Kuikala muena Kristo kudi kumvuija tshinyi?​—Ntshinyi tshidi Bible wamba?

Lelu bantu ba bungi pa buloba bujima batu badimanyisha ne disanka dionso ne: mbena Kristo; kadi batu benzela bakuabu malu ne tshikisu. Mbadinangi, kabayi benza malu ne bululame, anyi mbapange bukalanga. Bakuabu kabena ne lulamatu kudi bena dibaka nabu to. Mushindu udibu badituala udi ufikisha bantu ku didikonka ne: ‘Kuikala muena Kristo kudi kumvuija tshinyi menemene?’

Tshidi kuikala muena Kristo kumvuija menemene

Mbipepele bua muntu kuamba ne: mmuena Kristo. Kadi kuamba nanku nkayaku ki nkudi ne mushinga to. Bilondeshile Bible, muena Kristo mmuyidi wa Yezu Kristo. (Bienzedi 11:26) Yezu nkayende wakamba ne: “Nuenu bashale mu dîyi dianyi, nudi bushuwa bayidi banyi.” (Yone 8:31) Mu kuamba kuimpe, kakuena muntu udi mua kutumikila mêyi a Yezu ne mu katoba to. Kadi muena Kristo utu udienzeja bua kutumikila malongesha Yezu, ne dituku dionso utu wenza malu adi aleja ne: mmuyidi wa Yezu. Mona bimue bilejilu.

Bena Kristo mbanange bakuabu ne muoyo mujima

Tshivua Yezu muambe: “Ndi nnupesha mukenji mupiamupia ne: nunangangane; anu bu mundi mununange, nuenu penu nunangangane. Bua bualu ebu bantu bonso nebamanye ne: nudi bayidi banyi, binuikala ne dinanga munkatshi muenu.”​—Yone 13:34, 35.

Tshivua Yezu muenze: Yezu uvua munange bantu bonso ne muoyo mujima, kavua utangila bubanji buvua nabu muntu, lumu luvuaye nalu peshi muaba uvuaye ufumina to. Wakondopa babedi, kudiisha bavua ne nzala, kufilaye too ne muoyo wende bua bakuabu.​—Matayi 14:14-21; 20:28.

Mudi bena Kristo benza malu: Bena Kristo mbanange bakuabu ne muoyo mujima. Batu babapesha bintu, babafuila luse, ne kabatu babenzela malu ne kansungansunga to. Batu kabidi bambuluisha bantu badi batata, ne batu pabuipi bua kudipangisha malu bua kuambuluisha bakuabu.​—1 Yone 3:16.

Bena Kristo batu bena bululame

Tshivua Yezu muambe: “Meme ndi . . . bulelela.”​—Yone 14:6.

Tshivua Yezu muenze: Yezu uvua ne bululame mu malu onso avuaye wamba ne mu bionso bivuaye wenza. Kavua ushimakaja bantu anyi ubitabijija malu avua kaayi malelela nansha. Uvua mumanyike bua muvuaye muena bululame, nansha pakamukebelabi buluishi.​—Matayi 22:16; 26:63-67.

Mudi bena Kristo benza malu: Bena Kristo kabatu bashima to. Batu bafuta bitadi, kabatu biba to, ne kabatu benza malu abu makuabu mu mêba a mudimu nansha. (Lomo 13:5-7; Efeso 4:28) Kabatu badiila pambidi pa bakuabu, kabatu bibila mateta, ne kabatu bashima padibu bakeba bua babangate ku mudimu to.​—Ebelu 13:18.

Bena Kristo batu ne muoyo mulenga

Tshivua Yezu muambe: “Luayi kundi, nuenu bonso badi batata ne midimu mikole ne bambule majitu mabapite, nennupeshilule bukole. Ambulayi mutshi wanyi wa tshikokedi, nulonge malu kundi, bualu meme ndi mupole malu ne mupuekele mu muoyo, nunku nuenu nenupetulule bukole. Bualu mutshi wanyi wa tshikokedi mmuimpe ne bujitu buanyi mbupepele.”​—Matayi 11:28-30.

Tshivua Yezu muenze: Yezu uvua muntu wa kukuatshila malu ne uvua ne bukalanga. Uvua usomba ne bana, ukolesha bavua bakenga, ne unemeka bakuabu.​—Mâko 10:13-15; Luka 9:11.

Mudi bena Kristo benza malu: Bena Kristo batu bayukila bimpe ne bantu; kabatu bapendangana anyi bambangana mêyi mabi to. (Efeso 4:29, 31, 32) Batu batabalela bakuabu ne bakeba mishindu ya kubambuluisha.​—Galatiya 6:10.

Bena Kristo batu balamata bena dibaka nabu

Tshivua Yezu muambe: “Muntu kapanduludi tshidi Nzambi musuike kaba kamue to.”​—Mâko 10:9.

Tshivua Yezu muenze: Nansha muvua Yezu kayi musele, wakakankamija bena dibaka bua bikale ne lulamatu kudi bena dibaka nabu. (Matayi 19:9) Wakabadimuija bua malu adi mua kunyanga dibaka.​—Matayi 5:28.

Mudi bena Kristo benza malu: Bena Kristo badi bepuka bikadilu bionso bidi mua kunyanga dibaka diabu. (Ebelu 13:4) Bena dibaka badi benzelangana malu ne dinanga ne badi banemekangana.​—Efeso 5:28, 33.