutudibue, kabakupeta lupandu to.​—Luka 4:41; Yuda 6.

• Ntshinyi tshindi ne bua kuenza bua kupandishibua?

• Netuambe tshinyi bua ‘disambila dia muenji wa mpekatu’?

• ‘Disambila dia muenji wa mpekatu’ ndifume kuepi?

Ntshinyi tshindi ne bua kuenza bua kupandishibua?

• Mbimpe witabe ne: Yezu wakafila muoyo wende bua mpekatu yetu. (Bienzedi 16:30, 31; 1 Yone 2:2) Bidi bitulomba bua kuitaba ne: Yezu uvua muntu wetu wa mashi ne mâyi ne malu onso adi Bible wamba bua bualu buende mmalelela.

• Manya tshidi Bible ulongesha menemene. (2 Timote 3:15) Bible udi wamba ne: mupostolo Paulo ne Sila bakambila mulami wa buloko ne: “Itabuja Mukalenge Yezu, nunku neupandishibue.” Pashishe bakatuadija kulongesha mulami wa buloko au “dîyi dia Yehowa.”a (Bienzedi 16:31, 32) Bualu ebu budi buleja ne: bua mulami wa buloko au kuitabujaye Yezu bivua bikengela apete dimanya dia nshindamenu dia Dîyi dia Nzambi. Bivua bimulomba bua apete dimanya dijalame dia bulelela didi difumina mu Mifundu.​—1 Timote 2:3, 4.

• Nyingalala. (Bienzedi 3:19) Udi kabidi ne bua kunyingalala, anyi kumvua bibi menemene bua malu mabi auvua muenze ne meji mabi auvua wela. Dinyingalala diebe nedimueneke kudi bakuabu paudi ulekela kuenza malu mabi onso adi kaayi asankisha Nzambi ne ‘wenza malu adi aleja muudi munyingalale bua mpekatu yebe.’​—Bienzedi 26:20.

• Batijibua. (Matayi 28:19) Yezu wakamba ne: mbimpe bantu badi balua bayidi bende babatijibue. Mulami wa buloko utukadi batele au uvua mubatijibue. (Bienzedi 16:33) Bia muomumue, pavua mupostolo Petelo mulongeshe musumba munene wa bantu bulelela bua Yezu, “bantu bakitabuja dîyi diende ne disanka bakabatijibua.”​—Bienzedi 2:40, 41.

• Tumikila malu adi Yezu wamba. (Ebelu 5:9) Bantu badi ‘batumikila malu onso’ avua Yezu muambe badi baleja mu nsombelu wabu mudibu bayidi bende. (Matayi 28:20) Badi balua ‘benji ba dîyi, kabayi anu bateleji patupu’ to.​—Yakobo 1:22.

• Nanukila too ne ku nshikidilu. (Mâko 13:13) Bayidi ba Yezu ‘badi dijinga ne dinanukila’ bua kupandishibua. (Ebelu 10:36) Tshilejilu, mupostolo Paulo wakatumikila malu onso avua Yezu mulongeshe ne muoyo mujima kushalaye ne lulamatu kudi Nzambi. Kutuadijila ku dituku divuaye mulue muena Kristo too pakafuaye wakatungunuka anu ne kuendela mu njila eu.

Netuambe tshinyi bua ‘disambila dia muenji wa mpekatu’?

Mu bimue bitendelelu bantu batu benza masambila kampanda bu mudi ‘disambila dia muenji wa mpekatu’ ne ‘disambila dia lupandu.’ Mu kuamba kuimpe, bantu badi benza masambila aa mbamanye ne: mbena mapanga, ne badi baleja patoke ne: Yezu wakafua bua mpekatu yabu. Badi kabidi balomba Yezu bua abuele mu mioyo yabu anyi abambuluishe mu nsombelu wabu. Kadi mu Bible kamuena masambila a nunku to, ne Bible muine katu ulomba bantu bua kuenza ‘disambila dia muenji wa mpekatu’ to.

Bamue batu bela meji ne: muntu yeye mumane kuambulula mêyi adi mu ‘disambila dia muenji wa mpekatu,’ mbimpe ikale mutuishibue ne: neapete lupandu lua tshiendelele. Kadi muntu kena mua kusungidibua anu bualu udi usambila to. Bu mutudi bena mapanga tudi tutungunuka ne kuenza bilema. (1 Yone 1:8) Ke bualu kayi Yezu wakalongesha bayidi bende bua kusambila Nzambi misangu yonso bua ababuikidile mpekatu yabu. (Luka 11:2, 4) Bualu bukuabu, bamue bena Kristo bavua ne mushindu wa kupeta muoyo wa tshiendelele bakajimija ditekemena adi bualu bakalekela kuenzela Nzambi mudimu.​—Ebelu 6:4-6; 2 Petelo 2:20, 21.

‘Disambila dia muenji wa mpekatu’ ndifume kuepi?

Bamanyi ba malu a kale kabena bapetangana bua tshikondo tshivua ‘disambila dia muenji wa mpekatu’ dituadije to. Bamue ba kudibu badi bamba ne: tshilele atshi tshiakatuadija kumueneka tshikondo tshivua bena mishionyi baditapulule ne katolike. Bakuabu badi bamba ne: bantu bakatuadija kuenza disambila dia muenji wa mpekatu edi mu bidimu bia 1700 ne bia 1800, pavua bitendelelu bipiabipia bituadije. Nansha biobi nanku anyi kabiyi nanku, tshilele etshi tshidi tshibengangana ne malongesha a mu Bible, ne Bible muine kena utshitaba to.