Tshidimu tshibidi tshia mvita ya mu Ukraine​—Nditekemena kayi didi Bible ufila?

Mu Ditanu dia 24/2/2023, nedikale dituku dia mufikilu mubi menemene wa tshidimu tshijima katshia mvita ya mu Ukraine yatuadija. Bilondeshile imue luapolo, basalayi ba mu Ukraine ne ba mu Russie batue ku 300 000 mbafue anyi mbatapike mputa ya milengu; badi bela meji ne: bantu batue ku 30 000 mbafue pabu mu mvita ayi. Kadi bungi buonso busanga budi mua kuikala bupite apu.

Bia dibungama, bidi bimueneka bu ne: mvita ayi kayakujika mu matuku makese emu to.

• “Tshidimu tshijima tshikadi pa kukumbana katshia biluilu bia Russie biabuela mu Ukraine, kadi kakuena tshidi tshileja ne: mvita ayi neyijike mpindieu to. Bidi bimueneka bu ne: ku biluilu bionso bibidi abi, kakuena tshiatshimuna mvita ayi bipepele to; kabidi ne: mbifuane kubikolela nansha bua kusomba bua kumvuangana.”​—NPR (National Public Radio), 19/2/2023.

Bantu ba bungi badi basamisha mutu bikole bua mudi mvita eyi ne mikuabu ikebela bantu badi kabayi ne bualu pa buloba bujima tunyinganyinga ne ibakengeshisha. Nditekemena kayi didi Bible ufila? Mvita neyijikaku dimue dituku anyi?

Mvita yajikija mvita yonso

Bible udi wakula bua mvita yapandisha bantu, kadi ki nya kubabutula to. Badi babikila mvita ayi ne: mvita ya Armagedone, ne badi bayumvuija bu “mvita ya dituku dinene dia Nzambi Wa Bukole Buonso.” (Buakabuluibua 16:14, 16) Ku diambuluisha dia mvita ayi, Nzambi neabutule mbulamatadi ya bana ba bantu idi mikebeshe mvita idi mitambe kushipa bantu. Bua kumanya muikala mvita ya Armagedone mua kutuadila bantu ditalala dia kashidi, bala biena-bualu bidi bilonda ebi:

• “Mvita ya Armagedone ntshinyi?”

• “Armagedone ndumu luimpe!”