Mvita ya mu matunga a mu Moyen-Orient​—Ntshinyi tshidi Bible wamba?

Bantu ba buloba bujima badi ne buôwa bua mvita idi yenzeka pankatshi pa ditunga dia États-Unis, dia Israël, ne dia Iran. Nsombelu neabipe bikole anyi? Mvita ayi neyenzeke mu matunga makuabu a bungi anyi? Mbulamatadi idi mua kupangisha mvita ne kufila ditalala dia kashidi anyi?

Bantu badi bamanye bimpe mêyi a buprofete a mu Bible mbafuane kudiebeja bikala mvita ya mu matunga a mu Moyen-Orient mua kuikala ntuadijilu wa mvita ya Armagedone idibu bamanyishe mu mukanda wa Buakabuluibua.

Ntshinyi tshidi Bible wamba?

Mbulamatadi neyijikije mvita ya mu matunga a mu Moyen-Orient anyi?

Bible udi wamba ne: “Kueyemenyi bakokeshi anyi muana wa muntu udi kayi mua kufila lupandu.”​—Misambu 146:3.

Katuena bamanye bikala mbulamatadi mua kukokesha bua kufila nansha ndambu wa ditalala mu matunga a mu Muoyen-Orient. Kadi Bible udi uleja patoke ne: bamfumu ba tshididi, mbulamatadi ya bana ba bantu, anyi tshisumbu tshia bantu kabena mua kujikija mvita ne kufila ditalala dia kashidi to. Anu Nzambi ke udi mukumbane bua kujikija “mvita pa buloba buonso bujima.”​—Misambu 46:9.

• Bua kumanya malu makuabu, bala Tshibumba tshia Nsentedi tshidi ne tshiena-bualu tshia ne: “Mvita neyijike​—Mushindu kayi?”

Mvita ya mu matunga a mu Moyen-Orient idi ikumbaja mêyi a buprofete anyi?

Bible udi wamba ne: “Nenumvue bakula bua mvita ne ngumu ya mvita. . . . Tshisamba netshiluishe tshisamba tshikuabu, bukalenge nebuluishe bukalenge bukuabu.”​—Matayi 24:6, 7.

Mvita idi yenzeka lelu mu matunga a mu Moyen-Orient ntshijadiki tshikuabu tshidi tshileja ne: tudi ku “nshikidilu wa ndongoluelu wa malu eu,” udi Bible pende ubikila ne: “matuku a ku nshikidilu.” (Matayi 24:3; 2 Timote 3:1) Mvita itudi tumona lelu idi ileja ne: mu matuku makese emu, Nzambi neajikije mvita ne ntatu mikuabu idi ikengesha bantu.

• Bua kumanya malu makuabu, bala tshiena-bualu tshia “Tshimanyinu tshia ‘matuku a ku nshikidilu’ anyi ‘bikondo bia ku nshikidilu’ ntshinyi?”

Mvita ya Armagedone neyituadijile mu matunga a mu Moyen-Orient anyi?

Bible udi wamba ne: “Akabasangisha pamue muaba udibu babikila mu tshiena Ebelu ne: Armagedone.”​—Buakabuluibua 16:16.

Mvita ya Armagedone ki mmvita idi yenzeka pankatshi pa mbulamatadi ya bantu idi mituadije mu matunga a mu Moyen-Orient to. Mvita ya Armagedone mmvita ya buloba bujima yenzeka pankatshi pa Nzambi ne mbulamatadi yonso ya bantu.

• Bua kumanya malu makuabu, bala tshiena-bualu tshia “Mvita ya Armagedone ntshinyi?”

Ntshinyi tshidi mua kutukija mioyo yetu mu bikondo bia tunyinganyinga ebi?

Bible udi wamba ne: “Kanusamishi mutu bua tshintu nansha tshimue, kadi mu malu onso, ku diambuluisha dia disambila ne disengelela pamue ne disakidila, numanyishe Nzambi milombu yenu.”​—Filipoyi 4:6.

Yehowaa Nzambi mmusue tumulombe mu disambila. Bualu Nzambi udi ututabalela, yeye neateleje masambila etu ne neatuambuluishe bua kutua tunyinganyinga tshiadi. (1 Petelo 5:7) Umue mushindu udiye wenza nanku mpadiye utumvuija bua tshinyi kudi mvita ne muajikayi ne tshienzaye bua kujikija makenga ne ntatu bitudi nabi.​—Buakabuluibua 21:3, 4.

• Bua kumanya malu makuabu a mudi Nzambi utuambuluisha, bala tshiena-bualu tshia “Bible udi mua kumpetesha busambi anyi?”